Taro na Dauwiliwili

E tara beka vua na italatala lotu Vakarisito me vunau ena veibulu i koya e vakamatei koya ga?

Na italatala lotu Vakarisito yadua me na vakatulewa ke donu nona lewaeloma me vunau ena veibulu i koya e rairai vakamatei koya ga. Ni vakatulewa, me na nanuma tiko na veitaro oqo: E raica vakacava o Jiova ni dua e vakamatei koya ga? E nakita beka nona vakamatei koya? E vu beka mai na tauvimate ni vakasama? E raici vakacava nona vakamatei koya ga e dua ena nona yasayasa?

Nida lotu Vakarisito, eda kauai ena rai i Jiova ni dua e vakamatei koya ga. Na bula e ka vakamareqeti qai ka tabu vei Jiova. (Vakatekivu 9:5; Same 36:9) Na nakiti ni nona vakamatei koya e dua e wili vaka laba, e cala ena mata i Jiova. (Lako Yani 20:13; 1 Joni 3:​15) Ena tarova beka na veika oqo na soli ni ivunau ni veibulu i koya e vakamatei koya ga?

Dikeva mada na ka a yaco vei Tui Saula e Isireli. Ni kila ni na sega ni bula ena vala kei ira na kai Filisitia, a sega ni vakalaiva mera tarai koya nona meca, “A sa taura nai seleiwau ko Saula, ka baletaka.” Nira kunea na yagona na kai Filisitia, era vakota sara ena bai ni koro e Peci-sani. Nira kila na lewe i Jepesi-kiliati na ka era cakava na kai Filisitia, era kauta na yagona ra qai vakama. Ia era buluta na suina. Era lolo tale ga me vitu na siga, na ivalavala ni lolosi vei ira na Isireli. (1 Samuela 31:​4, 8-​13; Vakatekivu 50:10) Ni rogoca o Tevita na lumuti i Jiova na ka era cakava na lewe i Jepesi-kiliati, a mani kaya: ‘Me vakalougatataki kemuni o Jiova, ni oni cakava na ka vinaka oqo vua na nomuni turaga, io, vei Saula, ni oni buluti koya. Ia me qai cakava na ka vinaka vei kemuni o Jiova, kei na ka dina.’ (2 Samuela 2:​5, 6) E sega ni kaya na iVolatabu ni cala na ka era cakava na lewe i Jepesi-kiliati ni via vaka toka beka na soqo ni veibulu vei Tui Saula. Vakatauvatana oqori kei ira na sega ni buluti ena vuku ni nodra ivakarau ca. (Jeremaia 25:​32, 33) Na italatala lotu Vakarisito ena rairai dikeva na veika e yaco vei Saula me vakatulewataka kina se rawa ni vunau ena veibulu i koya e vakamatei koya ga.

Ena rairai vinakata tale ga na italatala me kila na inaki ni vunau ni veibulu. Sega ni vakataki ira era vakabauta ni sega ni mate rawa na yalo, era sega ni cakava na veibulu na iVakadinadina i Jiova ena rai cala ni sa na kau o koya e mate ena dua tale na vuravura. Na vunau ni veibulu e sega ni yaga vua e mate, e kena inaki me vakacegui ira na rarawa qai ivakadinadina vei ira na rogoca me baleta na kedra ituvaki na mate. (Dauvunau 9:​5, 10; 2 Korinica 1:​3-5) Dua tale na kena inaki oya me vukei ira kece na vakarorogo mera raica ni lekaleka wale ga na gauna ni bula. (Dauvunau 7:2) Ena rawa beka ni vakilai na inaki oqori ena vunau ni veibulu i koya e vakamatei koya ga?

So beka era na nanuma ni nakita nona vakamatei koya ga, era kaya kina ni sa valavala ca vei Jiova. E rawa beka ni vakadinadinataki na rai vaka oqo? De rairai vure ga mai vakasauri? So era qai veivutuni e muri nira via vakamatei ira ra qai sega tale ni via tovolea. O koya sa mate ena sega ni rawa ni veivutunitaka na ka e cakava.

Dua tale na tikina bibi e kune vei ira e levu era vakamatei ira ga ni vauci tiko kina na leqa ni lomadra se tauvimate ni vakasama. E sega ni rawa ni tukuni ni kena oqo e nakiti. Ena so na itukutuku, e tukuni kina ni 90 na pasede vei ira era vakamatei ira ga e tauvimate nodra vakasama, lomadra, se ra bobula tu ena wainimate gaga. Ena vosoti ira beka o Jiova o ira era vakamatei ira ga ena vuku ni tauvimate ni vakasama? Eda sega ni rawa ni kaya ni o koya e mate e cakava na ivalavala ca e sega ni vosoti rawa ena mata i Jiova. Na italatala lotu Vakarisito ena dikeva na veika a yaco kei na itukutuku vakavuniwai nei koya e mate, ni vakasamataka toka me vunau ena veibulu i koya e vakamatei koya ga.

E tiko tale e dua na tikina me dikevi: Era raica vakacava o ira ena yasayasa oya ni dua e vakamatei koya ga se nodra rai me baleta na mate? Mera qarauna na ka oqo na qase era kauaitaka na irogorogo ni ivavakoso ni iVakadinadina i Jiova ena yasayasa oya. Mai na nodra rai na tiko ena yasayasa oya ni dua e vakamatei koya ga, qai vakauasivi na kena mataqali oqo ni nakiti, era na rairai nanuma na qase mera kua ni tokona na veibulu vaka oqo se me caka ena Kingdom Hall.

Ke kerei e dua na italatala lotu Vakarisito me vunau ena veibulu, ke vakila ni oqo e okati vakatabakidua ga kina o koya, e rawa ni vunau. Ia ke sa vakadonuya, me qarauna me kua ni tukuna ni na vakaturi se sega o koya e mate. O Jiova ga e lewa na nodra bula tale na mate, e sega kina ni rawa vua e dua me kaya ni na vakaturi se sega o koya e mate oqo. Ena kauaitaka ga vakabibi na italatala lotu Vakarisito na ka dina ena iVolatabu qai vakacegui ira na lolosi.