iTovo Kaukaua e Vakararawataki Keda Kece

O CEI e se bera ni rogoca se sotava na veika me baleta na itovo kaukaua? Eda dau sarava vakalevu qori ena nius. Eda rere nida raica ni yaco e gaunisala kei na vanua ni cakacaka, era sotava tale ga na gone vei ira na dau veivakasagai e koronivuli. Ena loma mada ga ni vuvale, na vanua era nanuma e levu nira na taqomaki kina, era se lomaleqa ga e vica vata na milioni​—vakabibi o ira na yalewa. E laurai ni rauta ni 70 na pasede na yalewa​—vakatau ena matanitu era tu kina​—e vakayacori vei ira na itovo kaukaua, e cakava qori o ira era veikilai vinaka se ra a tiko vata ena dua na gauna.

Ena levu na vanua, era dau rerevaka na tamata na tiko yavavala ni matanitu kei na nodra kudru na lewenivanua, se na cakacaka ni batikadi. Qori e vakavuna me yadravi na ka era dau cakava na lewenivanua ena kena biu na itaba, vakabibi ena vanua e kilai nira na taketetaka na batikadi.

Dina ni vakilai tiko na leqa ni bula vakailavo e vuravura, ia e sa qai levu tiko ga na tabana e bulia na iyaya vakalivaliva me vaka na itaba mera yadravi kina na lewenivanua. O cei e vakailavotaka na ka kece qori? O keda ga, mai na noda dau sauma na ivakacavacava kei na so tale na ka. E sa qai tubu cake ga na ka eda sauma qori baleta ni sa vakayagataki vakalevu qai sau levu na ka e caka meda taqomaki kina.

Na leqa e vu mai na itovo kaukaua e dodonu me uqeti keda meda dikeva tale na noda itovo kei na noda vakabauta. Ena ulutaga tarava ena saumi kina e vica na taro qo: E vakaitavi vakacava na tabana ni itukutuku ena kena vakatetei na itovo kaukaua? Na cava eso na ka e rawa ni veisautaka na noda rai me baleta na itovo kaukaua? Na cava eda rawa ni cakava meda kua kina ni rawai ena veivakamuai cala?