E se Soli Tiko na Gauna mo Qaravi Jiova

Erau a papitaiso ena 19 Tiseba, 2009 e dua na veitinani mai Málaga, ena sauca kei Sipeni​—e yacadrau ruarua o Ana. Erau maliwai ira na le 2,352 era papitaiso mai Sipeni ena 2009. Ia na ka e talei me baleti rau na veitinani qori na nodrau yabaki, dua e yabaki 107 dua tale e yabaki 83!

Na cava erau yalataki rau kina vei Jiova ena nodrau papitaiso? Ena veiyabaki ni 1970, a sureti Ana (luvena) e dua eratou tiko veitikivi me gole ina Vulivola ni iVavakoso e dau vakayacori ena nona vale e dua na iVakadinadina. A gole kina ena so na gauna o Ana, ia a sega ni mani toso sara ena vuku ni nona cakacaka.

Ni oti e tini na yabaki, eratou vulica na iVolatabu eso na luvei Ana ratou dauveiqaravi sara i Jiova. E dua vei ratou na gone qori o Mari Carmen, a qai uqeti tinana me taleitaka tale na ka dina, me vulica sara na iVolatabu. A tataleitaki tale ga o Ana, na bubu nei Mari Carmen. Ni toso na gauna, eratou qai papitaiso e le tini na lewenivuvale qori.

Ena siga erau papitaiso kina, dua na ka na nodrau marau na veiyacani. A tukuna o Ana e yabaki 107: “Sa rui vinaka o Jiova, ni solia vei au na gauna meu kilai koya kina.” A tomana o luvena: “Ni bera ni vukici na vuravura me Parataisi, au via qaravi Jiova, cakava na lomana, qai vunautaka na itukutuku vinaka ena kena levu duadua e rawa.”

E vakamarautaki rau vakalevu na yada qori na nodrau tiko ena soqoni. E kaya e dua na qase ni ivavakoso: “Erau sega vakadua ni calata na soqoni, rau qai tu vakarau me rau vakamacala ena vuli Vale ni Vakatawa.”

Na nodrau yalodina eda lai nanumi Ana kina e dua tale ga na yada e tukuni ena iVolatabu ni “sega vakadua ni yali mai na valenisoro ena nona dau sokalou ena bogi kei na siga, ena nona lolo kei na nona dau masu.” A mani vakalougatataki kina me raici Jisu ni se gonetagane lailai. (Luke 2:​36-​38) Sa yabaki 84 ena gauna qori o Ana, ia a sega ni vakaiulubaletaka ni sa qase qai sega ni rawa me qaravi Jiova. E va tale ga qori na nodrau rai na veiyacani erau vakamacalataki ena ulutaga qo.

Vakacava era tiko tale ga eso na wekamu era na via rogoca na itukutuku ena iVolatabu? Se o sotava ena dua na gauna e dua na itabaqase a tataleitaki qai via vakarorogo ni o vunau yani? O ira va qori era rawa ni cakava tale ga na ka erau cakava na veiyacani erau talanoataki ena ulutaga qo, ni se soli tiko na gauna mera qaravi Jiova na Kalou dina.

[Tikina bibi ena tabana e 25]

“Sa rui vinaka o Jiova”

[Tikina bibi ena tabana e 25]

“Ni bera ni vukici na vuravura me Parataisi, au via qaravi Jiova”