E Bibi mo Kila na iSau ni Vakatataro me Baleti Jisu?

“Oni na kila na ka dina, na ka dina ena qai sereki kemuni.”​—JONI 8:32.

E TU ena iVolatabu na ka dina me baleti Jisu, ena sereki keda mai na ivakavuvuli e vakavu veilecayaki qai veivakabobulataki. Ia e bibi beka na veika eda vakabauta me baleti koya? Io. E bibi vei Jiova, e bibi vei Jisu, me bibi tale ga vei keda.

● Na cava e bibi kina vei Jiova? Ni “Kalou ga na loloma.” (1 Joni 4:8) E vinakata o Jiova meda marautaka na bula me tawamudu. E tukuna o Jisu: ‘Na levu ni nona lomana na kawatamata na Kalou, e solia kina na Luvena e duabau ga e bulia, mera rawata na bula tawamudu o ira kece era vakabauti koya.’ (Joni 3:16) Me salavata kei na inaki taumada i Jiova, a tala mai na luvena me noda iVakabula, me rawa tale ga nida bula tawamudu ena vuravura Parataisi. (Vakatekivu 1:28) E vinakata sara ga o Jiova me solia vakailoloma na bula tawamudu vei ira era vulica na ka dina me baleti Luvena ra qai muria sara.​—Roma 6:23.

● Na cava e bibi kina vei Jisu? O Jisu tale ga e lomana na kawatamata. E vakaraitaka na loloma vosota ena nona tu vakarau me cabora nona bula ena vukuda. (Joni 15:13) E kila o Jisu ni rawati duadua ga na bula ena vukuna. (Joni 14:6) E sega ni dodonu meda kurabuitaka ni vinakata o Jisu me yaga vei ira e levu na nona isoro ni veivoli. Qori na vuna e vakaroti ira kina nona imuri yalodina mera vakavulici ira na lewe i vuravura ena loma ni Kalou kei na nona inaki.​—Maciu 24:14; 28:19, 20.

● Na cava e bibi kina vei keda? Vakasamataka mada eso na ka e bibi vei iko—nomu bula kei na nomu vuvale. O diva me vinaka cake nomudou bula vakavuvale? E vinakata o Jiova me tawamudu na nomudou marautaka vakavuvale na bula uasivi ena vuravura vou, e sega kina na rarawa kei na mosi. E vakarautaka rawa qori ena vuku i Jisu. (Same 37:11, 29; Vakatakila 21:3, 4) Ke o via bula ena dua na ituvaki va qori, e tiko na ka mo cakava.

Raica tale mada na tikinivolatabu ena ruku ni ulutaga qo: “Oni na kila na ka dina, na ka dina ena qai sereki kemuni.” Na ka dina me baleti Jisu kei na nona itavi ena vakayacori ni inaki ni Kalou ena sereki keda mai na ka ca duadua eda bobula tu kina—na ivalavala ca kei na mate. Ia mo vakila qori, e bibi mo kila “na ka dina.” Vakacava mo vulica tale e levu na ka me baleta na ka dina qori kei na sala me yaga kina vei kemudou vakavuvale? Era na marau na iVakadinadina i Jiova mera vukei iko.