Na Ka Dina me Baleta na Amaketoni
“[O iratou na] yalo ni tevoro . . . ratou sa lako yani vei ira na tui ni veivanua kei vuravura taucoko . . . , ratou sa vakasoqoni ira vata e na vanua na yacana e na vosa vaka-Iperiu ko Amaketon[i].” (Neitou na matanivola kala.)—VAKATAKILA 16:14, 16, Ai Vola Tabu.
NA AMAKETONI e yaca ni dua na vanua. Ia e rairai sega ni dua dina na vanua e vuravura.
Na cava na ibalebale dina ni vosa “Amaketoni”? Na cava e dau okati kina na vosa qori kei na dua na ituvaki ena yaco, me vaka na ivalu?
Soqoni ena Vanua o Amaketoni
Na vosa vakaIperiu ni Amaketoni e kena ibalebale “Ulunivanua o Mekito.” E sega ni tiko dina na ulunivanua qori, ia e dua na vanua dina o Mekito. E tiko ena basoga ni rua na gaunisala e muri vakalevu ena vuaira ni vanua era vakaitikotiko kina na matanitu makawa o Isireli. E levu na ivalu vakairogorogo a vakayacori volekata na vanua qori. Qori na vuna e sema kina ena ivalu na yaca o Mekito.a
Ia o Mekito e sega ni vakaibalebaletaka na veiraravui a vakayacori kina, e vakaibalebaletaka ga na vuna e yaco kina na veiraravui. A wili o Mekito ena Vanua Yalataki a solia vei ira na Isireli na Kalou o Jiova. (Lako Yani 33:1; Josua 12:7, 21) A yalataka vei ira na nona tamata o Jiova ni na taqomaki ira vei ira na meca, a qai cakava dina qori. (Vakarua 6:18, 19) Me kena ivakaraitaki, a vakabulai ira vakacakamana na Isireli o Jiova ena vanua o Mekito ena gauna e kabakoro kina na nodrau mataivalu o Tui Japini kei na nona Kavetani o Sisira mai Kenani.—Dauveilewai 4:14-16.
Na vosa “Amaketoni” e vakatakarakarataka e dua na ka e titobu na kena ibalebale. E semati ena nodrau veiraravui e rua na mataivalu kaukaua.
E parofisaitaki ena Vakatakila ni dua na gauna lekaleka ga qo ena uqeti ira na matanitu vakatamata o Setani kei ira na timoni mera vakasoqona na nodra mataivalu, qori e vakaraitaka nira saqati ira na tamata ni Kalou kei na nodra cakacaka. Era na mate kina e vica vata na milioni ni ravuti ira na meca na Kalou.—Vakatakila 19:11-18.
Na cava ena vakamatei ira kina e levu na Kalou, ni tukuna na iVolatabu ni ‘dauloloma, berabera ni cudru, qai levu na nona yalololoma’? (Niemaia 9:17) Meda kila na vuna ena cakava kina qori na Kalou, meda sauma mada e tolu na taro qo: (1) O cei ena tekivuna na ivalu? (2) Na cava me vala kina na Kalou? (3) Ena yaga tawamudu vakacava na ivalu qori e vuravura, vei ira tale ga era bula kina?
1. O CEI ENA TEKIVUNA NA IVALU?
Na Amaketoni e sega ni ivalu me vakatubu ca kina na Kalou. Ia ena taqomaki ira kina na tamata vinaka mai vei ira na meca. Era na vakatubu ca ena ivalu qo “na tui ni vanua tawani kece kei vuravura,” o ira na veiliutaki tiko e vuravura. Na cava ga e yaco kina na veiraravui? O Setani ena vakamuai ira na nona matanitu kei na nona mataivalu mera vaqeavutaki ira era qarava na Kalou o Jiova.—Vakatakila 16:13, 14; 19:17, 18.
Ni vakamareqeti ena so na vanua nikua na nodra galala na lewenivanua mera tukuna na ka era nanuma kei na nodra galala ni sokalou, ena rairai dredre kina me vakabauti ni na saga na matanitu me lewa se vakawabokotaka na lotu. Ia a yaco qori ena ika20 ni senitiuri, sa yaco tale tiko ga nikua.b Ke sa yaco oti mada ga na veiraravui ena veigauna sa oti, e rua na ka e duidui vakalevu kina na veiraravui ena Amaketoni. Kena imatai, ena vakilai e veiyasa i vuravura. Kena ikarua, na ka ena cakava na Kalou o Jiova ena uasivia sara na veika a cakava ena veigauna sa oti. (Jeremaia 25:32, 33) Na veiraravui qori e tukuni ena iVolatabu me “ivalu ni siga levu ni Kalou Kaukaua Duadua.”
2. NA CAVA ME VALA KINA NA KALOU?
O Jiova e vakavulici ira era sokaloutaki koya mera dauveiyaloni, mera lomani ira tale ga na kedra meca. (Maika 4:1-3; Maciu 5:43, 44; 26:52) Era na sega gona ni lave iyaragi mera taqomaki ira kina ni yaco na veiraravui warumisa qo. Ke sega ni vakabulai ira na nona tamata na Kalou, era na vakawabokotaki. Ena vala gona o Jiova ni okati tiko kina na yacana kei na kena irogorogo. Ke ra vakamatei ira na nona tamata na meca, ena nanumi ni sega ni dauloloma o Jiova, sega ni lewadodonu, e sega tale ga ni kaukaua. Ena sega vakadua ni yaco qori!—Same 37:28, 29.
E dauveivakaroti rawa na Kalou ni sega ni vinakata me rusa e dua. (2 Pita 3:9) E vakadreti keda ena ivolatukutuku vakaivolatabu ni a vakayacora e dua na ka vei ira na via ravuti ira na nona tamata ena veigauna sa oti. (2 Tui 19:35) E vakasalataki keda tale ga na iVolatabu ni dua ga na gauna qo ena vakamuai ira na nona matanitu kei na nona mataivalu o Setani mera ravuti ira na tamata ni Kalou, ia ena vala tale ena vukudra o Jiova. Na Vosa sara ga ni Kalou sa parofisaitaka makawa tu mai ni na vakarusai ira na tamata ca o Jiova. (Vosa Vakaibalebale 2:21, 22; 2 Cesalonaika 1:6-9) Era na qai vakasamataka na meca ena gauna oya nira veivala tiko kei na Kalou Kaukaua Duadua.—Isikeli 38:21-23.
3. ENA YAGA TAWAMUDU VAKACAVA NA VEIRARAVUI QO?
Era na vakabulai e vica vata na milioni ena ivalu na Amaketoni. Qori e itekitekivu ga ni sautu ena vakilai e vuravura.—Vakatakila 21:3, 4.
E tukuni ena Vakatakila e dua na “isoqosoqo levu” e sega ni dua e wilika rawa, era na bula ena ivalu qori. (Vakatakila 7:9, 14) Ena veidusimaki ni Kalou era na veivuke ena kena vukici na vuravura me Parataisi me vaka a nakita taumada o Jiova.
Eda kila beka na gauna era na ravuti kina na tamata ni Kalou?
[iVakamacala era]
a E sega ni ka vou na kena dau vakasamataki vata na ivalu kei na dua na vanua. Kena ivakaraitaki, na siti o Hiroshima mai Japani sa ivakatakarakara tu ni ivalu vakaniukilia ena gauna qo ni oti na kena vaqeavutaki ena bomu vakaniukilia.
b Na nodra vakamatei vakayauyau na Jiu ena veivakararawataki nei Itala e dua na ivakaraitaki ni nona saga na matanitu me vakawabokotaki ira eso na isoqosoqo lotu kei na so na matatamata. Ena veiliutaki makawa tale ga ni Soviet, era tusaqati vakaca na lotu ena matanitu cokovata e liu o Rusia. Raica na ulutaga “O Ira na Dauveiyaloni Era Taqomaka na Kedra iRogorogo” ena Vale ni Vakatawa 1 Me, 2011, tabaka na iVakadinadina i Jiova.
[iYaloyalo ena tabana e 6]
A vala ena vukudra na nona tamata o Jiova ena veigauna sa oti
[iYaloyalo ena tabana e 7]
Ena vala tale ena vukudra na nona tamata o Jiova ena ivalu na Amaketoni