O Dau Liu Mo Rokovi Ira Eda Vakabauta Vata?

‘Ni veilomani ena veilomani ni veitacini. Ni dau liu ena nomuni veirokorokovi.’​—ROMA 12:10.

1, 2. (a) Na cava e vakabibitaka o Paula ena nona ivola vei ira e Roma? (b) Na taro cava soti eda na veivosakitaka?

E VAKABIBITAKA na yapositolo o Paula ena nona ivola vei ira e Roma, meda dau veilomani na lotu vaKarisito ena ivavakoso. E tukuna me “kua ni veivakaisini” na noda loloma. E vakamacalataka tale ga ni “veilomani” qori me vaka sara ga na “veilomani ni veitacini.”​—Roma 12:​9, 10a.

² E sega ni okati ga ena veilomani vakaveitacini na noda veikauaitaki, e vinakati me laurai sara ga qori ena ka eda cakava. Ena sega ni kilai na noda loloma kei na noda kauai vakavo ke da vakaraitaka ena ka eda cakava. E kuria na nona veiuqeti o Paula: ‘Ni dau liu ena nomuni veirokorokovi.’ (Roma 12:10b) Na cava e okati ena noda veirokorokovi? Na cava e bibi kina meda liu ni rokovi ira na tacida eda vakabauta vata? Eda na cakava vakacava qori?

Veidokai kei na Veirokovi

3. Na cava na ibalebale ni vosa “rokovi” ena vosa a volai taumada kina na iVolatabu?

³ Na yavu ni vosa vakaIperiu ni “rokovi” e kena ibalebale “bibi.” E dau rokovi gona e dua e rogo se tiko na kena yaga. Na vosa vakaIperiu ga qori e dau vakadewataki ena iVolatabu me “lagilagi,” qo e vakaraitaka ni raici cake o koya e rokovi. (Vkte. 45:13) Na vosa vaKirisi e vakadewataki ena iVolatabu me “rokovi” e dusia e dua e dokai, e yaga se mareqeti. (Luke 14:10) Io, era vakamareqeti o ira eda rokova, e tiko tale ga na kedra yaga.

4, 5. Erau veiwekani vakacava na veirokovi kei na veidokai? Vakatauvatana.

⁴ Na cava e okati ena noda veirokorokovi? E tekivu ena veidokai na veirokorokovi. E dau vakayagataki vata na vosa “rokova” kei na “doka” ni rau vosa veiwekani ga. Nida rokova e dua, eda na vakaraitaka se na laurai sara ga ena ka eda cakava nida dokai koya. Dua tale na kena itukutukuni, na veidokai e dusia ga vakalevu na noda ivakarau ni rai me baleti ira na tacida, ia na veirokovi e dusia na noda ivalavala vei ira.

⁵ Ena dredre me rokova dina na tacina vakayalo e dua na lotu vaKarisito ke sega ni dokai koya mai vu ni lomana. (3 Joni 9, 10) Na veirokovi e vaka ga e dua na kau. Ke ti na wakana ena qele vinaka, ena tubu bulabula qai sega ni malai na kau qori. Ke sega tale ga ni vu mai lomada na noda veidokai, ena veivakaisini na noda veirokovi, sega ga ni dede sa na seavu. Sa rauta me vakamatatataka o Paula ni bera ni veivakasalataki ena veirokovi: “Me kua ni veivakaisini na nomuni loloma.”​—Roma 12:9; wilika 1 Pita 1:22.

Rokovi Ira Era Buli Mera “Ucuya na Kalou”

6, 7. Na cava meda dokai ira kina eso tale?

⁶ E yaga ena noda veirokovi na noda veidokai mai vu ni lomada, meda kua gona ni guilecava na vuna vakaivolatabu meda dokai ira kece kina na tacida vakayalo. Meda raica mada qo e rua na vuna.

⁷ E sega tale ni dua na kabula e vuravura e tautauvata kei keda na tamata nida buli meda “ucuya na Kalou.” (Jeme. 3:9) Eda rawa gona ni vakaraitaka na itovo vakalou me vaka na loloma, vuku kei na lewa dodonu. Dikeva e dua tale na ka e cakava ena vukuda na Dauveibuli. E tukuna na daunisame: “I Jiova . . . , o ni sa vakaraitaka na nomuni lagilagi mai lomalagi ecake. . . . O ni sa buli koya [na tamata] me uasivi sobu vakalailai vei ira na agilose, ka vakaisalataka e nai ukuuku kei na vakarokoroko.” (Same 8:​1, 4, 5; 104:1)a E laurai ena so na ka e cakava o Jiova ni doka, e rokova na kawatamata kece. Nida doka gona e dua tale, eda sa vakaraitaka sara tiko ga ni o Jiova e vu ni noda veidokai. Ke da kila gona ni dodonu meda doka na tamata kece, sa qai wacava na kena bibi meda dokai ira na tacida vakayalo!​—Joni 3:16; Kala. 6:10.

Eda Dua ga na Vuvale

8, 9. Na cava na vuna e tukuna kina o Paula meda dokai ira eda vakabauta vata?

⁸ E cavuta o Paula e dua tale na vuna meda veidokai kina. Ni bera ni veiuqeti ena veirokovi, a kaya: “Ni veilomani ena veilomani ni veitacini.” Na matavosa vaKirisi e vakadewataki me “veilomani ni veitacini” e dusia na veivolekati e vakaduavatataka na vuvale era veilomani ra qai dau veitokoni na lewena. Koya gona, e vakabibitaka o Paula me va tale ga qori na noda veiwekani na lewe ni ivavakoso, meda veilomani da qai veivolekati me vaka ga e dua na vuvale. (Roma 12:5) Meda nanuma tiko ni vola na vosa qori o Paula vei ira na lotu vaKarisito lumuti, era ciqomi kece mera luvei Jiova na Tamadra. Dua na ka bibi era kilai kina o ira qo, nira lewe ni dua na vuvale era veivolekati sara. Koya gona, e tiko na vuna vinaka mera dau veidokai kina na lotu vaKarisito lumuti ena gauna i Paula. E dina tale ga qori me baleti ira na lumuti ena gauna qo.

⁹ Vakacava ga o ira na ‘so tale na sipi’? (Joni 10:16) Era se sega ni wili mera luve ni Kalou, e veiganiti kina mera dau veikacivi ena taciqu kei na ganequ nira dua ga na vuvale lotu vaKarisito e vuravura raraba. (1 Pita 2:17; 5:9) Ke ra kila vinaka na so tale na sipi na ibalebale ni nodra dau cavuta “ganequ” se “taciqu,” e tiko tale ga na vuna vinaka me vu kina mai lomadra na nodra dokai ira era vakabauta vata.​—Wilika 1 Pita 3:8.

Na Cava e Bibi Kina na Veirokovi?

10, 11. Na cava e bibi kina na veidokai kei na veirokovi?

¹⁰ Na cava e bibi kina na veidokai kei na veirokovi? Qo na vuna: Na noda rokovi ira na tacida vakayalo e vakaraitaka nida vinakata dina meda marau da qai duavata na lewe kece ni ivavakoso.

¹¹ Eda vakaukauataki vakalevu duadua na lotu vaKarisito dina ena noda veiwekani voleka kei Jiova, kei na veidusimaki ni yalona tabu. (Same 36:7; Joni 14:26) Ena gauna vata qori, eda vakayaloqaqataki nida kila nira mareqeti keda o ira eda vakabauta vata. (Vkai. 25:11) E dau vakayaloqaqataki keda na nona dokai keda e dua ena ka e tukuna se cakava. E vakaukauataki keda tale meda muria tiko ga na sala e basika ina bula. De dua o dau vakila tale ga qori.

12. Na cava meda cakava kece meda veivolekati da qai veilomani kina vakamataveitacini?

¹² Ni kila o Jiova nida sucu kaya mai na noda vinakata meda dokai, e donu vinaka kina na nona uqeti keda ena nona Vosa “meda dau vakaliuliu ni veidokai.” (Roma 12:​10, Today’s English Version; wilika Maciu 7:12.) Nida muria na ivakasala veiganiti oya na lotu vaKarisito kece, eda na veivolekati da qai veilomani vakamataveitacini. Koya gona e dodonu meda dui taroga, ‘Na gauna cava sara mada au a vakaraitaka kina ena ka au cakava kei na ka au tukuna ni vu mai lomaqu na noqu dokai ganequ se taciqu vakayalo?’​—Roma 13:8.

Noda iTavi Yadua Meda Veirokovi

13. (a) O cei e dodonu me liu ena veirokovi? (b) Na cava e vakaraitaka na vosa i Paula ena Roma 1:7?

¹³ O cei e dodonu me liu ena veirokovi? Ena ivola i Paula vei ira na Iperiu, e vakamacalataka kina nira ‘liutaki keda tiko’ na qase ni ivavakoso. (Iper. 13:17) Era dau liutaka gona na qase na qaravi ni levu na itavi. Ia nira ivakatawa ni qelenisipi, ena vinakati mera liu ena nodra rokovi ira era vakabauta vata​—wili kina na nodra itokani qase ni ivavakoso. Me kena ivakaraitaki, nira dau sota mera bosea na qase na veika vakayalo e gadrevi ena ivavakoso, era na veirokovi nira vakarorogo vinaka ni vakamacala e dua tale na qase. Era na veirokovi tale ga nira kauaitaka na nodra rai kei na ka era tukuna na vo ni qase nira vakatulewa. (Caka. 15:​6-15) Meda nanuma tiko ni sega ni baleti ira ga na qase na ivola i Paula vei ira e Roma, a volavola tiko vei ira kece na lewe ni ivavakoso. (Roma 1:7) Koya gona, na ivakasala meda dau liu ena veirokovi e baleti keda kece ena gauna qo.

14. (a) Erau duidui vakacava na noda dau veirokovi kei na noda dau liu ena veirokovi? Vakatauvatana. (b) Na taro cava e vinaka meda dui liaci keda kina?

¹⁴ Raica mada na ivakasala i Paula ena dua tale na yasana qo. E sega ni uqeti ira wale ga na nona itokani vakabauta vata mai Roma mera dau veirokovi, ia mera dau liu ena veirokovi. Na cava e veiganiti kina oya? Vakasamataka mada na ivakaraitaki qo. Ena veiuqeti o qasenivuli mera vulica na wilivola o ira na gonevuli era kila na wilivola? Sega, nira sa kila rawa tu na wilivola. Ia ena vukei ira ga o qasenivuli mera vakavinakataka na nodra wilivola. O keda tale ga na lotu vaKarisito dina e sa kilailevu tu na noda dau veilomani, na loloma gona qori e uqeti keda meda veirokovi. (Joni 13:35) E rawa ni toso vinaka na nodra vuli na gonevuli era kila na wilivola nira vakavinakataka na iwalewale ni nodra wilivola, eda na toso vinaka tale ga ke da dau liu ena veirokovi. (1 Ces. 4:​9, 10) O keda kece e noda itavi meda dau liu ena veirokovi. De vinaka meda dui liaci keda: ‘Au cakava tiko qori​—au dau liu ni veirokovi ena ivavakoso?’

Rokovi Ira ‘na Vakaloloma’

15, 16. (a) O cei meda kua ni guilecava nida veirokovi, na cava na vuna? (b) Ena kilai vakacava ni vu dina mai lomada na noda dokai ira na tacida?

¹⁵ Nida veirokovi, o cei meda kua ni guilecava ena ivavakoso? E tukuna na Vosa ni Kalou: “Sa ia na soli ka vei Jiova ko koya sa lomani ira na dravudravua [“vakaloloma tu,” NW]; Ia na ka sa solia ko koya ena saumi tale vua.” (Vkai. 19:17) Ena uqeti keda vakacava na ivakavuvuli ena tikinivolatabu qori nida saga meda dau liu ena veirokovi?

¹⁶ O na vakadinadinataka ni levu na tamata era dau rokovi ira na nodra iliuliu, ia era sega soti ni doka e dua era nanuma ni lolovira vei ira se ra sega sara ga ni dokai koya. E sega ni va ya o Jiova, e kaya: “Ni’u na vakarokorokotaki ira era sa vakarokorokotaki au.” (1 Sam. 2:30; Same 113:​5-7) O Jiova e rokovi ira era qaravi koya, era rokovi koya tale ga. E sega ni vakawaleni ira “na yalomalumalumu [“vakaloloma,” NW].” (Wilika Aisea 57:15; 2 Vei. 16:9) Eda vinakata kece meda vakatotomuri Jiova. Ke da via kila na vinaka ni noda veirokovi mai vu ni lomada, meda taroga: ‘Au dau raici ira vakacava o ira era sega ni lesi ena itavi ni veiqaravi ena ivavakoso?’ (Joni 13:​14, 15) Na noda sauma na taro qori ena kilai kina na levu ni noda dau veidokai mai vu ni lomada.​—Wilika Filipai 2:​3, 4.

Meda Veirokovi Nida Solia na Noda Gauna

17. Na cava e dua na sala vinaka meda liu kina ena veirokovi, na cava na vuna?

¹⁷ Na cava e dua na sala vinaka meda rokovi ira kece kina ena ivavakoso? Meda vagalalataki keda ena vukudra na tacida. Na cava na vuna? Nida lotu vaKarisito, eda osooso kece, eda dau ogaoga tale ga ena itavi bibi e tuvanaki ena ivavakoso. E sega ni kurabuitaki kina na noda vakamareqeta na gauna. Eda kila nida na sega ni namaka mera solia vakalevu vei keda na tacida na nodra gauna. Eda marautaka tale ga nira kila na tacida ni sega ni rawa nira namaka meda solia vakalevu vei ira na noda gauna.

18. Me vaka e laurai ena iyaloyalo ena tabana e 18, eda na yalorawarawa vakacava meda solia na noda gauna vei ira na tacida eda vakabauta vata?

¹⁸ Eda kila tale ga (vakauasivi o ira na ivakatawa ena ivavakoso), ni noda lomasoli meda vagalalataki keda mai na ka eda cakava tiko meda vakayagataka vei ira na tacida na noda gauna, e vakaraitaka nida dokai ira. Ena sala cava? Nida biuta vakatikitiki na ka eda cakava tiko da qai vakayagataka na gauna oya vei ira na tacida, e vaka sara ga eda kaya tiko, ‘E rawa ni cegu tu mada na noqu cakacaka, e bibi cake meu vakayagataka vei kemuni na noqu gauna.’ (Mari. 6:​30-34) E dina tale ga na kena veibasai. Ke da sega ni vagalalataki keda mai na ka eda cakava tiko meda vakayagataka na noda gauna vua na tacida, ena nanuma o koya ni sega ni kauaitaki. E macala ga ni so na ka e dau vinakati me caka vakatotolo, me kua ni dua na ka e vakataotaka. Ia na noda yalorawarawa ni solia na noda gauna se sega, ena kilai kina na levu ni noda dokai ira na tacida mai vu ni lomada.​—1 Kor. 10:24.

Dau Vakaliuliu

19. Me ikuri ni noda solia na noda gauna, na cava tale eda rawa ni cakava meda rokovi ira kina na tacida?

¹⁹ E tiko eso tale na sala vinaka meda dau rokovi ira kina eda vakabauta vata. Me kena ivakaraitaki, nida solia vei ira na noda gauna, meda vakarogoci ira tale ga. E ivakaraitaki vinaka tale eke o Jiova. E tukuna na daunisame o Tevita: “Sa vakaraici ira na tamata yalododonu ko Jiova, ka sa qara tu na daligana ki na nodra masu.” (Same 34:15) Eda na saga meda vakatotomuri Jiova nida vakarogoci ira vinaka na tacida, vakabibi ke ra kere veivuke. Nida cakava qo, eda vakaraitaka kina nida rokovi ira.

20. Na cava soti meda nanuma me baleta na noda veirokovi?

²⁰ Me vaka ga eda sa raica oti mai, me matata tiko vei keda na vuna me vu kina mai lomada na noda dokai ira eda vakabauta vata. Meda yadrava tale ga na gauna kei na sala meda liu kina ni rokovi ira kece na tacida, wili kina o ira era vakaloloma tu. Nida cakava qori, ena dei na ivau ni veilomani vakamataveitacini kei na duavata ena ivavakoso. Koya gona meda veirokovi tiko ga, ia e bibi sara meda dau liu ena veirokovi. O nakita dei mo cakava oya?

[iVakamacala e ra]

O se Nanuma?

• Erau vosa veiwekani vakacava na veirokovi kei na veidokai?

• Na cava meda rokovi ira kina eda vakabauta vata?

• Na cava meda dau veirokovi kina?

• Na sala cava meda rokovi ira kina eda vakabauta vata?

[iYaloyalo ena tabana e 18]

Eda na rokovi ira vakacava eda vakabauta vata?