DIGOVI VURAVURA

MERIKA

E veisiga era vakamatei ira ga e sivia e le 20 era a lewe tu ni mataivalu mai Merika. E veivula e rauta ni 950 na sotia luvaisulu, era qaravi tiko ena Department of Veterans Affairs mai Merika, era dau via vakamatei ira ga.

Jaina

E ripotetaka na China Daily: “E voleka ni veimama na yalewa era vaqara cakacaka ena so tale na vanua e Jaina era bukete ni bera nira vakamau, e tubu na kedra iwiliwili na buketeisala ni vakatauvatani kei na 30 na yabaki sa oti.” Sa “vakadonui” tale ga e kea “mera tiko vata na tagane kei na yalewa ni bera nira vakamau.”

Kirisi

Sa laurai tale tiko e Kirisi na mate na malaria, dina ga ni sa voleka ni kawaboko ena 1974. E dikevi ni vakavuna qori na leqa vakailavo kei na kena sega ni vakatorocaketaki na tabana ni bula.

Idia

Dina ni sa veisau na gauna, ia e laurai ena dua na vakadidike ni 74 na pasede na lewenivanua era se vinakata tiko ga mera dau digia na itubutubu na wati luvedra, mai na nodra digia ga o luvedra na watidra. E rauta ni 89 na pasede era vinakata mera tiko vata ga kei ira na wekadra ena dua na vale mai na nodratou tiko vata ga o tama, tina kei ratou na gone.

Itali

“Sa sega ni qai kaukaua na lotu [Katolika] ena veivanua vutuniyau e Urope kei Merika. Sa madra mai na neimami ivakavuvuli ni lotu, e ka levu na neimami valenilotu, sa ra lala na nodra vale na sista, sa ra sega ni vakayacora vinaka nodra itavi na iliuliu ni lotu, sa sivia tale ga na solevu qai levu na mataqali isulu era dau dara na bete. . . . E se muria tiko ga na Lotu na ivakavuvuli makawa.”​—⁠Vakatarogi na kadinala ni lotu Katolika o Carlo Maria Martini, qai tabaka ena dua na gauna emuri na niusiveva na Corriere della Sera.