Ni Lomaleqa o Luvemu Yalewa

ITUVAKI DREDRE

Vakacava ke tukuna o luvemu yalewa ni lomaleqa vakalevu. O na rairai vakasamataka, ‘Na cava mada e lomaleqataka tu? E se qai yabaki 13!’ Ni bera ni o tukuna qori vei luvemu, dikeva mada eso na ka e dau vakavu lomaleqa vei ira na goneyalewa.

VUNA E YACO KINA

Veiveisau e yaco e yagona. Eso na goneyalewa e dau totolo na veisau e yaco vei ira ni vakatauvatani kei na so tale, qori e dau vakavuna mera lomaleqa. E tukuna o Annaa sa yabaki 20 nikua, “Au imatai vei ira noqu icaba meu dara na ivakamoko, qai sega ni matau vei au. E vaka meu duatani vei ira na noqu icaba!”

Veiveisau na ivakarau ni yalona. E nanuma lesu o Karen sa yabaki 17 nikua: “E vakararawataki au niu sega ni kila na vuna au dau marau kina ena siga qai rarawa ena bogi. Au sega ni kila na cava e leqa. E vaka ga au sega ni lewa rawa na ivakarau ni yaloqu.”

Tekivu na matenivula. E kaya na goneyalewa o Kathleen: “A vakamacalataka o Na na ka ena yaco, ia na imatai ni gauna e yaco kina noqu matenivula au sega tale ni kila na cava meu cakava. Na levu ni noqu vakasisilataka, au sili vakavica ena dua na siga.”

Nodra veivakamuai na icaba. E nanuma lesu o Marie sa yabaki 18 nikua. “Dua na ka na nodra veivakamuai na noqu icaba niu sa yabaki 12 ina 14. Era na vakalialiai na gone era duatani vei nodra icaba e koronivuli.” E kaya o Anita e yabaki 14: “Era dau vinakata na itabagone ena noqu yabaki ni bula mera taleitaki vei ira na nodra icaba.”

KA O RAWA NI CAKAVA

Uqeti luvemu yalewa me talaucaka na lomana. Ena rairai dredre qori ena imatai ni gauna. Ia mo yalorawarawa ni muria na ivakasala vakaivolatabu, mo “totolo ni vakarorogo. . . [mo] berabera ni vosa.”​—Jemesa 1:19.

Kua ni raica vakamamada nona lomaleqa. Nanuma tiko ni se sega ni qaseta o luvemu na bula me vakataki iko, e sega tale ga ni kila na iwali ni nona lomaleqa.​—iVakavuvuli vakaivolatabu: Roma 15:1.

Kua ni vakacolati luvemu yalewa ena levu na itavi. E tukuna na ivola Teach Your Children Well (Vakavulici Luvemu Vinaka) ni sivia na itavi e vakacolati vei ira na itabagone “era na lomaleqa vakalevu, ena dau mosi na uludra kei na ketedra.”​—iVakavuvuli vakaivolatabu: Filipai 1:9, 10.

Levu nona gauna ni cegu. E dau lailai nodra gauna ni moce na itabagone. Qori ena vakaberaberataka na ivakarau ni nodra vakasama, era na lomaocaoca tale ga vakalevu.​—iVakavuvuli vakaivolatabu: Dauvunau 4:6.

Vakaraitaka vei luvemu yalewa na sala me walia kina nona lomaleqa. Eso na goneyalewa era vakadinadinataka ni yaga vakalevu na vakaukauayago. E kaya na iVolatabu: “[E] yaga . . . na vakarautaki ni yago.” (1 Timoci 4:8) Eso tale era dau vakavola na ka era lomaocaocataka, qori e vukea me donu tiko ga nodra rai. A nanuma lesu o Brittany, e yabaki 22, “Au dau vakavola na veika au sega ni walia rawa. Qori e vukei au meu kila vinaka na vu ni noqu leqa, qai vakarawarawataka meu walia se meu guilecava.”

Mo iVakaraitaki. Na cava o cakava ni o lomaleqa? Vakacava o dau vakadonuya mo cakava e levu na itavi qai dau lomaleqa ni o saga mo cakava kece? O sa lai oga kina vakalevu, qai guilecava na veika e bibi? E kaya na Filipai 4:5, “Me kilai na nomuni yalorawarawa.” Mo nanuma tiko ni na muria o luvemu na veika o cakava​—ca se vinaka.