‘Kua ni Vakacauoca’

1, 2. E rawa ni uqeti keda vakacava na noda vakasamataka na isoqosoqo i Jiova e lomalagi kei vuravura?

DUA dina na ka talei meda vakasamataka noda lewena e dua na isoqosoqo vakaitamera e lomalagi kei vuravura. Na raivotu ena Isikeli wase 1 kei na Taniela wase 7 e vakamatatataki kina na ka e cakava tiko o Jiova ena icavacava. E liutaka tiko o Jisu na isoqosoqo i Jiova e vuravura ena kena vakaliuci na vunautaki ni itukutuku vinaka, na nodra qaravi vakayalo o ira na vakaitavi ena cakacaka qo, kei na vakatetei ni sokalou dina vei Jiova. Io, e uqeti keda qori meda nuitaka na isoqosoqo i Jiova!​—Maciu 24:45.

² Vakacava eda toso vata tiko kei na isoqosoqo vakasakiti qo? O se taleitaka tiko ga na ka dina, se sa seavu tiko? Nida vakasamataka tiko na taro qori, de dua eda na siqema nida sa vakacauoca se sega nida gumatua me vaka e liu. E rawa ni yaco qori. Ena imatai ni senitiuri, a vinakati me vakamasuti ira na lotu vaKarisito na yapositolo o Paula mera vakasamataka na gugumatua i Jisu. A tukuna o Paula ni na vukei ira qori mera kua ni “oca se datuvu.” (Iper. 12:3) Na noda dikeva vinaka tale ga na ulutaga sa oti me baleta na ka sa cakava na isoqosoqo i Jiova, e dodonu me sa bau uqeti keda meda gumatua da qai vosota tiko ga.

3. Na cava meda cakava meda kua kina ni vakacauoca, na cava ena veivosakitaki ena ulutaga qo?

³ A tukuna o Paula ni vinakati meda cakava e levu tale na ka meda kua kina ni vakacauoca, dua vei ira qori na noda dau “caka vinaka.” (Kala. 6:9) Ena vinakati kina na sasaga. Meda dikeva mada e lima na sala e rawa nida tudei tiko ga kina da qai toso vata tiko ga kei na isoqosoqo i Jiova. Nida cakava qori, sa na qai rawa nida kila se cava meda vakavinakataka yadudua se vakavuvale.

SOQONI MEDA VEIUQETI DA QAI SOKALOU

4. Na cava eda tukuna kina ni bibi ena sokalou dina na noda dau soqo vata?

⁴ Sa tiki voli mai ni nodra bula na dauveiqaravi i Jiova mera dau soqo vata. Ena so na gauna veiganiti, era dau sureti na kabula vakayalo mai lomalagi mera rairai ena mata i Jiova. (1 Tui 22:19; Jope 1:6; 2:1; Tani. 7:10) A vinakati e Isireli makawa mera dau soqo vata “me ra rogoca, ka me ra vuli kina.” (Vkru. 31:​10-12) A nodra ivakarau na Jiu ena imatai ni senitiuri mera gole ina nodra valenilotu mera wilika na iVolatabu. (Luke 4:16; Caka. 15:21) A tomani tiko ga na soqoni ni sa tauyavutaki na ivavakoso vaKarisito, e se bibi tiko ga ena noda sokalou nikua. O ira na lotu vaKarisito dina era ‘dau veinanumi, veivakauqeti, veilomani, era caka vinaka tale ga.’ Ena vinakati tiko ga meda ‘veivakayaloqaqataki, vakabibi nida raica ni sa voleka mai na siga i Jiova.’​—Iper. 10:​24, 25.

5. Eda na veivakayaloqaqataki vakacava ena noda soqoni?

⁵ Dua na sala bibi eda veivakayaloqaqataki kina oya na noda vakaitavi ena soqoni. Eda rawa ni tukuna e matanalevu na noda vakabauta nida sauma na taro ena parakaravu, tukuna na sala eda rawa ni bulataka kina na tikinivolatabu, e dua na irogo lekaleka e dusia na yaga ni kena muri na ivakavuvuli vakaivolatabu, se so tale na sala. (Same 22:22; 40:9) Ke vakayabaki mada ga na nomu dau tiko ena soqoni, o na vakadinata ni se veivakayaloqaqataki ga na nodra ivakamacala na tacida​—qase kei na gone.

6. E vukei keda vakacava na soqoni meda bulabula tiko ga vakayalo?

⁶ Na cava eso tale na vuna e vakabibitaka kina na noda Kalou meda soqo vata wasoma? E vukei keda na soqoni kei na soqo cokovata meda vosa ena doudou, meda kila tale ga na ka meda cakava nida tusaqati se nira sega ni kauai ena yalava. (Caka. 4:​23, 31) Na veivosakitaki ni iVolatabu e vakaukauataki keda, eda na tudei tale ga ena vakabauta. (Caka. 15:32; Roma 1:​11, 12) Na veivakavulici kei na ivakamacala veiuqeti eda rogoca nida soqo vata meda sokalou eda na vakila kina na marau dina, ena ‘vakacegui keda tale ga ena siga ni rarawa.’ (Same 94:​12, 13) Na Komiti ni Veivakavulici ni iLawalawa Dauvakatulewa, e qarava na vakarautaki ni porokaramu kece vakayalo mera vakavulici kina na tamata i Jiova e veiyasa i vuravura. Eda vakavinavinakataka dina na kena vakarautaki na ivakavuvuli yaga ena noda soqoni e veimacawa!

7, 8. (a) Na cava na inaki bibi ni noda soqoni? (b) E yaga vakacava ena nomu bula vakayalo na soqoni?

⁷ E yaga dina vei keda na soqoni, ia e tiko e dua tale na vuna e bibi sara kina. Na inaki bibi ni noda soqo vata oya meda sokaloutaki Jiova. (Wilika Same 95:6.) Dua dina na ka dokai meda vakacaucautaka na noda Kalou vinaka qo! (Kolo. 3:16) E ganiti Jiova meda sokaloutaki koya tiko ga, qori ena noda tiko kei na noda vakaitavi ena soqo vaKarisito. (Vkta. 4:11) Oya na vuna eda vakamasuti kina meda “kua ni vakawaletaka na soqoni me vaka e nodra ivalavala eso”!​—Iper. 10:25.

⁸ Vakacava eda raica na noda soqoni me isolisoli ena vukei keda meda vosota me yacova ni sa tauca o Jiova nona lewa ena vuravura ca qo? Ke va qori na nomu rai, na soqoni ena dua vei ira na “veika era bibi sara” o na sega ni vakawaletaka ke o osooso mada ga. (Fpai. 1:10) Ke o calata na soqoni qai sega ni tomani ira na tacimu vakayalo ena sokalou vei Jiova, ena tiko e dua na vuna bibi sara o sega ni soqoni kina.

VAQARAI IRA NA YALOMALUMALUMU

9. Eda kila vakacava ni bibi na cakacaka vakavunau?

⁹ Na noda vakaitavi vakalevu ena cakacaka vakavunau ena vukei keda tale ga meda toso vata tiko kei na isoqosoqo i Jiova. A tekivuna o Jisu na cakacaka qo ena nona bula e vuravura. (Maciu 28:​19, 20) Me tekivu mai na gauna ya, e kauaitaka vakabibi na isoqosoqo i Jiova na vunautaki ni Matanitu ni Kalou kei na cakacaka ni veivakatisaipelitaki. E vakadinadinataki ena levu na irogo ena noda gauna nira tokona tiko na agilosi na noda cakacaka, era dusimaki keda tale ga vei ira na “yalomalumalumu era muria na sala era na bula tawamudu kina.” (Caka. 13:48; Vkta. 14:​6, 7) Sa toso tiko nikua na isoqosoqo i Jiova e vuravura, e tuvanaki tale ga me tokona na cakacaka bibi duadua qori. Vakacava eda dau kauaitaka tale ga vakabibi na cakacaka vakaitalatala?

10. (a) Na cava e cakava e dua na tacida me taleitaka tiko ga kina na ka dina? (b) E vukei iko vakacava na cakacaka vakaitalatala mo kua ni vakacauoca?

¹⁰ Na noda gumatua ena cakacaka vakaitalatala ena vukei keda meda taleitaka tiko ga na ka dina. Raica mada na ka e tukuna o Mitchel, sa dede na nona veiqaravi vaqase, e painia tudei tale ga. E kaya: “Au dau taleitaka meu wasea vei ira na tamata na ka dina. Niu vakasamataka e dua na ulutaga vou ena Vale ni Vakatawa se Yadra!, dua na ka noqu qoroya na vuku, kila, kei na veiraurau vinaka ni ulutaga ena itabataba yadua. Au via gole sara ga i vunau meu raica se cava era nanuma ena yalava, kei na ka meu cakava mera tataleitaki kina. E vukei au na cakacaka vakaitalatala meu dei tiko ga. Au na raica mera caka kece na ka ni bera se sa oti na cakacaka vakaitalatala.” Na noda ogaoga tale ga ena cakacaka bibi qo ena vukei keda meda tudei ena iotioti ni veisiga qo.​—Wilika 1 Korinica 15:58.

VAKAYAGATAKA NA ISOLISOLI VAKAYALO

11. Na cava meda vakayagataka vinaka kina na kakana vakayalo e vakarautaka o Jiova?

¹¹ Dua na ka na levu ni kakana vakayalo e vakarautaka o Jiova ena noda ivola tabaki meda vakaukauataki kina. De dua o nanuma lesu na gauna o wilika kina e dua na ivola o qai vakasamataka: ‘Qo sara ga na ka au gadreva! E vaka sara ga e vola o Jiova me ganiti au!’ E sega ni kurabuitaki qori. E vakayagataka tiko o Jiova na isolisoli kece qori me vakavulici keda qai dusimaki keda kina. Sa tukuna tu o koya: “Au na vakavulici iko ka vakatakila vei iko na sala mo lako kina.” (Same 32:8) Vakacava eda dau guta meda vakayagataka kece na kakana vakayalo e vakarautaki da qai vakasamataka vakatitobu? Nida cakava qori ena vukei keda meda vua tiko ga, eda na sega tale ga ni malai vakayalo ena iotioti ni veisiga qo.​—Wilika Same 1:​1-3; 35:28; 119:97.

12. Na cava meda cakava meda kua kina ni raica vakamamada na kakana vakayalo e vakarautaki ena vukuda?

¹² Ena vinaka meda dau vakasamataka na cakacaka e vakayacori me vakarautaki tiko ga kina na kakana bulabula vakayalo. Na Komiti ni Volavola ni iLawalawa Dauvakatulewa e qarava na cakacaka ni vakadidike, volavola, na kena wiliki me matata qai laurai ni donu na ka e biu, digitaki ni iyaloyalo, kei na vakadewataki ni noda ivola vaka kina na kena e biu ena noda Web site. Na valenivolavola ni tabana e dau tabaivola ena vakauta na ivola ina ivavakoso voleka kei na kena e tu yawa. Na cava e caka kece kina qori? Io, me rawa nira vakamamautaki vakayalo na tamata i Jiova. (Aisea 65:13) Meda gumatuataka mada ga na noda vakayagataka kece na kakana vakayalo e vakarautaki ena isoqosoqo i Jiova.​—Same 119:27.

TOKONA NA ITUVATUVA NI ISOQOSOQO

13, 14. O cei era tokona tiko na ituvatuva i Jiova e lomalagi, eda na vakaraitaka tale ga vakacava na noda veitokoni e vuravura?

¹³ Ena nona raivotu na yapositolo o Joni, a vodoka tiko o Jisu e dua na ose vulavula me ravuti ira na tusaqati Jiova. (Vkta. 19:​11-15) E veivakayaloqaqataki dina noda kila nira muri Jisu tiko na agilosi yalodina kei ira na lumuti era qaqa e vuravura, o ira qori era sa taura na nodra icovi ni bula e lomalagi! (Vkta. 2:​26, 27) Era ivakaraitaki vinaka ena nodra tokona na ituvatuva i Jiova!

¹⁴ Na isoqosoqo levu tale ga e tokona vinaka tiko na nodra cakacaka na taci Karisito lumuti era se bula tiko e vuravura, o ira qo era liutaka tiko na isoqosoqo i Jiova e vuravura ena gauna qo. (Wilika Sakaraia 8:23.) Eda na vakaraitaka vakacava nida tokona na ituvatuva i Jiova? Dua na sala, oya na noda talairawarawa vei ira era liutaki keda. (Iper. 13:​7, 17) Ena tekivu sara ga qori ena noda ivavakoso. Vakacava e laurai ena ka eda dau tukuna me baleti ira na qase nida dokai ira kei na nodra veiliutaki? Eda dau uqeti ira na luveda mera dokai ira na tagane yalodina qori, mera dau kerea tale ga na nodra veidusimaki vakaivolatabu? Vakacava eda dau veivosakitaka tale ga vakavuvale na sala eda rawa ni tokona kina vakailavo na cakacaka e vuravura raraba ena noda cau? (Vkai. 3:9; 1 Kor. 16:2; 2 Kor. 8:12) Eda dau raica vakabibi na kena samaki kei na kena vakavinakataki na Vale ni Soqoni? Ke da dau veidokai da qai duavata, ena sega ni tarovi na cakacaka ni yalo tabu. Na yalo tabu qori ena vakaukauataki keda tiko ga meda kua ni vakacauoca ena iotioti ni veisiga qo.​—Aisea 40:​29-31.

MEDA BULATAKA NA ITUKUTUKU EDA KACIVAKA

15. Na cava meda sasaga tiko ga kina me salavata kei na noda bula na inaki cecere i Jiova?

¹⁵ Me rawa nida vosota da qai toso vata tiko ga kei na isoqosoqo i Jiova, e dodonu meda bulataka na itukutuku eda kacivaka nida “vakadeitaka tiko ga na ka e vakadonuya na Turaga” ena noda ivalavala. (Efeso 5:​10, 11) Nida sega ni uasivi qai veivakamuai tale tu ga o Setani kei na vuravura ca qo, eda na sasaga tiko ga e veigauna meda valuta na veivakamuai cala. Eso vei kemuni na mataveitacini oni sasaga e veisiga me dei tiko ga na nomuni veiwekani kei Jiova. Oni ka talei kina vua qori. Kua ni yalolailai! Ni salavata kei na noda bula na inaki i Jiova, eda na marau vakalevu, eda nuidei tale ga ni sega ni ka wale na noda sokalou.​—1 Kor. 9:​24-27.

16, 17. (a) Na cava meda cakava ke da cala bibi? (b) E yaga vakacava vei keda na ivakaraitaki i Ana?

¹⁶ Ia vakacava ke da cala bibi? Mo qara na veivuke ena kena gauna totolo duadua. Ena qai ca sara vakalevu ke o vunitaka tiko. Nanuma na ka e tukuna o Tevita me baleta na nona vunitaka na nona cala, ‘a vuca na suina ena nona vutugu ena siga kei na bogi.’ (Same 32:3) Io, na noda vunitaka na noda cala ena vakaocai keda ga vakayago, vakayalo tale ga, ia o koya “sa vakatusa ka biuta ena lomani.”​—Vkai. 28:13.

¹⁷ Dikeva mada qo na ivakaraitaki i Ana.a A dua na painia tudei o Ana ni se goneyalewa. Ia ni toso na gauna, sa rua tu na ivakarau ni nona bula. E vakaleqai koya sara ga qori. E kaya: “E ca na noqu lewaeloma. Au rarawa qai lomabibi tu ga.” Na cava e qai cakava? E tukuna ni a vakamacalataki ena dua na soqoni na Jemesa 5:​14, 15. A kila sara o Ana ni dodonu me qara na veivuke, mani kerea na nodratou veivuke na qase. Ni vakasamataka lesu, e tukuna: “E vola sara ga mai o Jiova na tikinivolatabu ya me wainimate vakayalo. E dredre me tilomi na wainimate ya, ia sa bau mana dina. Au muria na ivakasala ena tikinivolatabu ya qai yaga dina vei au.” Ni oti e vica tale na yabaki, sa gugumatua tale ni qaravi Jiova o Ana ena lewaeloma vinaka.

18. Na cava meda nakita dei meda cakava?

¹⁸ Dua dina na ka dokai meda bula ena iotioti ni veisiga qo da qai lewena na isoqosoqo veivakurabuitaki i Jiova! Meda nakita dei mada ga meda kua ni raica vakamamada na veika kece e soli vei keda. Ia meda saga vakavuvale meda tiko wasoma ena soqoni ena noda ivavakoso meda sokalou, meda gumatua ni vaqarai ira na yalomalumalumu ena noda yalava, da qai vakamareqeta na kakana vakayalo e dau vakarautaki ena vukuda. Meda tokoni ira era liutaki keda tiko qai bulataka na itukutuku eda kacivaka. Ke da cakava qori eda na toso vata tiko kei na isoqosoqo i Jiova, eda na sega tale ga ni vakacauoca ena caka vinaka!