CAVA MO CAKAVA NI TUBU NA ISAU NI IYAYA?
Ciqoma na Veisau
Eda na rairai sega ni kila na tubu ni isau ni iyaya, ke vinaka tiko na keda isau ni cakacaka. Ia eda na rawa ni nuiqawaqawa qai lomaocaoca ke dua tu ga na keda isau, qai tubu na isau ni iyaya, vakabibi ke da qarava tiko na vuvale.
Eda na sega ni lewa rawa na tubu ni isau ni iyaya. Ia nida ciqoma na veisau e yaco, ena yaga sara vei keda.
VUNA MO KAUAI KINA
Ke donu tiko noda rai me baleta na tubu ni isau ni iyaya, eda na . . .
lomavakacegu. Qori ena vukei keda meda vakasama qai vakatulewa vinaka.
vakayagataka vakavuku na ilavo. Kena ivakaraitaki, eda na vakayagataka vakavuku nida sausaumi, qai sega ni vakasabusabu.
lewai keda vinaka, qai sega ni veibataka na ilavo kei ira noda lewenivuvale.
kila na ka meda cakava, rawa ni okati kina na veiveisau ni ka me voli kei na levu ni ilavo me vakayagataki.
KA O RAWA NI CAKAVA
Yalorawarawa mo veisau. Ni tubu na isau ni iyaya, tovolea mo vakayagataka vakavuku na ilavo. Eso era saga mera vakayagataka vakasivia na ilavo ena ivakarau ni bula mera marautaka, qori sa qai vakadredretaka ga nodra bula! Kena itinitini, e vakaocai ira ga. Ke o vakavuvale, de dua o na kauaitaka na ka me ratou bula kina! Ia mo nanuma tiko: Ratou na vinakata vakalevu nomu loloma, gauna kei na nomu kauai.
Na qarai ni bula vutuniyau, e vaka nomu qalova tiko e dua na uciwai e kaukaua na kena kui