Veibulu vaKarisito e Dokai, Rawarawa Qai Vakamarautaka na Kalou

E ROGO na tagi ni lolosi ena vanua kece o rai kina. Era vakaisulu loaloa ra qai tagiyaso o ira na lai veibulu, ra bitalaki ira ena qele ena nodra rarawa. E so era suaigelegele ena vadugu ni ivakatagi. Ia e so tale era kana ra qai dredre kaikaila ena marau kei na soqo. E so tale era sa davo ena qele nira mateni ena waini kei na bia. Na soqo cava beka qo? Qori na ka e dau yaco ena so na vanua ena gauna ni veibulu, nira soqoni yani e drau vakacaca mera talaci koya e takali.

Era vakaitikotiko e levu na iVakadinadina i Jiova ena vanua e se vakabauti tu ga kina na italanoa lasu kei na nodra rerevaka na mate o ira na wekadra se o ira na tiko veitikivi. Era vakabauta e milioni vakacaca ni gauna e mate kina e dua ena lai tomani ira na wekana era sa mate oti qai rawa ni veivuke se vakarerei ira na bula tiko. Na vakabauta va qori e sema tiko kei na levu na itovo vakavanua e dau caka ena veibulu. Ia, eda dau lolosi ga ni takali e dua. A lolosi tale ga o Jisu kei ira na nona tisaipeli ni takali e dua era veivolekati. (Joni 11:33-35, 38; Caka. 8:2; 9:39) Ia, ratou sega ni lolosi sara vakasivia, dina nira dau cakava qori e levu era a bula ena gauna ya. (Luke 23:27, 28; 1 Ces. 4:13) Na vuna? Ni ratou kila vinaka tu na kedra ituvaki dina na mate.

E vakamatatataka na iVolatabu: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka . . . na nodra loloma, kei na nodra veicati, kei na nodra vuvu, sa qai yali . . . ni sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.” (Dauv. 9:5, 6, 10) E matata ena tikinivolatabu uqeti vakalou qo ni sega tale na ka e vakila e dua ena gauna sa takali kina. Sa sega ni vakasama rawa, vosa, se dua tale na ka me kila. Me na vakayacori gona vakacava na veibulu ni lotu vaKarisito nida sa mai kila na ka dina vakaivolatabu qo?

“Dou Kakua ni Tara na Ka sa Sega ni Savasava”

Se mani vanua se matatamata cava era cavutu mai kina na iVakadinadina i Jiova, era na sega ga ni muria na ivakarau ni veibulu e vakabauti kina nira se bula tiko ga na mate, ra qai rawa ni cakava e so na ka vei ira na bula tiko. E so na veibulu e dau okati kina na veika qo—⁠bikabika, soqo ni marau, ivakananumi, cabo na ka vei ira na mate, ra vakatatabu tu na watidra kei na vakataraisulu—⁠era sega ni yavutaki vakaivolatabu, era ivakavuvuli vakatevoro ni tawamate na yalo. E sega gona ni savasava, qai cata na Kalou. (Isik. 18:4) Era ‘sega ni dau gunuva na bilo ni Turaga [“Jiova,” NW], kei na nodra bilo tale ga na tevoro’ o ira na lotu vaKarisito dina, ya na vuna era na sega kina ni vakaitavi ena so na itovo vakavanua sa tukuni oti mai. (1 Kor. 10:21) Era talairawarawa ina ivakaro: “Dou tawasei tu . . . dou kakua ni tara na ka sa sega ni savasava.” (2 Kor. 6:17) Ia, e dau dredre toka ni muri na idusidusi qori.

E dau vakabauti e Aferika kei na so tale na vanua ni na cudru na yalodra na mate ke sega ni muri e so na itovo vakavanua. Ke sega ni muri na veika qori, e dau raici tu me cala levu, qai rawa ni yaco kina na leqa se na kalouca ina itikotiko taucoko. Nira sega ni dau vakaitavi na tamata i Jiova ena soqo ni veibulu e sega ni vakaivolatabu, era dau vakalewai, beci se ra raici kina vakatani vei ira na wekadra kei ira na lewe ni itikotiko. Era beitaki kina e so nira sega ni taleitaka na veimaliwai, ra sega tale ga ni dau dokai ira na mate. Ena so na gauna era dau dre na weka era sega ni vakabauta mera lewa na ka e tuvani ena nona veibulu e dua na lotu vaKarisito. Koya gona, na cava eda rawa ni cakava meda kua ni veileti kina kei ira na saga vakaukaua mera muria na itovo vakavanua ni veibulu e cata na Kalou? Koya e bibi sara, na cava e rawa ni caka meda tawasei keda da qai kua ni tara na ka e tawasavasava ena vakacacana noda veiwekani kei Jiova?

Me Matata Nomu Vakatulewa

Ena so na vanua, e dau kena ivakarau vei ira na qase ni yavusa kei ira na weka voleka mera vakatututaka na ka me caka ena soqo ni veibulu. Na lotu vaKarisito yalodina gona ena vakamatatataka ni na vinakata me tuvanaka qai lewa nona soqo ni veibulu o ira na iVakadinadina i Jiova qai muri ga na ivakavuvuli vakaivolatabu. (2 Kor. 6:14-16) Na ka e caka ena soqo ni veibuli ni lotu vaKarisito me kua ni vakacaraka nodra lewaeloma o ira eda vakabauta vata se vakatarabetaki ira na kila na ka eda vakabauta kei na noda ivakavuvuli me baleti ira na mate.

Ni kerei e dua na lewe ni ivavakoso vaKarisito me tuvanaka na soqo ni veibulu, era na vakatura e so na idusidusi yaga na qase era lesi kina, ra qai veivuke vakayalo me rawa ni muri kina na yavu vakaivolatabu. Ke ra via cakava e so na itovo vakavanua e tawasavasava o ira na sega ni iVakadinadina, e bibi meda dei da qai vakamacalataka ena vakarokoroko kei na veidokai na noda vakabauta vaKarisito. (1 Pita 3:15) Ia, vakacava ke ra cike tiko ga na wekada era sega ni lotu vaKarisito me caka e so na itovo vakavanua e tawasavasava? Sa rawa nira vakasuka na oga ni somate o ira na weka era lotu vaKarisito. (1 Kor. 10:20) Ke yaco qori, e rawa ni caka e dua na ivunau ni veibulu ena Kingdom Hall se dua na vanua veiganiti mera ‘vakacegui kina ena iVolatabu’ o ira na lolositaka tiko nona takali na wekadra daulomani. (Roma 15:⁠4) Dina ni na sega ni tiko na yagona, ia na ituvatuva qori e dokai qai sega ni cala. (Vkru. 34:5, 6, 8) Na nodra dau mai siova tiko na ka me caka na weka era sega ni vakabauta, e dau ikuri ga ni rarawa kei na nuiqawaqawa. Ia eda lomavakacegu ni raica vinaka tu mai na Kalou na noda saga meda cakava na ka e dodonu, ni rawa ni solia vei keda na “kaukauwa mana levu.”​—2 Kor. 4:7.

Vola Rawa Tu

Ke vola rawa tu o koya sa takali na veika me baleta na ituvatuva ni nona veibulu, ena rawarawa sara na veivosaki kei ira na wekana era sega ni iVakadinadina nira dau rawa ni doka na veika era vinakata na sa takali. E bibi me na volai sara ga vakamatata na ka me caka ena veibulu, na vanua me caka kina, kei koya me na tuvanaka qai veidusimaki kina. (Vkte. 50:5) E dau yaga sara vakalevu na ivola e sainitaki qai dua e vakadinadinataka. O ira na sa rai sara tiko e liu ra qai yalomatua nira muria na veidusimaki vakaivolatabu, era kila vinaka tu ni sega ni dodonu me waraki sara mera qase se tauvimate bibi qai volai na veika qori.​—Vkai. 22:3; Dauv. 9:12.

E dau dredre vei ira e so mera vola na veika qori. Ia ena laurai kina na nodra matua vakayalo kei na nodra lomani ira e so tale. (Fpai. 2:4) E vinaka cake me se caka rawa qo, mera kua ni qai oca se lomabibi kina na vo ni vuvale era na rairai uqeti mera vakayacora e so na ivalavala ni veibulu e tawasavasava qai sega ni taleitaka se vakadonuya o koya e sa takali.

Veibulu Rawarawa Ga

E dau vakabauti ena so na vanua e Aferika ni dodonu me soqo levu qai veivakadrukai na veibulu, me kua ni cudru kina na yalo i koya sa takali. So tale era dau vakayagataka sara ga na gauna ni veibulu mera “dokadokai” ira kina ena nodra ilavo se itutu. (1 Joni 2:16) E laurai ni levu sara na gauna kei na iyau e vakayagataki me caka kina na veibulu e “dokai” mai na rai vakavuravura. Ena kabi e dua na itaba levu i koya sa takali ena veivanua e so me kilai nona sa takali, me levu era gole mai ena veibulu. Ena tabaki na kena iyaloyalo ena siqeleti qai veisoliyaki mera tokara na lolositaki koya tiko. Na voli tale ga na kisinimate levu qai saulevu me veivakadrukai. Ena dua na vanua e Aferika, e so era taya na kisinimate e vaka na irairai ni motoka, waqavuka, waqa kei na veika tale e so me kilai kina na iyau e taukeni, itutu kei na bula vutuniyau. Ena rawa tale ga ni biu mai tuba na yagonimate qai vakadavori ena dua na loga e ukutaki tu vakamatau. Ke takali e dua na yalewa, ena rairai vakaisulutaki ena isulu vulavula ni vakamau qai ukucavu ena veimataqali iukuuku lelevu, itaube kei na sasauni. E kilikili beka vei ira na tamata ni Kalou mera dau vakaitavi ena veika va qori?

Era kila na lotu vaKarisito matua ni ka vakavuku mera kua ni vakaitavi ena ka era dau cakava o ira na sega ni kila se kauaitaka na ivakavuvuli vakalou. Eda sa kila vinaka tu na itovo kei na ivalavala vakavanua e sega ni rakorako se vakaivolatabu ‘e sega ni vu mai vua na Kalou, ia e vu ga mai na vuravura e sa takali tiko yani.’ (1 Joni 2:15-17) Meda qaqarauni vinaka me kua ni tiko vei keda na yalo ni veiqati e sega ni vaKarisito, meda na via veisisivi kina. (Kala. 5:26) E laurai ni sa rui sivia tale na ka e caka qai sega ni lewai matau na soqo ni veibulu, ke dau vakabibitaki na itovo kei na bula vakavanua era rerevaki tiko kina na mate, qai totolo tale ga na kena yakusurasura. Na nodra vakarokorokotaki na mate ena uqeti ira ga kina na sega ni vakabauta mera coko tu ina ivalavala tawasavasava. Na veibulu va qori e dau levu kina na tagiyaso kei na kaikaila, mokoti na yago ni mate, vosa vei ira me vaka ga era se bula tiko, qai soli vei ira na ilavo kei na so tale na ka. Ke yaco qori ena dua na somate vaKarisito, sa na rogo ca ga kina na yaca i Jiova kei ira nona tamata.​—1 Pita 1:14-16.

Na noda kila na kedra ituvaki dina na mate ena rawa nida doudou kina ni tuvanaka na soqo ni veibulu e sega sara ga ni caka kina e dua na ivalavala vakavuravura. (Efeso 4:17-19) E kilai o Jisu ni Turaga levu qai rogo duadua me a bau bula, ia a vakayacori vua na veibulu rawarawa ga qai rakorako. (Joni 19:40-42) Na veibulu va qori e “dokai” vei ira na “kila . . . na lomai Karisito.” (1 Kor. 2:16) Na veibulu e rawarawa qai rakorako ena vinaka vakaoti ni na sega ni caka na ka me saqati kina na ivakavuvuli vakaivolatabu, ia ena cicivaki vinaka ga, ena dokai, tuvai vakamatau, qai ganiti ira na lomana na Kalou.

Dodonu Beka Meda Marau?

De dua e kena ivakarau vei ira na weka, ira na tiko veitikivi kei na so tale mera dau soqoni vakalewe levu ni oti na veibulu, ra qai meke ena ivakatagi vadugu. E dau okati ena soqo qori na gunu vakasivia kei na itovo vakasisila. Era kaya e so ni marau va qori ena seavu kina na nodra lolositaki koya sa takali. So era nanuma ni sa tiki ga ni nodra ivalavala vakavanua. Ia, e so tale era nanuma ni bibi dina na soqo kosakosa va qori baleta ni na dokai qai vakalagilagi kina o koya e takali, ena sereki kina na yalona me lai tomani ira na tubudra.

Era raica na lotu vaKarisito dina na vuku ni ivakasala vakaivolatabu: “Sa vinaka na tagi ka ca na dredre: ni sa vakaveveku mata sa vinaka cake kina na yalo.” (Dauv. 7:3) Era kila na yaga ni nodra vakasamataka na lekaleka ni bula kei na inuinui ni veivakaturi. O ira tale ga na qaqaco vinaka tu nodra veiwekani kei Jiova, ‘ena ka vinaka na siga ni mate, qai ca na siga e sucu kina e dua.’ (Dauv. 7:1) Koya gona, ke ra kila na lotu vaKarisito dina ni sema tiko ina soqo ni marau ni oti na veibulu na vakabauta nira se bula tale tiko na mate, kei na itovo vakasisila e caka kina, era na sega ni tiko se vakaitavi ena kena tuvanaki. Ke da lai tomani ira na dau qara ga na marau ena soqo ni veibulu, e vakaraitaka nida sega ni doka na Kalou, da sega tale ga ni kauaitaka na nodra lewaeloma o ira eda vakabauta vata.

Me Laurai ni o Duidui

Eda vakavinavinaka vakalevu nida sega ni rerevaki ira na mate me vakataki ira na tu ena butobuto vakayalo! (Joni 8:32) Nida “gone ni rarama,” ena laurai ena noda lolosi kei na rarawa na kilaka vakayalo, ena rakorako, ena veidokai, eda na qai vakayaloqaqataki ena inuinui ni veivakaturi. (Efeso 5:8; Joni 5:28, 29) Na inuinui qori ena taqomaki keda meda kua ni lolosi sara tu vakasivia, na ka e dau laurai vei ira na “sega na nodrai nuinui.” (1 Ces. 4:13) Eda na vakayaloqaqataki kina meda dei ena sokalou dina, da qai sega ni rerevaki ira na tamata.​—1 Pita 3:13, 14.

Na noda dau muria vinaka na ivakavuvuli vakaivolatabu era na kila kina na tamata “ni sa dua tani ko koya sa qarava na Kalou ka dua tani ko koya sa sega ni qaravi koya.” (Mala. 3:18) Ena vakaoti na mate ena dua na siga. (Vkta. 21:4) Nida waraka tiko na vakayacori ni yalayala qori, me raica mada ga o Jiova nida sega ni tauvi duka se cala, da qai tawasei keda mai na vuravura lolovira qo kei na veika e dau caka me beci kina na Kalou.​—2 Pita 3:14.

[iYaloyalo ena tabana e 30]

E ka vukutaki na noda vola rawa tu e dua na ituvatuva ni ka me caka ena veibulu

[iYaloyalo ena tabana e 31]

Me rawarawa ga qai dokai na nona veibulu e dua na lotu vaKarisito