Veivakabulai o Jisu ena Siga ni Vakacecegu

Era cati Jisu na Farisi ra qai saga mera beitaki koya ena dua na ka mera vesuki koya kina. Era kaya me kua ni vakabulai ira na tauvimate ena Siga ni Vakacecegu. E qai raica o Jisu e dua na turaga mataboko ni kerekere tiko e gaunisala ena Siga ni Vakacecegu. E kaya vei ratou na tisaipeli: ‘Raica na kaukaua ni Kalou me vakabula na turaga qo.’ E wakia nona ikasivi kei na qele qai boroya na mata i mataboko. E kaya vua o Jisu: ‘Lai tavoi ena tobu o Sailoama.’ Ni cakava qori, sa qai rai rawa.

Era kurabui na lewenivanua. Era kaya: ‘Sega ni o koya ga qo na daukerekere ya, se dua ga e vakataki koya?’ E kaya na turaga qori: ‘Au a sucu mataboko!’ Era taroga na lewenivanua: ‘O qai rai vakacava?’ Nira rogoca na ka e tukuna, era kauti koya sara vei ira na Farisi.

E tukuna na turaga qo vei ira na Farisi: ‘E boroya na mataqu o Jisu qai kaya meu lai tavoi, au mani rai rawa.’ Era kaya na Farisi: ‘E veivakabulai o Jisu ena Siga ni Vakacecegu, kena ibalebale e sega ni vu mai vua na Kalou na nona kaukaua.’ Ia era kaya eso: ‘Ke sega ni vu mai vua na Kalou na nona kaukaua, ena sega ni veivakabulai rawa.’

Era kacivi rau mai nona itubutubu o ira na Farisi, era tarogi rau: ‘Sa qai rai vakacava na luvemudrau?’ Erau rere na nona tubutubu nira tukuna na Farisi mera vakatalai mai valenilotu o ira na vakabauti Jisu. Rau mani kaya: ‘Keirau sega ni kila. Moni tarogi koya ga.’ Era vakatarogi koya tale na Farisi, e mani tukuna vei ira: ‘Au sa tukuna oti vei kemuni. Na cava tale oni tarogi au kina?’ Era cudru na Farisi ra qai cemuri koya i tuba.

E lai raica tale na turaga qori o Jisu qai tarogi koya: ‘O vakabauta na Mesaia?’ E sauma: ‘Au na vakabauta keu kilai koya.’ E kaya o Jisu: ‘O yau na Mesaia.’ E yalovinaka dina o Jisu, se vakacava? E sega ni vakabula ga na turaga qori, e vukei koya tale ga me vakabauta.