Vakamavoataki Koya ga o Luvemu iTabagone

VEIKA DREDRE

Ke o kila ni dau nakita o luvemu itabagone me vakamavoataki koya ga, de dua o na veinanuyaka: ‘Na cava e cakava kina ya? E via vakamatei koya beka?’

De dua e sega ni nona inaki qori. E rairai dua tiko nona leqa qai vinakati me vukei. O na vukei koya vakacava? E vinaka mo vaqaqa mada na vuna e dau vakamavoataki koya kina.

VUNA E YACO KINA

Ka wale ga ni veimurimuri? E macala ni so na itabagone era vakamavoataki ira ena nodra veimurimuri. Ena yasana a dua, e sega dina ni ka ni veimurimuri na nodra vakamavoataki ira e levu. Baleta na cava? Ni dau caka vakavuni na ivakarau qo, o ira era dau cakava era sega ni vinakata me kilai. E tukuna o Celia,a e dua na goneyalewa yabaki 20: “Au sega ni vinakata me dua e kila na ka au cakava. Au qai dau vunitaka sara vakavinaka na noqu mavoa.”

Era vinakata beka mera kauaitaki? De dua era vakamavoataki ira eso mera kauaitaki kina. Ia o ira era vakamacalataki ena ulutaga qo era sega ni vinakata me kilai na ka era dau cakava. Ena yasana adua, a tukuna e dua e dau vakamavoataki koya tu e liu ni a diva me dua e raica na nona mavoa me rawa ni vukei totolo.

Na cava ga era vakamavoataki ira kina? E levu na ka e vakavuna mera cakava kina qori na itabagone. Ia na vuna levu duadua nira kinoca voli na ka era rarawataka. E vakamacalataki ena ivola Cutting, a vola o Steven Levenkron e dau dikeva na mona, ni so era dau vakamavoataki ira me vakaseavutaka na nodra rarawa.

Vakacava ke o beitaki iko? De dua o na nanuma ni o vakavuna na nona vakamavoataki koya o luvemu ni o sega ni qarava vinaka nomu itavi, ia kua ni leqataka qori, e bibi ga mo kauaitaka na ka o na cakava mo vukei koya kina.

KA O RAWA NI CAKAVA

Uqeti luvemu me talaucaka nona leqa. Qo eso na ka o rawa ni cakava.

Vosa vakayalovinaka. Kua ni cudru ke tukuna vei iko o luvemu ni dau vakamavoataki koya. Vosa ga vakamalua, me tau tale ga vakayalovinaka.​—⁠iVakavuvuli vakaivolatabu: 1 Cesalonaika 5:⁠14.

Lewa vinaka nomu taro. Kena ivakaraitaki, o rawa ni tukuna: “Au kila ni o dau sevaka eso na ka me baleti iko, ia na cava e vakararawataki iko vakalevu?” se “Na cava o nanuma meu cakava ke o lomaleqa se lomabibi?” se “Na cava o vinakata meu cakava me daru veivolekati tiko ga kina?” Rogoci koya vinaka, kua ni vosa takoso.​—⁠iVakavuvuli vakaivolatabu: Jemesa 1:⁠19.

Vukei luvemu me donu nona rai. Eso na itabagone era dau vakamavoataki ira nira sevaka eso na ka me baleti ira, e bibi gona mo vukei luvemu me kauaitaka eso na ka e vinaka kina. O rawa ni kerei koya me vola e tolu mada ga na ka e taleitaka me baleti koya. E kaya e dua na goneyalewa o Brianab: “Niu vola eso na ka au rawa ni cakava, au sa qai kila ni tiko eso na ka au vinaka kina.”

Uqeti luvemu me masu vua na Kalou o Jiova. E tukuna na iVolatabu: “Moni biuta vua na nomuni lomaocaoca kece, ni kauaitaki kemuni o koya.” (1 Pita 5:⁠7) E kaya o Lorena, e yabaki 17: “Au saga meu talaucaka na lomaqu vua na Kalou o Jiova ena gauna au dau vakasamataka kina meu vakamavoataki au. Qori e vukei au ena noqu sasaga meu muduka na ivakarau ya.”​—⁠iVakavuvuli vakaivolatabu: 1 Cesalonaika 5:17.