Me Yaco Beka ga na Ka o Vinakata?

ERAU vakatatalo tiko e rua na gonelalai, qai kovea tani mai e dua vei rau na nona iyaya ni vakatatalo taleitaki a taura tiko o kena ikarua, qai kailavaka, “Na noqu!” Me tekivu mai na gauna eda se gone kina, dau tiko e so na gauna eda vakaraitaka kina na yalo ni nanumi koya ga baleta nida sucukaya na ivalavala ca. (Vkte. 8:21; Roma 3:23) Kena ikuri, e uqeta tu na vuravura na yalo ni vakaunona. Ke da sega ni vinakata na yalo va qo, e dodonu meda vorata noda dau nanumi keda ga. Ke sega eda na rawa ni vakatarabetaki ira tale na so qai sega ni vinaka noda veiwekani kei Jiova.​—Roma 7:21-23.

Eda uqeti meda dau vakasamataka vinaka na kena tarai ira tale e so na noda itovo, e vola na yapositolo o Paula: “E tara na ka kece, ia era sega ni yaga na ka kece. E tara na ka kece, ia era sega ni veiuqeti na ka kece.” E kaya tale ga: ‘Ni kua ni cakava e dua na ka me dua e tarabe kina.’ (1 Kor. 10:23, 32, NW) Ena veika e vauci ena ka eda dau vinakata, e ka vakavuku meda taroga: ‘Rawa beka niu vakuai au ena so na ka au dau vinakata ia e rawa ni vakaleqa na duavata ena ivavakoso? Au sa tu vakarau beka meu muria na ivakavuvuli vakaivolatabu ke na via dredre mada ga niu cakava?’

Nida Digia na Cakacaka

E levu era nanuma ni nodra digia nodra cakacaka e nodra vakatulewa ga, ena sega ni nona leqa e dua tale. Ia vakasamataka mada na nona vakasavuirogorogo e dua na turaga vakabisinisi ena dua na tauni lailai e Sauca Amerika. E kilai tu ni dau veimauilavo qai dau gunu. Ia, ni vulica na iVolatabu kei ira na iVakadinadina i Jiova, a toso vinaka vakayalo lai veisautaka sara nona ivakarau ni bula. (2 Kor. 7:1) Na gauna e vinakata kina me lai cakacaka vakavunau kei na ira na lewe ni ivavakoso, a qai uqeti koya ena vosa matau e dua na qase ni ivavakoso me vakasamataka vakavinaka na nona cakacaka saumi. Ena tauni e tiko kina, e dau volitaka sara ga vakalevu o koya na alakaolo e caka mai na suka, e levu na ka e vakayagataki kina na gunu qo. Ia, ena yasayasa oya e dau voli ga me waki kei na wainimoli qai kena inaki me veivakamatenitaki.

E kila na turaga qo, ke volitaka tiko ga na alakaolo qai vunau tiko, ena rawa ni rogo ca kina na ivavakoso qai vakaleqa nona veiwekani kei na Kalou. Dina ni a tu nona vuvale levu me qarava, ia a tinia ga nona volitaki alakaolo. Ena gauna qo sa dau volivolitaki tu ga me qaravi ratou kina nona vuvale. Sa papitaiso ena gauna qo o koya kei na watina. E lima na luvedrau ia se qai papitaiso ga e rua na luvena yalewa. Ratou sa gumatua tiko qai doudou na vunautaka na itukutuku vinaka ena gauna qo.

Nida Digitaka Noda iTokani

Vakacava na noda veimaliwai kei ira eda sega ni vakabauta vata, me vakatau ga vei keda se okati kina na ivakavuvuli vakaivolatabu? E dua na tacida yalewa lotu vaKarisito a via gole ena pati kei na dua na cauravou e sega ni lotu vaKarisito. Dina ni a vakasalataki ni na yacovi koya na leqa, a nanuma ni dodonu me nona ga na vakatulewa mani lako kina. Ni yaco yani ena pati, a soli sara vua e dua na gunu e veisola tu kei na wainimate ni moce. A yadra ni oti tale e vica na aua, e qai kila ni a kucuvi koya ga na tagane ya.​—Vakatauvatana Vakatekivu 34:2.

De dua ena sega sara nida yacova na vanua ya nida veimaliwai tiko kei ira eda sega ni vakabauta vata, ia e vakasalataki keda na iVolatabu: “Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.” (Vkai. 13:20) E sega ni vakatitiqataki nida na leqa ke da veimaliwai cala! “O koya sa yalomatua sa kunea na ca, ka sa vunitaki koya,” e kaya na Vosa Vakaibalebale 22:3, “ia ko ira sa sega ni vuku era sa lako tu yani, a ra sa kunea na rarawa.” E rawa nira vakaleqai keda vaka kina noda veiwekani kei na Kalou o ira eda veimaliwai.​—1 Kor. 15:33; Jeme. 4:⁠4.

Ena iSulusulu kei na Sasauni

E dau veiveisau na isulusulu kei na sasauni. Ia, e sega ni dau veiveisau na ivakavuvuli vakaivolatabu me baleta na isulusulu kei na sasauni. E uqeti ira kina na yalewa lotu vaKarisito o Paula me ‘matau na nodra isulusulu, me rakorako, mera yalomatua’—⁠e tautauvata na ivakavuvuli qori vei ira tale ga na tagane. (1 Tim. 2:9, NW) A sega ni tukuna tiko e ke o Paula meda dara ga na isulu sa rawa, se me tautauvata kece na ka era taleitaka na lotu vaKarisito. Ia vakacava na isulu e rakorako? E kaya e dua na ivolavosa ni rakorako e kena ibalebale me “matau qai veiganiti, kilikili qai maqosa ena isulusulu kei na vosa.”

Meda tarogi keda mada: ‘Rawa beka niu tukuna ni rakorako na noqu ivalavala niu via dara ga na isulu e vakavuna nodra vakaraici au na tamata? Era na lomatarotarotaka beka na tamata na isulu au tokara, qai vakalewai kina na noqu itovo?’ Me kua ni “vakatarabetaki e dua,” e bibi meda ‘kua ni nanumi keda ga, meda nanuma tale ga na ka e baleti ira na tamata tani.’​—2 Kor. 6:3; Fpai. 2:4, NW.

Ena Veika Vakabisinisi

Ni yaco na leqa levu ena vuku ni cala se so na cakacaka vakailawaki ena ivavakoso e Korinica, e vola o Paula: “Vakacava mo ni vosota mada ga ke caka vei kemuni na ka ca? Vakacava mo ni vosota mada ga ke oni dabui?” A vakasalataki ira na lotu vaKarisito o Paula mera vakuai ira mai na so na ka, mai na nodra kauti ira na tacidra ina mataveilewai. (1 Kor. 6:1-7, NW) A muria sara ga mai vu ni lomana e dua na tacida mai Mereke na ivakasala qo. E lotu vaKarisito na nona boso, rau qai veileqaleqati ena vuku ni kena isau. Ni rau muria na idusidusi vakaivolatabu, rau saga me rau walia nodrau leqa, ia a mani sega ni wali rawa. Erau sa qai lako ina “[i]soqosoqo lewe ni lotu [“ivavakoso,” NW],” oya vei ratou na qase ni ivavakoso.​—Maciu 18:15-17.

Ia, ka ni rarawa ni a sega ga ni wali kina na leqa. Ni masu oti vakavica, sa qai vakatulewataka na tacida qo me sa guilecava mada ga na ilavo a nanuma ni dinautaki tu vua. Na vuna? E qai kaya, “Na tadre ni veivosaki qo e sa vakavuna meu sega ni marau kina qai vakalusia vakalevu na gauna e dodonu me caka kina e so na cakacaka vakayalo.” Ni cakava oti na vakatulewa qo, a vakila ni sa marau tale, vakila tale ga na veivakalougatataki i Jiova ena nona veiqaravi.

Ena Ka Lalai Mada Ga

Eda na vakalougatataki tale ga ena ka lalai ke da sega ni vakaliuca e so na ka eda vinakata. Erau a totolo mai e dua na veiwatini painia ena imatai ni siga ni soqo ni tikina, rau qai mai tawana na idabedabe sara ga rau a vinakata me rau dabe kina. Ni tekivu na porokaramu, eratou vagugu yani e dua na vuvale e levu toka na kena gone. Rau raica na veiwatini qo ni ratou vaqara idabedabe na vuvale oya me ratou dabe vata kina, rau mani solia sara nodrau idabedabe. A rawa kina ni ratou dabe vata vakavuvale. Ni oti tale e vica na siga ni sa cava na soqo ni tikina, rau taura na veiwatini painia qo na nodratou ivola ni vakavinavinaka na vuvale ya. E vakamacalataka na ivola ni dua na ka nodratou yalolailai na gauna ratou bera yani kina ena soqo ni tikina. Ia ratou marau, qai vakavinavinakataka nodrau veinanumi na veiwatini painia qo.

Meda dau saga ena veigauna meda vakuai keda mai na so na ka eda vinakata me rawa nida solia vei ira e so tale. Nida vakaraitaka na loloma eda na ‘sega ni qara na ka me noda ga,’ eda na saga me veiyaloni tiko ga na ivavakoso vaka tale ga kina o ira eda tiko veitikivi. (1 Kor. 13:5) Ia na kena e bibi duadua, eda na taqomaka noda veiwekani kei Jiova.

[iYaloyalo ena tabana e 20]

O sa yalorawarawa tiko beka mo vakuai iko mai na so na isulu o dau vinakata?

[iYaloyalo ena tabana e 21]

O sa tu vakarau beka mo solia nomu idabedabe ena vukudra na tacimu?