iSau ni Va na Taro me Baleta na iCavacava

A PAROFISAITAKA o Jisu Karisito ni na ‘yaco na icavacava’ ena dua na gauna mai muri. A kaya me baleta na gauna oya: “[E]na qai yaco na veivakararawataki levu ena ivakatagedegede e sega ni bau vakilai me tekivu mai na buli ni vuravura me yacova mai qo, ena sega tale ni qai yaco e muri.”​—Maciu 24:​14, 21.

Na ka e tukuna o Jisu me baleta na icavacava kei na so tale na kena tikinivolatabu e vakavurea eso na taro bibi. Yalovinaka cega nomu iVolatabu mo wilika kina na kena isau.

1 Na Cava ena Vakarusai?

E sega ni vakavuvulitaka na iVolatabu ni na vakarusai na vuravura. A vola na daunisame: “Sa vakataudeitaki vuravura ko koya [Kalou] e na kena yavu, me kakua ni yavala rawa ka sega ni mudu.” (Same 104:5) E sega tale ga ni kaya na iVolatabu ni na qeavu na vuravura ena dua na kama ena tarai vuravura raraba. (Aisea 45:18) A tukuna mada ga o Jisu nira na bula eso ena icavacava. (Maciu 24:​21, 22) Na cava ga e tukuna na iVolatabu ni na vakarusai?

Ena vakarusai na matanitu vakatamata e guce tiko ga na kena veiliutaki. A uqeti vakalou na parofita o Taniela me vola: “Ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”​—Taniela 2:44.

Ena vakaoti na ivalu kei na vagagai ni veika bula. E tukuna na Same 46:9 me baleta na ka ena cakava na Kalou: “Sa vakaotia nai valu mai nai yalayala kei vuravura: sa musuka na dakai titi ko koya, ka tayamusuka na moto, ka sa vakama na qiqi-ni-valu e na buka waqa.” E kaya tale ga na iVolatabu ni na ‘vakawabokotaki ira na vakarusai vuravura tiko’ na Kalou.​—Vakatakila 11:18.

Ena oti na basulawa kei na ivalavala tawadodonu. E yalataki ena iVolatabu: “[E]ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.”a​—Vosa Vakaibalebale 2:​21, 22.

2 Ena Yaco Ninaica na iCavacava?

Sa tiko na “gauna lokuci” i Jiova me muduka kina na ca, me veiliutaki tale ga na nona Matanitu e vuravura taucoko. (Marika 13:33) Ia e vakamatatataka na iVolatabu nida sega ni kila na tikinisiga ena yaco kina na icavacava. A kaya o Jisu: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” (Maciu 24:36) Ia a tukuna o Jisu kei ratou na nona tisaipeli na veika ena yaco tiko e vuravura ni bera na icavacava. Ni tarai vuravura na ka kece qori ena dua ga na gauna, kena ibalebale sa voleka na icavacava.

Se sega ni bau yaco e liu na veiveisau lelevu vakapolitiki sa yaco tu nikua, na veiveisau e tara na bula ni kawatamata kei na veika bula. Ni sauma o Jisu na nodratou taro na tisaipeli me baleta na icavacava, a kaya: “Era na veivaluvaluti na veivanua kei na veimatanitu, ena yaco na uneune ena levu na vanua, ena vakilai tale ga na leqa ni kakana. Qo era itekitekivu ga ni veika rarawa.” (Marika 13:8) A vola na yapositolo o Paula: “[E]na iotioti ni veisiga, ena vakilai kina e levu na ka dredre. Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, era na dau vosavakacaca, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakaucaca, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veinakicataki, era na domoqa, era na dokadoka, era na lomana ga na marau era sega ni lomana na Kalou.”​—2 Timoci 3:​1-5.

Sa caka tiko e vuravura raraba na vunau ena duidui vosa. A kaya o Jisu: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”​—Maciu 24:14.

3 Na Cava ena Yaco ni Oti na iCavacava?

E sega ni tukuna na iVolatabu nira na kau na tamata vinaka kece mera lai bula tawamudu e lomalagi. Ia a vakavuvulitaka ga o Jisu ni na vakayacori na inaki taumada ni Kalou me baleti keda. A kaya: “Era marau na yalomalua, nira na taukena na vuravura.” (Maciu 5:5; 6:​9, 10) O ira na mate ni bera na icavacava, e yalataka na iVolatabu ni na caka na veivakaturi ena dua na gauna mai muri. (Jope 14:​14, 15; Joni 5:​28, 29) Na cava ena yaco ni oti na icavacava?

Ena veiliutaki vakatui mai lomalagi o Jisu ena Matanitu ni Kalou. A vola na parofita o Taniela: “Au a vakaraica e na raivotu ni bogi, ka raica, sa lako mai e na o kei lomalagi e dua sa vaka e dua na Luve ni tamata [Jisu ni vakaturi oti] ka sa lako mai vei koya sa dede sara na nona bula [Kalou o Jiova], ka ra sa kauti koya sara vua. A sa soli vua [Jisu] na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa; a nona lewa na lewa sa sega ni mudu, ena sega ni takali, kei na nona matanitu ena sega ni vakarusai.”​—Taniela 7:​13, 14; Luke 1:​31, 32; Joni 3:​13-16.

O ira e vuravura era vakamalumalumu ina veiliutaki ni Matanitu ni Kalou era na bula uasivi, ra bula vakacegu, ra bula tawamudu tale ga. A vola na parofita o Aisea: “A ra na tara vale, ka tiko kina; era na tea eso na were-ni-vaini, ka kania na vuana, era na sega ni tara, ka tiko kina na tamata tani, era na sega ni tea, ka kania na tamata tani.” (Aisea 65:​21-23) Na yapositolo o Joni a vola tale ga me baleta na gauna oya: “Raica! E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”​—Vakatakila 21:​3, 4.

4 Na Cava mo Cakava mo Bula ena iCavacava?

E tukuna na yapositolo o Pita nira na veivakalialiai eso ena iotioti ni veisiga ni tukuni ena muduka na Kalou na veiliutaki ni tamata kei na ca e vuravura. (2 Pita 3:​3, 4) Ke va mada ga qori nodra rai eso, e veiuqeti o Pita meda cakava eso na ka e volai toka qo e ra.

Vuli ena ka sa yaco oti. A vola o Pita ni Kalou a “sega tale ga ni tuvakasuka me totogitaka na vuravura makawa, ia e maroroi Noa, e dauvunautaka na ka dodonu, kei na vitu tale ena gauna e luvuca kina na vuravura e sega ni doka na Kalou.” (2 Pita 2:5) A tomana o Pita me baleti ira na dauveivakasewasewani: “Era nakita mera lecava na tikina qo, ni vosa ga ni Kalou e tiko kina na lomalagi ni gauna makawa, e votu mai wai na qele mamaca, ena maliwa tale ga ni wai, ena vuku gona ni ka kece qo e vakarusai kina na vuravura ena gauna ya ni luvuci ena wai. Ia ena vosa vata ga ya e maroroi kina na lomalagi kei na vuravurab ni gauna qo me qai vakamai, e vakalaivi tale ga me yacova na siga ni lewa mera vakarusai kina o ira na sega ni doka na Kalou.”​—2 Pita 3:​5-7.

Muria na ivakatagedegede ni Kalou e vauca na itovo. A vola o Pita ni o ira na via bula ena icavacava era na ‘yalosavasava ra qarava tale ga na Kalou.’ (2 Pita 3:11) Nanuma tiko ni vakabibitaka o Pita na “yalosavasava” kei na ‘qarava na Kalou.’ E sega gona ni veirauti mo tukuna wale ga ni o vakabauta, mo qai saga tale ga mo veiwekani kei na Kalou ni sa voleka na icavacava mo rawa ni bula.

Na ivalavala vakacava sara mada e vakadonuya na Kalou? E vinaka mo veidutaitaka na ka o kila me baleta na ivalavala qori kei na ka e kaya na iVolatabu. Era na marau na iVakadinadina i Jiova mera vukei iko. Kerea mera vakaraitaka vei iko ena nomu iVolatabu na yavu ni nodra ivakamacala. Ni o cakava qori, se mani vakacava na levu ni ka veivakarerei e wavoliti keda tu, o na yaloqaqa tiko ga, qai dei nomu vakanuinui ina gauna se bera mai.

[iVakamacala e ra]

[Tikina bibi ena tabana e 7]

Ena sega ni vakarusai na vuravura, o ira ga era vakarusai vuravura tiko era vakawabokotaki