“Oni . . . Vakatakila ga Vei Ira na Gone Lalai”

O via kila na ka dina me baleta na Kalou​—o cei o koya, na ka e vinakata, na ka e cata, kei na nona inaki? E vakatakila na Kalou o Jiova na ka dina me baleti koya ena nona Vosa na iVolatabu. Ia eda na sega ni kila na ka dina ena iVolatabu ke da wilika wale tu ga. Na cava na vuna? Na kena kilai na ka dina me baleta na Kalou e ka dokai; ena sega ni vakatakilai vei ira kece na tamata. Meda raica mada na ka e tukuna o Jisu me baleta na tikina qori.​—Wilika Maciu 11:25.

Na tikinivolatabu qori e tekivu ena vosa: “Sa qai kaya o Jisu ena gauna ya.” Na ka ena vakarau tukuna o Jisu e rairai baleta tiko e dua na ituvaki e se qai yaco ga. A se qai vunauci ira ga na lewenivanua era sega ni via nona tisaipeli ena tolu na siti e Kalili, na vanua a cakava kina e levu na cakacaka veivakurabuitaki. (Maciu 11:​20-24) De dua o na lomatarotarotaka, ‘E rawa vakacava ni dua me sega ni vakabauta qai muria na ka dina a vakavulica o Jisu ni raica na nona cakacaka veivakurabuitaki?’ Na nodra sega ni via tisaipeli na tamata e vakaraitaka ni sega ni malele na lomadra ena ka e cakava.​—Maciu 13:​10-15.

E kila vinaka o Jisu ni na vinakati e rua na ka meda kila kina na ka dina me baleti koya na Kalou ena iVolatabu: Dua oya na veivuke ni Kalou, kena ikarua me vinaka na inaki ni lomada. A vakamacalataka o Jisu: “Au vakavinavinaka vei kemuni, Tamaqu, na Turaga ni lomalagi kei na vuravura ni oni vunia na veika qo vei ira na vuku kei ira na vuli vinaka, oni qai vakatakila ga vei ira na gone lalai.” O raica rawa na vuna e ka dokai kina na noda kila na ka dina me baleti koya na Kalou ena iVolatabu? Ena lewa o Jiova se o cei me na kila na ka dina, baleta ni “Turaga ni lomalagi kei na vuravura.” Ia e sega ni dau veivakaduiduitaki na Kalou, e solia na galala vei keda kece na tamata meda kila na ka dina. Na cava e vakatakila ga kina vei ira eso na ka dina ena iVolatabu?

E vakadonui ira ga na yalomalumalumu o Jiova, e cati ira na viavialevu. (Jemesa 4:6) E vunia na ka dina vei ira na “vuku kei ira na vuli vinaka”​—o ira na vuku e vuravura kei ira na vuli vinaka era dokadoka qai nuitaka ga na nodra vuku, era sega ni ciqoma na veivuke ni Kalou. (1 Korinica 1:​19-21) Ia e vakatakila ga na ka dina vei ira na “gole lalai”​—qori o ira era torovi koya ena yalodina, ra qai vakaraitaka na yalomalumalumu me vaka na gone lalai. (Maciu 18:​1-4; 1 Korinica 1:​26-28) E kila vinaka na Luve ni Kalou o Jisu e rua na mataqali tamata va qori. E levu vei ira na iliuliu ni lotu era vuli vinaka qai dokadoka era sega ni kila na ibalebale ni itukutuku i Jisu, o ira ga na gonedau yalomalumalumu era kila na kena ibalebale. (Maciu 4:​18-22; 23:​1-5; Cakacaka 4:13) Eso tale ga na vutuniyau kei ira na vuli vinaka era vakaraitaka na yalomalumalumu dina ra qai yaco mera imuri i Jisu.​—Luke 19:​1, 2, 8; Cakacaka 22:​1-3.

Meda raica tale mada na taro a tarogi ena itekitekivu ni ulutaga qo: O via kila na ka dina me baleta na Kalou? Ke vaka kina, ena vakacegui iko na nomu kila ni Kalou e sega ni vakadonui ira era vakatokai mera vuku e vuravura. Ena yasana adua, ena vakadonui ira ga era beci tu mai vei ira na tamata vuku ni vuravura qo. Ke o vulica na Vosa ni Kalou ena yalomalumalumu qai donu tiko ga nomu rai, ena solia vei iko o Jiova na isolisoli talei​—oya na nomu kila na ka dina me baleti koya. Ni o sa kila na ka dina qori ena qai vakainaki kina nomu bula ena gauna qo, o na rawata tale ga na “bula dina”​—na bula tawamudu ena vuravura vou ni yalododonu e yalataka tu na Kalou ena gauna se bera mai.a​—1 Timoci 6:​12, 19; 2 Pita 3:13.