O Bau Kila?

A tara tale na valenisoro e Jerusalemi ni oti na 70 S.K.?

E TUKUNA o Jisu nira na sega ni veitaqataqai tale tiko na vatu ena valenisoro i Jiova​—a vakayacori na parofisai qori ena 70 S.K., ena gauna a vakarusai Jerusalemi kina na mataivalu ni Roma a liutaka o Titus. (Maciu 24:2) A qai tuvanaka e muri o Empara Julian me tara tale na valenisoro.

E vakatokai o Julian me iotioti ni empara ni Roma e lotu butobuto. E wili me luvei Constantine na Ka Levu o Julian, e vakavulici ena ivakavuvuli e nanumi ni vaKarisito. Ia ena gauna sa kilai kina ni sa empara ena 361 S.K., a vakaraitaka o Julian na nona cata na ivakavuvuli qori kei na veidabui ni lotu vaKarisito qai tokona na lotu butobuto. E vakatokai o Julian ena ivola ni itukutuku makawa me “Vukitani.”

E dau cata na lotu vaKarisito o Julian. A rairai vakavuna qori na nona raica ni se qai yabaki ono na nodra vakamatei tamana kei ira na wekai tamana o ira era matataki ira na lotu vaKarisito. Era tukuna na daunitukutuku makawa ni lotu ni a uqeti ira na Jiu o Julian mera tara tale na nodra valenisoro, ni vakabauti ena vakadinadinataki kina ni parofita lasu o Jisu.a

E sega ni vakatitiqataki ni a lalawataka dina o Julian me tara tale na valenisoro. Era veibataka na daunitukutuku makawa ke a tekivuna dina o Julian na cakacaka qori, na cava e qai tarova ke a sa tekivu na cakacaka. Ia e dua ga na ka eda vakadeitaka. A vakamatei o Julian ni se bera mada ga ni rua na yabaki na nona veiliutaki, a sa mai oti tale ga e keri na nona sasaga me baleta na valenisoro.