Taro na Dauwiliwili
Gauna cava e mai kavitu ni Matanitu Qaqa kina e Vuravura o Peritania kei Merika, me vaka e parofisaitaki ena iVolatabu?
▪ Na matakau vakaitamera a raica o Tui Nepukanesa, e sega ni dusi ira kece na Matanitu qaqa kei vuravura. (Tani. 2:31-45) E vakaibalebaletaka ga e lima na veiliutaki, tekivu mai na gauna i Taniela me yacova na noda gauna. O ira na veiliutaki qori era vorati ira na tamata ni Kalou.
Na ivakamacala i Taniela me baleta na matakau, na Matanitu Qaqa kei Vuravura o Peritania kei Merika a cadra mai Roma, a sega ga ni vakavuai Roma. Ena matakau a raivotutaka o Taniela, e raica ni tekivu na aironi mai yavana me yaco ina nona iqaqalo. (Na yava ni matakau me yaco ina nona iqaqalo, erau waki vata kina na aironi kei na tete.)a Na ivakamacala qori e vakaraitaka ni na cadra mai na yava aironi ni matakau na Matanitu o Peritania kei Merika. E vakadinadinataki ena ivolatukutuku ena veigauna sa oti ni yaco dina qori. A cadra me veiliutaki ena veiyabaki ni 1700 na Matanitu a qali tu e liu vei Roma o Peritania. Emuri, a yaco tale ga me matanitu kaukaua vakataki koya o Merika. Ia e se sega ni kilai ena gauna qori o cei na ikavitu ni matanitu qaqa me vaka e parofisaitaki ena iVolatabu. Na cava na vuna? Ena vinakati mada merau cakacaka vata ena dua na inaki o Peritania kei Merika. A qai yaco qori donuya na iKarua ni Valu Levu.
Ena gauna qori era toso vinaka sara tu ga na “luve ni matanitu” era tiko e Merika, na vanua e tu kina na itikotiko liu e Brooklyn, Niu Yoka. (Maciu 13:36-43) E toso vinaka tale tu ga na nodra cakacaka vakavunau na lumuti ena vanua era qali vakaPeritania. Ena iMatai ni iValu Levu erau duavata na matanitu o Peritania kei Merika me rau ravuti ira na kedrau meca vakapolitiki. Ena vuku ni yalo ni boletaki vanua a yaco ena ivalu, erau mani vakacacani ira tale ga na kawa ni “yalewa” ni Kalou nirau tarova na ivola era tabaka, rau vakavuna tale ga mera bala e valeniveivesu o ira na liutaka tiko na cakacaka vakavunau.—Vkta. 12:17.
E vakadinadinataki gona ena parofisai ena iVolatabu ni a sega ni tauyavu na ikavitu ni matanitu qaqa kei vuravura ni voleka ni cava na veiyabaki ni 1700, ni se qai veiliutaki na matanitu o Peritania. A qai yaco ni tekivu na siga ni Turaga.b
[iVakamacala e ra]
a Na tete a waki vata kei na aironi e vakaibalebaletaka na veika era tu ena Matanitu Qaqa kei Vuravura o Peritania kei Merika ena vakamalumalumutaki koya tale. Ni toso na gauna, na tete e vakamalumalumutaka na kaukaua ni matanitu qaqa qori.
b Na ivakamacala vou qo sa sosomitaka na ivakamacala taumada e laurai ena tabana e 57, parakaravu 24, ni ivola Parofisai i Taniela kei na ivakamacala ni itaba ena tabana e 56 kei na 139.
[iYaloyalo ena tabana e 19]
Walu na tacida tagane ena itikotiko liu era bala i valeniveivesu ena June 1918