Taro na Dauwiliwili . . .

Era na kila na Kalou na tamata kece, e sega ni dua e vakuai?

▪ Ni tarogi o Jisu se cava na vunau levu duadua, a tukuna: “Mo lomani Jiova na nomu Kalou ena lomamu taucoko, ena nomu bula taucoko, kei na nomu vakasama taucoko.” (Maciu 22:37) Ia me kila na Kalou e dua, e bibi me vulica na veika me baleti koya. (Joni 17:3) Era na kila na Kalou na tamata kece, e sega ni dua e vakuai?

Na iVolatabu e ivukevuke uasivi meda kila kina na Kalou. (2 Timoci 3:16) E levu era tu ena vanua e tu vakarawarawa kina na iVolatabu, era na rairai sureti wasoma tale ga mera vulica na ka dina me baleta na Kalou ena iVolatabu. (Maciu 28:19) Eso tale era tuberi ena vuvale vaKarisito era vakavulici ira e veisiga na nodra itubutubu mera kila na Kalou.​—Vakarua 6:​6, 7; Efeso 6:4.

Eso era kalouca ni voravora na bula e vale ni sega kina na loloma vakaitubutubu. (2 Timoci 3:​1-5) O ira na susugi ena ituvaki va qori ena rairai dredre mera kila ni Kalou dauloloma na Tamada vakalomalagi. E levu e dredre nodra wili iVolatabu nira sega ni vuli vinaka. Ia e tiko tale eso era vakamatabokotaki tu ena ivakavuvuli lasu vakalotu, se ra lewenivuvale, itikotiko, se matanitu e sega ni vakatarai kina na vulici ni ka dina ena iVolatabu. (2 Korinica 4:4) Ena rawa vei ira mera kila na Kalou mera lomani koya tale ga?

A tukuna o Jisu ni na tiko eso na ka ena vakadredretaka vei ira eso mera lomana na Kalou ra qai talairawarawa vua. (Maciu 19:​23, 24) Ia e vakadreti ira na nona tisaipeli o Jisu se mani dredre vakacava e dua na ka vua na tamata e “rawarawa vua na Kalou na ka kece.”​—Maciu 19:​25, 26.

Vakasamataka mada qo: E raica na Kalou o Jiova me ivola veisoliyaki vakalevu duadua e veiyasai vuravura na nona Vosa na iVolatabu. E tukuna na iVolatabu ni na vunautaki “ena veiyasa i vuravura” na itukutuku vinaka me baleta na Kalou kei na nona inaki me baleti vuravura. (Maciu 24:14) Nikua era vunautaka ena sivia na 230 na vanua na iVakadinadina i Jiova na itukutuku vinaka qai tabaka na ivola vakaivolatabu ena sivia na 500 na vosa. O ira mada ga e sega na nodra iVolatabu era vulica e levu na ka me baleta na Kalou nira dikeva na veika e bulia.​—Roma 1:20.

E tukuna tale ga na Vosa ni Kalou: “Sa vakatovolea na yalo kece ko Jiova, ka kila kece na nanuma ni lomada: kevaka ko na vakasaqarai koya, ko na kunei koya.” (1 Veigauna 28:9) E sega ni yalataka gona o Jiova ni na tautauvata na ituvaki kei na gauna ena vulica kina e dua na veika me baleti koya. Ia e vakadeitaka ni na tiko ga na gauna era na kilai koya kina na yalomalumalumu. O ira mada ga na se sega ni kilai koya, ena solia vei ira na gauna mera vulica na veika me baleti koya ena gauna era vakaturi kina ena vuravura vou ni yalododonu.​—Cakacaka 24:15.