Na Vuna Meda Dau Totolo Kina

E SEGA ni ka rawarawa na dau totolo se yaco ena kena gauna. Eso na ka e dau vakaleqa na noda totolo, oya na yawa ni vanua meda lakova, na osooso ni gaunisala, kei na osooso. Ia e bibi na dau totolo. Me kena ivakaraitaki ena vanua ni cakacaka, o koya na dau totolo yani e kilai ni dau nuitaki qai dau cakacaka. Ena yasana adua, o koya e dau bera ena vakaleqa na nodra cakacaka tale na so, na ka e rawati mai na cakacaka kei na veiqaravi. Ena calata na gonevuli eso na nona kalasi ke dau bera qai vakaleqa tale ga na nona toso ena ka ni vuli. Ke da berata na gauna meda qaravi kina vakavuniwai se na vanua ni veicavubati, qo ena rawa ni vakaleqa na noda qaravi.

Ena so na vanua e sega soti ni dau raici vakabibi na totolo. Na vanua va qo ena rawa ni vakamatauni kina na bera. Ke yaco oya, e bibi meda dau saga meda yaco totolo. Nida kila na bibi ni totolo, ena uqeti keda qo meda kua ni dau bera. Na cava soti na vuna meda dau totolo kina? Eda na dau totolo vakacava? Na cava na kena yaga nida dau yaco yani ena gauna donu?

O Jiova—Na Kalou ni Gauna

Na vuna bibi eda dau via totolo kina, oya na noda via vakatotomuria na Kalou eda qarava. (Efeso 5:1) O Jiova na ivakaraitaki vinaka duadua ni nona dau raica vakabibi na gauna. E sega vakadua ni bera. E dina tu ga ina gauna e sa tuvanaka oti tu me vakayacori kina na nona inaki. Me kena ivakaraitaki, ena gauna a vakatulewataka kina o Jiova me vakarusa na vuravura tawavakalou ena dua na waluvu, a kaya vei Noa: “Mo taya e dua na nomu waqa e na kau kofera.” Ni sa voleka na gauna me tinia kina na ituvaki oya, sa qai tukuna vei Noa o Jiova me vodo i waqa qai vakarota vua: “Ni sa vo walega e vitu na bogi, ka’u na qai vakatauca tiko na uca ki vuravura me vasagavulu na siga ka vasagavulu na bogi; ia ka’u na vakawabokotaka e vuravura na ka bula kecega ka’u a bulia.” Ena kena gauna donu ni ‘sa bogi vitu, sa qai yaco na waluvu i vuravura.’ (Vkte. 6:14; 7:4, 10) Vakasamataka mada na ka e rawa ni yaco vei Noa kei na nona vuvale ke ratou a sega ni vodo ena waqa ena kena gauna. Me vaka ga na Kalou eratou qarava, ena vinakati tale ga me ratou totolo.

Ni oti e 450 na yabaki ni yaco na Waluvu, a tukuna o Jiova vua na peteriaki o Eparama ni na dua na luvena tagane ena basika mai kina na Kawa yalataki. (Vkte. 17:15-17) E kaya na Kalou ni na sucu o Aisake “e na kena gauna e na yabaki sa muri mai.” A qai yaco dina? E tukuna vei keda na iVolatabu: “Sa kunekune ko Sera, ka vakasucuma vei Eparaama e dua na luvena tagane ni sa qase mai ko koya, e na gauna ka loku, ka sa vosa kina vua na Kalou.”—Vkte. 17:21; 21:2.

E vutucoqa ena iVolatabu na ivakaraitaki ni nona dau raica vakabibi na Kalou na gauna. (Jere. 25:11-13; Tani. 4:20-25; 9:25) E tukuna vei keda meda namaka na nona siga ni veilewai o Jiova sa tu qo e matada. Mai na rai vakatamata ke mani “berabera,” e vakadeitaki vei keda “ena sega ni berabera sara.”—Apak. 2:3.

E Bibi na Yaco Totolo ena Sokalou

E vinakati mera tiko kece ena kena gauna na tagane e Isireli ena vanua sa lesi tu me caka kina “na so levu i Jiova.” (Vunau 23:2, 4) E lewa tale ga na Kalou na gauna mera cabori kina na veimataqali isoro. (Lako 29:38, 39; Vunau 23:37, 38) E dusia qo ni vinakata na Kalou mera dau yaco totolo na nona dauveiqaravi ena nodra sokalou.

Ena imatai ni senitiuri, ni vakaroti ira mai Korinica na yapositolo o Paula me baleta na ivalavala e dodonu me vakayacori kina na soqoni vaKarisito, a uqeti ira: “Na ka kece e caka me rakorako, me tuvanaki tale ga vakamatau.” (1 Kor. 14:40) O koya gona me tekivu ena kena gauna lokuci na sokalou ena soqoni vaKarisito. E se sega ni veisau na nona rai o Jiova me baleta na kena caka na ka ena kena gauna. (Mala. 3:6) Na cava gona meda cakava meda dau totolo kina ena soqoni vaKarisito?

Na Sala mo na Dau Totolo Kina

Era raica eso ni veivuke vakalevu na nodra dau navuca e liu na ka. (Vkai. 21:5) Me kena ivakaraitaki, ke yawa na vanua meda lakova meda yaco yani ena kena gauna lokuci, ena ka vakayalomatua beka meda biubiu ena gauna sara ga eda rawa ni bera kina? E sega li ni ka vakayalomatua meda biubiu ni se vo levu na gauna meda kua kina ni bera, ke mani yaco sara mada ga na “veika tawanamaki” ena noda ilakolako? (Dauv. 9:11, NW) E kaya o Joséa e dua na cauravou e dau totolo, “mo rawa ni yaco totolo, mo kila vinaka na levu ni gauna e kovuta na vanua mo gole kina.”

Ena gadrevi vei ira eso mera tuvanaka na gauna mera biubiu totolo kina mai na vanua ni cakacaka mera yaco totolo ena vanua ni soqoni vaKarisito. E cakava qo e dua na iVakadinadina mai Iciopea. A kila o koya ni na yaco bera yani ena 45 na miniti ena soqoni vaKarisito, ni dau veiveisau na nona gauna ni cakacaka. A tuvanaka me dau mai sosomitaki koya ni yaco totolo yani e dua rau cakacaka vata, me rawa ni yaco totolo kina ena bogi ni soqoni. Ia a qai vakadonuya na iVakadinadina me cakacaka tale ena vitu na aua me sosomitaki koya rau cakacaka vata.

Ke da vakaluveni lalai, e dua na ka dredre na noda dau yaco totolo ena soqoni. E dau nona itavi o tina me vakarautaki ira na gone, ia e dodonu qai rawa tale ga nira veivuke na vo ni lewenivuvale. E dua na tina mai Mexico o Esperanza, a susuga duadua e walu na gone. E tiko na nodratou yabaki ni bula ena gauna qo mai na 5 ina 23. E vakamacalataka o Esperanza na ka eratou dau cakava me ratou dau totolo kina: “Eratou dau veivuke na luvequ yalewa eratou qase cake ena nodratou vakarautaki na gone. Qo e rawa kina vei au meu vakaotia na noqu cakacaka ni vale meu vakarautaki au tale ga me keitou gole ina soqoni ena gauna keitou sa dau tuvanaka oti tu.” Sa tiko ga na gauna me ratou dau biubiu kina e vale na vuvale qo, ra qai veitokoni kina na vo ni lewenivuvale.

Na Yaga ni Totolo ina Soqoni vaKarisito

Nida vakasamataka na ka ni veivakalougatataki nida yaco totolo ena soqoni vaKarisito, ena rawa ni uqeti keda qo da qai vinakata meda saga meda kua ni bera. O Sandra e dua na goneyalewa e dau vakamatauni koya me totolo ina soqoni e kaya: “Na ka au taleitaka niu dau totolo yani, oya niu rawa ni sota kei ira na taciqu, veitalanoa kei ira, au kilai ira vinaka tale ga.” Ke da totolo ina Kingdom Hall, ena rawa ni yaga nida rogoca na nodra vosota kei na nodra veiqaravi ena yalodina o ira na tiko kina. Na noda tiko tale ga kina qai veitaraicake na noda veitalanoa, ena yaga tale ga vei ira na tacida, ‘nida veivakauqeti, meda veilomani, da qai caka vinaka tale ga.’—Iper. 10:24, 25.

E bibi tale ga ina noda sokalou na kena tekivutaki ena sere kei na masu na noda soqoni vaKarisito. (Same 149:1) E vakavinavinakataki o Jiova ena noda sere, eda nanuma kina na itovo meda vakaitovotaka, qai uqeti keda meda marautaka na noda cakacaka vakaitalatala. Vakacava na kena tekivutaki ena masu? Ena gauna makawa e vakatoka o Jiova na nona valenisoro me “vale ni masu.” (Aisea 56:7) Nikua, eda masu vua na Kalou ena noda soqoni. Na kena tekivutaki ena masu e kerei kina na nona veidusimaki o Jiova kei na nona yalo tabu, e vakarautaka tale ga na noda vakasama kei na lomada ena itukutuku ena veivosakitaki. Meda vakadeitaka mada ga meda yaco totolo yani ena soqoni ena kena tekivutaki ena sere kei na masu.

Na nona vakamacalataka na vu ni nona dau totolo ina soqoni, e kaya o Helen e yabaki 23: “Au vakasamataka ni qo na sala au vakaraitaka kina na noqu lomani Jiova, o koya ga e vakarautaka na ka kece e rogoci ena soqoni, wili kina na sere kei na kena tekivutaki ena masu.” Sega beka ni dodonu me va tale ga oya na noda rai? Io, e dodonu me va ya. O koya gona, meda saga kece meda vakamatauna na dau totolo ena kena gauna ena ka kece eda cakava, vakauasivi ena ka e vauca na noda qarava na Kalou dina.

[iVakamacala e ra]

[iYaloyalo ena tabana e 26]

Vakavakarau rawa

[iYaloyalo ena tabana e 26]

Biuta toka na gauna ni “veika tawanamaki”

[iYaloyalo ena tabana e 26]

Ena yaga na dau yaco totolo ina soqoni