Ena Tawamudu Nodra Vakavinavinaka Vua na Kalou na Yalododonu

‘Ena nanumi tiko ga me tawamudu na tamata dodonu . . . sa sega ni mudu na nona cakacaka dodonu.’​—SAME 112:6, 9.

1. (a) Na bula totoka cava sa waraki ira tu e vakadonuya na Kalou mera yalododonu? (b) Na taro cava ena tarogi?

SA NA bau totoka dina na bula e waraki ira tu na tamata e vakadonuya na Kalou mera yalododonu! Ena sega ni mudu nodra marau nira na vulica e levu tale na ka me baleta na itovo totoka i Jiova. Ena vuabale nodra vakavinavinaka nira vulica e levu tale na ka e bulia na Kalou. E bibi me tiko vei keda na “yalododonu” meda qai rawata kina na veivakalougatataki qori me vaka e vakabibitaki ena Same 112. Ia, e rawa vakacava vei Jiova, na Kalou tabu qai yalododonu, me vakadonui ira na tamata ivalavala ca mera yalododonu? Se mani vakacava noda saga meda cakava na ka e dodonu, eda dau cala ga, so na gauna eda lai tini cala levu sara.​—Roma 3:23; Jeme. 3:2.

2. Vakamacalataka e rua na cakamana a cakava o Jiova e yavutaki ena loloma.

² E vakarautaka mai vakayalololoma o Jiova na kena iwali. E cakava vakacava? Kena imatai, na nona tokia vakacakamana na bula i Luvena mai lomalagi ina katonigone ni dua na goneyalewa, me sucu kina me tamata uasivi. (Luke 1:30-35) Ni oti nodra vakamatei Jisu na nona meca, a cakava tale e dua na cakamana veivakurabuitaki o Jiova. A vakaturi Jisu ina bula lagilagi vakayalo.—1 Pita 3:18.

3. Na cava a marau kina na Kalou me vakalougatataki Luvena ena bula vakayalo i lomalagi?

³ A vakalougatataki Jisu o Jiova ena dua na ka talei a sega ni solia vua ni se bera ni mai bula e vuravura—na bula ena sega ni rusa rawa e lomalagi. (Iper. 7:15-17, 28) A marautaka o Jiova me cakava qo baleta ni a yalodina tiko ga o Jisu ena veivakatovolei dredre sara. Na nona yalodina o Jisu, a rawa kina vei Jiova me vakacala sara ga na veibeitaki i Setani, nira qarava ga na Kalou na tamata baleta nira nanumi ira ga, ra qai sega ni lomani koya dina.​—Vkai. 27:11.

4. (a) Ni lesu i lomalagi o Jisu, na cava a cakava ena vukuda, qai raica vakacava qo o Jiova? (b) Na cava o nanuma ena vuku ni ka rau cakava o Jiova kei Jisu ena vukumu?

⁴ A levu tale na ka e cakava o Jisu ni lesu i lomalagi. A “rairai . . . e na mata ni Kalou e na vukuda” me cabora na yaga ni “nona dra.” E ciqoma ena yalovinaka na Tamada vakalomalagi na isoro talei i Jisu me “bulubulu ni nodai valavala ca.” O koya gona, ni sa ‘vui laivi [“vakasavasavataki,” NW] na noda lewaeloma’ eda na qai “qarava [kina] na Kalou bula.” Qo e vuna vinaka meda duavata kina kei na itekitekivu ni vosa ena Same 112, “Dou vakavinavinaka vei Jiova”!​—Iper. 9:12-14, 24; 1 Joni 2:2.

5. (a) Na cava meda cakava meda yalododonu tiko ga kina vua na Kalou? (b) E tuvai vakacava na Same 111 kei na Same 112?

⁵ Me rawa nida yalododonu tiko ga vei Jiova, e bibi meda vakabauta na dra vakadavei i Jisu. Meda vakavinavinakataki Jiova ena veisiga ena vuku ni nona lomani keda vakalevu. (Joni 3:16) Bibi meda vulica tiko ga na Vosa ni Kalou, da qai gumatua ni muria na veika e volai kina. E volai ena Same 112 na ivakasala vei ira kece na vinakata me savasava tiko ga nodra lewaeloma ena nodra qaravi Kalou. E veisemati vinaka kei na Same 111. Rau tekivu ruarua ena veivakacaucautaki ‘Dou ia vei Jiova na vakavinavinaka’! se “Aleluya!” qai tuvai tarava e 22 na laini, ra tekivu yadua na laini ena 22 na matuavosa ena kena vakadewa taumada vakaIperiu.a

Na Yavu ni Marau

6. E vakalougatataki vakacava na “tamata” e dau rerevaka na Kalou e tukuni tiko ena Same 112?

⁶ “Sa kalougata na tamata sa rerevaki Jiova, o koya sa rekitaka vakalevu na nona vunau. Ena kaukauwa e vuravura na nona kawa: era na kalougata na nodra mataqali na yalododonu.” (Same 112:1, 2) Dikeva ni tukuna na daunisame e dua na “tamata” oti qai tukuna nira sa lewe levu, “nodra mataqali na yalododonu” ena iotioti ni cegu ni tikina 2. E vakaraitaka qo ni Same 112 e rawa ni vakaibalebaletaki ina dua na ilawalawa levu. E uqeti na yapositolo o Paula me vakaibalebaletaka na Same 112:9 vei ira na lotu vaKarisito ena imatai ni senitiuri. (Wilika 2 Korinica 9:8, 9.) E vakamacalataka vinaka na same qo na sala mera marau kina na tisaipeli i Karisito e vuravura ena gauna qo!

7. Na cava mera rerevaka kina na Kalou na nona dauveiqaravi, mo raica vakacava na ivakaro ni Kalou?

⁷ Me vaka e kaya na Same 112:1, era vakalougatataki se marau vakalevu na lotu vaKarisito dina nira dau “rerevaki Jiova.” Na rere vakalou qo eda na sega kina ni vakacudrui koya, ia ena uqeti keda ga meda vorata na yalo ni vuravura e lewa tu o Setani. Era “rekitaka vakalevu” na vulica na Vosa ni Kalou kei na nodra talairawarawa ina nona ivakaro. E okati kina na ivakaro me vunautaki na itukutuku vinaka ni Matanitu ni Kalou e veiyasa i vuravura. Era gumatua gona na tuberi ira tale e so mai na veivanua mera tisaipeli, ra qai vakadreti ira na tamata ca ena siga ni veilewai ni Kalou sa roro voleka tiko mai.​—Isik. 3:17, 18; Maciu 28:19, 20.

8. (a) Era vakalougatataki vakacava ena gauna qo o ira na dauveiqaravi ni Kalou nira gumatua ena cakacaka? (b) Na veivakalougatataki cava sa waraki ira tu na nuitaka na bula e vuravura?

⁸ Nira muria na ivakaro qori, sa lai yacova gona e rauta ni vitu na milioni na dauveiqaravi ni Kalou e vuravura ena gauna qo. Macala ga ni o ira qo era sa “kaukauwa e vuravura.” (Joni 10:16; Vkta. 7:9, 14) Era na qai “kalougata” sara ni sa na vakayacora na nona inaki na Kalou! Era na vakabulai vakailawalawa o ira na nuitaka na bula e vuravura ni sa na carubi na “veivakararawataki levu” me tauyavu kina na “vuravura vou” era na “tiko kina nai valavala dodonu.” Ni toso na gauna, era na qai “kalougata” sara vakalevu o ira na bula yani ena Amaketoni. Era na tu vakarau mera kidavaki ira na vica vata na milioni era na vakaturi mai. Sa dua dina na cakacaka totoka! Ena qai yaco mai na gauna mera na tamata uasivi kina o ira na dau “rekitaka vakalevu” na ivakaro ni Kalou, ra qai marautaka me tawamudu na “galala lagilagi era vakila tu na luve ni Kalou.”​—2 Pita 3:13; Roma 8:21, NW.

Vakayagataka Vakavuku na iYau

9, 10. Era vakayagataka vakacava na lotu vaKarisito dina na nodra iyau vakayalo? Ena “sega ni oti” vakacava na nodra yalododonu?

⁹ “Ai yaya kei nai yau ena tu ga e nona vale: ia na nona cakacaka dodonu ena sega ni oti. Sa cadra na rarama e na butobuto vei ira na yalododonu: sa daulomasoli ko koya, ka yalololoma, ka daucaka dodonu.” (Same 112:3, 4) Ena gauna vakaivolatabu, era kilai e so na dauveiqaravi ni Kalou nira vutuniyau vakayago. Ena yasana adua, era vutuniyau dina o ira e vakadonuya na Kalou, ke ra sega mada ga ni vutuniyau vakayago. E levu era vakatulewataka mera vakamalumalumu vua na Kalou era na rairai dravudravua qai beci, me vaka a laurai ena gauna i Jisu. (Luke 4:18; 7:22; Joni 7:49) Ke levu se lailai na ka e taukena e dua, e se rawa tiko ga ni vutuniyau vakayalo.​—Maciu 6:20; 1 Tim. 6:18, 19; wilika Jemesa 2:5.

¹⁰ Era sega ni bureitaka na nodra iyau vakayalo o ira na lotu vaKarisito lumuti kei na nodra itokani. Kena veibasai ga, era “cadra” ena vuravura butobuto qo e lewa tu o Setani mera “rarama . . . vei ira na yalododonu.” Ra cakava qo ena nodra dusimaki ira tale e so mera taukena na iyau vuni vakayalo, oya na vuku kei na kilaka ni Kalou. Era saga na dauveitusaqati mera tarova na kena kacivaki na itukutuku ni Matanitu ni Kalou ia e matewale nodra sasaga, ni na “sega ni oti” rawa na veika ena vuataka na cakacaka qo. Nira yalodina tiko ga ena gauna ni veivakatovolei, era nuitaka na dauveiqaravi ni Kalou mera na bula tu ga, me “sega ni oti.”

11, 12. Na cava e so na sala era vakayagataka kina na dauveiqaravi ni Kalou na nodra iyau vakayago?

¹¹ Era lomasavu ena vakayagataki ni iyau vakayago o ira na dauveiqaravi ni Kalou—ira na ilawalawa lumuti kei ira na “[i]soqosoqo levu sara.” E tukuni ena Same 112:9: “Sa duibiubiuta ko koya, sa dausoli ka vei ira na dravudravua.” Era dau cautaka na veika e so o ira na lotu vaKarisito dina vei ira na tacidra vakayalo kei na so tale era gadreva tu na veivuke. Ra vakayagataka tale ga na iyau vakayago mera tokona kina na cakacaka ni vakacoko ena gauna ni leqa tubukoso. E vakaraitaka o Jisu nida na marau ke da cakava qo.—Wilika Cakacaka 20:35; 2 Korinica 9:7.

¹² Kena ikuri, vakasamataka mada na ilavo e vakayagataki me tabaki kina na mekesini qo ena 172 na vosa, levu na vosa qo era vosataka o ira na dravudravua. Vakasamataka tale ga, ni sa vakadewataki na mekesini qo ena vica na vosa vagalu, vaka kina ena Braille vei ira na mataboko.

Dau Yalololoma Qai Lewa Dodonu

13. O cei soti e ivakaraitaki uasivi ni solika ena yalololoma, eda na vakamurimuria vakacava nodrau ivakaraitaki?

¹³ “Sa tamata yaco ko koya sa dauyalololoma, ka dausoli ka.” (Same 112:5) O sa na rairai kila nodra sega ni dau yalovinaka e so ena gauna era dau veivuke kina. Eso era solika mera vakaraitaka ni levu na ka era taukena, se ra solika ena voraki. Eda sega ni marau ni solika vei keda o ira na va qori. Ena yasana adua, eda na marautaka nona solika e dua e dauyalololoma. E ivakaraitaki uasivi kina o Jiova ena nona dauyalololoma, qai solika ena marau. (1 Tim. 1:11, NW; Jeme. 1:5, 17) A vakamurimuria vinaka o Jisu Karisito na ivakaraitaki ni yalololoma i Tamana. (Mari. 1:40-42) O koya gona, meda na rawa ni yalododonu tiko ga vua na Kalou, eda na solika ena yalololoma kei na marau, vakauasivi ena cakacaka vakavunau nida tu vakarau na tuberi ira tale e so mera mai kilai Jiova.

14. Sala cava soti eda rawa kina ni ‘dau lewadodonu ena ka’ eda cakava?

¹⁴ “Ena daulewa vakayalomatua [“lewadodonu,” NW]” ena ka e cakava. (Same 112:5) A parofisaitaki ni na qarava na dauniyau yalodina na veika e taukena na nona Turaga, me salavata ga kei na lewadodonu i Jiova. (Wilika Luke 12:42-44, VV.) E laurai qo ena idusidusi vakaivolatabu e vakarautaki vei ira na qase ni ivavakoso mera muria, ena so na gauna era na lewa na kisi ni ivalavala ca bibi ena ivavakoso. Laurai tale ga na lewadodonu ena idusidusi vakaivolatabu e vakarautaka na dauveiqaravi yalodina ena kena cicivaki na ivavakoso kece, vale ni daukaulotu, kei na Peceli. Sega ni vinakati ga na lewadodonu vei ira na qase ni ivavakoso, e vinakati tale ga qori vei ira na lotu vaKarisito kece ena nodra dau veimaliwai vakamataveitacini, nodra veiwekani kei ira na sega ni vakabauta vata, se nodra veika vakabisinisi.​—Wilika Maika 6:8, 11.

Nodra Vakalougatataki na Yalododonu

15, 16. (a) Na cava nodra nanuma na yalododonu ena itukutuku ca ni vuravura qo? (b) Na cava era nakita dei na dauveiqaravi ni Kalou mera cakava tiko ga?

¹⁵ “[E] na sega ni yavavala e na dua na gauna: ena sa nanumi tikoga ka tawa mudu na tamata dodonu. Ena sega ni rerevaka nai rogorogo [“itukutuku,” NW] ca: sa dei na lomana, ni sa vakararavi tiko vei Jiova. Sa dei na lomana, ena sega ni rere, ena raica mada ni ra bale na nona meca.” (Same 112:6-8) Sa qai levu ga na itukutuku ni leqa ena gauna qo ni vakatauvatani kei na veigauna sa oti, okati kina na ivalu, na vakacaca ni batikadi, mate vovou kei na kedra cadra tale mai na mate makawa, basulawa, bula dravudravua, kei na vakacacani ni veika bula. O ira na vakadonuya na Kalou nira dau caka dodonu era rarawataka tale ga na itukutuku ca qo, ia era sega ni soro koso. E “dei” tu ga na lomadra nira vakanamata ina veisiga e se bera mai, nira kila sa voleka mai na vuravura vou ni yalododonu ni Kalou. Ke ra mani sotava na leqa, era na rawa ni vosota na ituvaki ya baleta nira vakararavi vei Jiova me tokoni ira. Ena vakayaloqaqataki ira qai dusimaki ira na yalododonu mera kua ni ‘yavalati’—mera vosota tiko kina ga kina.—Fpai. 4:13.

¹⁶ Era vosota tale ga na dauveiqaravi yalododonu ni Kalou na veicati kei na lasu ra vakatetea na dauveitusaqati, ia ra sega ni soro kina na lotu vaKarisito dina, ena matewale nodra sasaga. Ia, era dei tiko ga na dauveiqaravi ni Kalou mera cakava na cakacaka e lesia vei ira o Jiova—kena vunautaki na itukutuku vinaka ni Matanitu ni Kalou kei na nodra tuberi na tataleitaki mera tisaipeli. Sega ni vakabekataki ni na levu sara na veitusaqati ni sa roro voleka mai na icavacava. Ena qai levu duadua ena gauna sa na yavala kina o Setani na Tevoro me vakacaca e vuravura raraba, e vakatokai o koya me Koki mai Mekoki. Oti, eda na qai ‘raica na noda meca’ nira vakadrukai vakamadua. Sa na totoka dina meda raica na kena vakacerecerei na yaca i Jiova!​—Isik. 38:18, 22, 23.

“Ena Vue na Nona Totoka”

17. Era na “totoka ka na dokai” vakacava o ira na yalododonu?

¹⁷ Ena ka marautaki dina meda vakavinavinakataki Jiova ena duavata, sa na sega tale ni tusaqati keda na Tevoro kei na nona vuravura! Qo na ka era na marautaka o ira kece era yalododonu tiko ga vua na Kalou. Era na sega ni druka se vakalolomataki, ni yalataka sara ga o Jiova ni o ira na nona yalododonu ‘ena vue na nodra totoka, ra qai dokai.’ (Same 112:9) Era na marau o ira na yalododonu i Jiova nira raica nodra druka na meca kece ni sa veiliutaki o koya.

18. Ena vakayacori vakacava na iotioti ni tikina ena Same 112?

¹⁸ “Ena raica ko koya na tamata ca, ka na cudru kina; ena vakasequruquru bati, ka na waicala yani ko koya: na ka era gadreva nai valavala ca ena sega ni yaco.” (Same 112:10) O ira kece era saqati ira tiko ga na dauveiqaravi ni Kalou era na “waicala yani” ena nodra vuvu kei na nodra veicati. Nodra vinakata me muduki noda cakacaka ena sega ni yaco nira na vakarusai ena “veivakararawataki levu” sa roro voleka mai qo.​—Maciu 24:21, NW.

19. Na cava eda nuitaka ena yalodei ni na yaco?

¹⁹ O na dua beka vei ira na bula mo raica tale ga na qaqa vakairogorogo oya? Vakacava ke sa mani rawai iko na tauvimate se na bula vaqase ni bera ni vakarusai na vuravura i Setani, o na dua beka vei ira na “yalododonu” era na vakaturi mai? (Caka. 24:15) O na rawa ni vakaio ena taro qo ke o vakabauta na isoro ni veivoli i Jisu qai vakamurimuri Jiova, me vakataki koya ga na “tamata” yalododonu ena Same 112. (Wilika Efeso 5:1, 2.) Ena raica o Jiova mera na “nanumi” tu ga o ira qo, vaka kina na nodra ivalavala dodonu. Ena nanumi ira qai lomani ira me tawamudu.​—Same 112:3, 6, 9.

[iVakamacala e ra]

Taro me Vakananumi

• Na cava e so na vuna meda tukuna kina “Aleluya”?

• Na cava e yaco tiko ena gauna qo era marautaka na lotu vaKarisito dina?

• Na dau solika vakacava e marautaka o Jiova?

[iYaloyalo ena tabana e 25]

Me vakadonui keda tiko ga na Kalou nida yalododonu, e bibi meda vakabauta na dra vakadavei i Jisu

[iYaloyalo ena tabana e 26]

Na cau e sega ni lavaki e tokona na cakacaka ni vakacoko kei na veisoliyaki ni ivola vakaivolatabu