Vakatotomuria na Yalodina i Jiova kei na Nona Veivosoti

1, 2. (a) Na cava eda taleitaki ira kina na itokani era yalodina ra qai dau veivosoti? (b) Na taro cava eda na veivosakitaka?

O NA vakamacalataka vakacava e dua e itokani dina? “Vei au, e itokani dina o koya e tokoni iko e veigauna, e vosoti iko ke o cala.” Qori na ka e kaya e dua na yalewa lotu vaKarisito o Ashley. O keda kece eda taleitaki ira na itokani era yalodina ra qai dau veivosoti. Eda marau qai lomavakacegu nida tiko kei ira va qori, nida kila nira lomani keda qai tokoni keda tu ga.​—Vkai. 17:17.

² E sega tale ni dua na itokani e vakataki Jiova ena nona yalodina kei na nona dau veivosoti. Me vaka ga e vakamacalataka na daunisame: “Kemuni sa Turaga dauyalovinaka, ka daulomadonu [se dauveivosoti]; ka daulevu na nomuni loloma [se “loloma dei”] vei ira kecega era tagi vei kemuni.” (Same 86:5) Na cava e kena ibalebale meda yalodina qai dau veivosoti? E laurai vakacava vei Jiova na itovo talei qori? Eda na vakatotomuri koya vakacava? Na isau ni taro qori ena vakatitobutaka na noda lomani Jiova, na noda itokani vinaka duadua. Ena uqeti keda tale ga meda vakavinakataka na noda veimaliwai kei ira na tacida vakayalo.​—1 Joni 4:​7, 8.

DAU YALODINA O JIOVA

3. Na cava e kena ibalebale meda yalodina?

³ E dua na itovo talei na yalodina, e okati kina na nomu solia na nomu vinaka taucoko, o daudina qai dei tu ga. O koya e yalodina e sega ni dau yamekemeke. E dina tu ga vua e dua (se dei tiko ga ena dua na ka), ena kabiti koya tu ga e dua (se dei tiko ga ena dua na ka) ke sotavi mada ga na ituvaki dredre. Io, e sega ni dua e uasivia na “yalodina” i Jiova.​—Vkta. 16:5.

4, 5. (a) E laurai vakacava vei Jiova na yalodina? (b) Ena vakayaloqaqataki keda vakacava na noda vakasamataka na yalodina i Jiova?

⁴ E laurai vakacava vei Jiova na yalodina? E sega vakadua ni biuti ira era sokaloutaki koya ena yalodina. Dua vei ira qori o Tui Tevita, a vakadinadinataka sara ga na yalodina i Jiova. (Wilika Same 101:6.) Ena gauna a vakatovolei kina o Tevita, a yalodina o Jiova ena nona dusimaki koya, taqomaki koya, vakabulai koya tale ga. (2 Sam. 22:1) E kila o Tevita ni yalodina i Jiova e sega ni yalani ga ena ka e tukuna. Na cava a yalodina kina o Jiova vei Tevita? Baleta ni a ‘yalodina’ tale ga o Tevita. E vakamareqeta o Jiova nodra yalodina nona tamata, qai dolea qori ena nona yalodina tale ga vei ira.​—Vkai. 2:​6-8.

⁵ Ena vakayaloqaqataki keda na noda vakasamataka na sala e dau vakaraitaka kina o Jiova nona yalodina. E tukuna o Reed e dua na tacida tagane yalodina: “E yaga vakalevu na noqu wilika na ka e cakava o Jiova vei Tevita ni sotava na ituvaki dredre. Ni veidroyaki o Tevita qai vuni voli ena qaravatu kei na so tale na vanua, a karoni koya tu ga o Jiova. E vakayaloqaqataki au sara ga qori! Au vulica kina se mani cava au sotava se dredre vakacava na ituvaki, ena tokoni au tu ga o Jiova keu yalodina tiko ga vua.” Sega ni vakabekataki ni va tale ga qori na nomu rai.​—Roma 8:​38, 39.

6. Na sala cava tale e laurai kina vei Jiova na yalodina, e yaga vakacava qori vei ira nona dauveiqaravi?

⁶ Na sala cava tale e laurai kina vei Jiova na yalodina? E dei tu ga ena nona ivakatagedegede. E vakadeitaka vei keda: “Ka’u sai koyakoya tikoga ka yacova na gauna dou na qase kina.” (Aisea 46:4) E dau yavutaka nona vakatulewa ena nona ivakatagedegede dei e vauca na ka e donu kei na ka e cala. (Mala. 3:6) E vakaraitaka tale ga o Jiova na nona yalodina ena nona daudina ena nona yalayala. (Aisea 55:11) Na yalodina gona i Jiova e yaga vei keda kece na dausokalou yalodina. Ena sala cava? Nida saga ena noda vinaka kece meda muria na ivakatagedegede i Jiova, eda nuidei ni na dina ena nona yalayala me vakalougatataki keda.​—Aisea 48:​17, 18.

VAKATOTOMURIA NA YALODINA I JIOVA

7. Na cava e dua na sala eda rawa ni vakatotomuria kina na nona yalodina na Kalou?

⁷ Eda na vakatotomuria vakacava na yalodina i Jiova? Dua na sala oya noda vukei ira eso tale nira sotava na ituvaki dredre. (Vkai. 3:27) Kena ivakaraitaki, o bau kila e dua na tacimu vakayalo e rairai vakayalolailaitaki koya tiko na tauvimate, veitusaqati e vale se nona malumalumu? Vakacava mo vakaliuliu ena nomu cavuta vua na ‘vosa vinaka e veivakacegui’? (Saka. 1:13)a Ni o cakava qori, o sa vakaraitaka tiko ni o itokani yalodina qai nuitaki, ‘o volekati koya cake, e yawa na tacina dina.’​—Vkai. 18:24.

8. Mera vakatotomuria vakacava na yalodina i Jiova na veiwatini?

⁸ Eda rawa ni vakatotomuria tale ga na yalodina i Jiova ena noda dina tiko ga vei ira eda lomana. Kena ivakaraitaki, eda kila ni dodonu meda yalodina tiko ga vei ira na keda isa ke da vakawati. (Vkai. 5:​15-18) Eda na sega kina ni taura na imatai mada ga ni kalawa e rawa ni tini ena veibutakoci. (Maciu 5:28) Eda vakaraitaka tale ga na noda yalodina vei ira na tacida vakayalo nida sega ni dau kakase se vakaucaca, eda na sega ni via vakatetea se vakarogoca na italanoa va qori.​—Vkai. 12:18.

9, 10. (a) O cei e bibi duadua meda yalodina vua? (b) Na cava ena sega ni rawarawa kina meda muria na ivakaro i Jiova?

⁹ E bibi sara meda yalodina tiko ga vei Jiova. Eda na cakava vakacava qori? Ena noda saga meda vakatotomuria na nona rai​—meda taleitaka na ka e taleitaka da qai cata na ka e cata​—me qai laurai sara ga qori ena noda bula. (Wilika Same 97:10.) Nida saga ena noda vinaka kece meda vakatotomuria na nanuma kei na rai i Jiova, ena rawarawa na noda muria na nona ivakaro.​—Same 119:104.

¹⁰ Ena sega ni rawarawa meda muria na ivakaro i Jiova. Ena rairai vinakati na sasaga meda yalodina tiko ga kina. Kena ivakaraitaki, era na rairai vinakata eso na lotu vaKarisito mera vakawati, ia era se sega ni kunea e dua e ganiti ira ena ivavakoso. (1 Kor. 7:39) Ena rairai raica e dua na yalewa lotu vaKarisito dawai nira saga tiko na nona itokani vakacakacaka era sega ni qaravi Jiova mera veikilaitaki koya vua e dua era nanuma me watina. De dua e vosota dredre voli na bula galili na tacida yalewa qori. Ia e saga me yalodina tiko ga vei Jiova. Eda marautaka dina na ivakaraitaki vakasakiti va qori ni yalodina! O Jiova ena vakalougatataki ira dina era yalodina tiko ga vua se mani ituvaki dredre cava era sotava.​—Iper. 11:6.

DAU VEIVOSOTI O JIOVA

11. Na cava e kena ibalebale meda dau veivosoti?

¹¹ Dua tale na itovo talei i Jiova na nona tu vakarau me veivosoti. Na cava e kena ibalebale meda dau veivosoti? E okati kina na noda vosoti koya e cala ke veivutuni dina. Na noda vosota e dua e sega ni kena ibalebale nida vakadonuya na nona cala se nida cakitaka ni a cala dina. Ia eda na sega ni katona tale tiko nona cala. E tukuna na iVolatabu ni o Jiova e dau ‘tu vakarau me vosoti’ ira era veivutuni dina.​—Same 86:5.

12. (a) E vakaraitaka vakacava o Jiova ni dau veivosoti? (b) Na cava e kena ibalebale me “bokoci” na ivalavala ca?

¹² E vakaraitaka vakacava o Jiova ni dau veivosoti? O Jiova e dau veivosoti ‘vakalevu,’ e bokoca qai guilecava vakadua na cala ni sa veivosoti. (Aisea 55:7) Eda kila vakacava ni bokoca na cala o Jiova ena gauna e veivosoti kina? Raica mada na ka e yalataki ena Cakacaka 3:19. (Wilika.) A uqeti ira na vakarorogo na yapositolo o Pita mera ‘veivutuni, mera saumaki.’ Ni veivutuni dina o koya e cala, e rarawataka dina na ka e cakava qai vakadeitaka me kua ni cakava tale na cala oya. (2 Kor. 7:​10, 11) Na veivutuni dina ena qai uqeti koya e cala me “saumaki,” me biuta na nona ivakarau ca qai cakava na ka e vinakata na Kalou. Ke ra veivutuni dina o ira na vakarogoci Pita, na cava ena yaco? E kaya o Pita ni na rawa ni “bokoci” na nodra ivalavala ca. Na vosa qori e vakadewataki mai na vosa vaKirisi e kena ibalebale “qusia, kauta laivi.” Ni veivosoti gona o Jiova, e vaka ga e qusia e dua na ka me savasava. E bokoca sara ga na ivalavala ca.​—Iper. 10:22; 1 Joni 1:7.

13. Na cava e vakadeitaka vei keda na matavosa “na nodrai valavala ca ka’u na sega ni nanuma tale”?

¹³ Eda kila vakacava ni dau guilecava vakadua o Jiova na cala ni sa veivosoti? Raica mada na parofisai i Jeremaia me baleta na veiyalayalati vou e caka vei ira na lotu vaKarisito lumuti, e rawa sara ga kina ni vosoti na nodra cala o ira era vakabauta na ivoli. (Wilika Jeremaia 31:34.) E tukuna o Jiova: “Ni’u na bokoca na nodra caka cala, ia na nodrai valavala ca ka’u na sega ni nanuma tale.” E vakadeitaka gona o Jiova ni gauna e veivosoti kina, ena sega ni totogitaki keda tale ena cala qori ena dua na gauna e muri. E sega ni dau katona na cala me beitaki se totogitaki keda tale kina. Ia ni veivosoti o Jiova, e sega ni nanuma tale tiko na cala​—e guilecava vakadua.​—Roma 4:​7, 8.

14. Ena vakacegui keda vakacava na noda vakasamataka vakatitobu na veivosoti i Jiova? Tukuna e dua na kena ivakaraitaki.

¹⁴ Ena vakacegui keda na noda vakasamataka vakatitobu na veivosoti i Jiova. Raica mada e dua na kena ivakaraitaki. A vakasivoi ena vica vata na yabaki sa oti e dua na yalewa lotu vaKarisito eda na vakatokai koya o Alena. Oti e vica vata na yabaki sa qai vakalesui mai. E tukuna o Alena: “Au dau tukuna lo, au tukuna tale ga vei ira eso tale niu vakabauta ni sa vosoti au o Jiova. Ia au dau nanuma tale ga ni yawaki au o Jiova, era volekati koya cake eso tale, o koya tale ga e volekati ira.” A vakacegui Alena na nona wilika kei na nona vakasamataka vakatitobu na vosa vakatautauvata ena iVolatabu e vakamacalataki kina na veivosoti i Jiova. E kaya: “Au sega sara ga ni bau vakasamataka va ya na loloma i Jiova kei na nona veikaroni.” Qo na vakasama e tarai koya vakalevu: “Ni vosota o Jiova na noda ivalavala ca, e sega tale ni gadrevi meda leqataka voli noda ivalavala ca oqori ena vo ni noda bula.”b E tomana o Alena: “Au qai kila niu sega tu ni vakabauta ni rawa ni vosoti au o Jiova, au nanuma tale ga niu na leqataka voli qori ena vo ni noqu bula. Au kila ni na taura na gauna, ia au sa tekivu vakila qo niu rawa ni toro voleka vei Jiova, e vaka me sa taluva tale ga vei au e dua na icolacola.” Sa dauloloma dina qai dau veivosoti na Kalou eda qarava!​—Same 103:9.

VAKATOTOMURIA NA VEIVOSOTI I JIOVA

15. Eda na vakatotomuria vakacava na veivosoti i Jiova?

¹⁵ Eda na vakatotomuria na veivosoti i Jiova nida vosoti ira tale ga era veivutuni dina. (Wilika Luke 17:​3, 4.) Nanuma tiko ni gauna e vosoti keda kina o Jiova, e guilecava na noda cala ni sega ni dau ceuta tale mai me cudruvi keda kina. Nida veivosoti tale ga, meda guilecava sara na cala e vakayacori da qai kua ni kauta cake tale mai.

16. (a) Vakacava e ibalebale ni veivosoti na noda vakadonuya na cala se noda vakalaiva meda vakalolomataki? Vakamacalataka. (b) Na cava meda cakava me vosoti keda kina na Kalou?

¹⁶ Na noda veivosoti e sega ni kena ibalebale meda vakadonuya na cala se vakalaiva meda vakalolomataki. E kena ibalebale ga meda kua ni katona tale tiko na ca. Ia me vosoti keda na Kalou, e bibi meda vakatotomuria na veivosoti i Jiova ena noda bula e veisiga. (Maciu 6:​14, 15) E nanumi keda o Jiova ni kila “ni da sa kuvu-ni-soso.” (Same 103:14) Io, na veinanumi e dodonu me uqeti keda tale ga meda kua ni kauaitaka na nodra malumalumu eso tale da qai veivosoti vakarawarawa mai vu ni lomada.​—Efeso 4:32; Kolo. 3:13.

17. Na cava meda cakava ke vakacudrui keda e dua na tacida vakayalo?

¹⁷ E sega dina ga ni rawarawa na veivosoti. A dredre mada ga vei ira eso na lotu vaKarisito lumuti ena imatai ni senitiuri mera veivakameautaki. (Fpai. 4:2) Na cava meda cakava ke vakacudrui keda e dua na tacida vakayalo? Raica mada na ivakaraitaki i Jope. A vakacudrui koya vakalevu na nodratou veibeitaki na nona “itokani”​—o Elifasi, Pilitati, kei Sofa. (Jope 10:1; 19:2) A vunauci ratou o Jiova ena nodratou veibeitaki vakailasu, qai vakarota me ratou lai raici Jope, me ratou cabora na isoro ni nodratou ivalavala ca. (Jope 42:​7-9) Ia e vinakata o Jiova me cakava tale ga o Jope e dua na ka. Na cava oya? A tukuna o Jiova me masulaki ratou na beitaki koya. A cakava o Jope na ka e tukuna o Jiova, a qai vakalougatataki ena nona veivosoti. (Wilika Jope 42:​10, 12, 16, 17.) Na cava eda vulica? Ena yaga na noda masulaka e dua e vakacudrui keda nida na sega ni katona tale tiko na ca e cakava.

VAKATOTOMURIA VINAKA TIKO GA NA ITOVO I JIOVA

18, 19. Eda na vakatotomuria vinaka vakacava na itovo talei i Jiova?

¹⁸ E veivakacegui dina na noda veivosakitaka na itovo talei i Jiova. Eda vulica kina na nona torovi rawarawa, sega ni veivakaduiduitaki, lomasoli, yalorawarawa, yalodina, qai dau veivosoti. Ia e lailai sara na ka eda dikeva qo. E levu tale na ka marautaki eda na qai vulica me baleti Jiova me sega ni mudu. (Dauv. 3:11) Eda duavata kei na ka e vola na yapositolo o Paula: “Sa uasivi dina ga na veivakalougatataki ni Kalou, na nona vuku kei na nona kilaka!” Qori e wili kina na loloma kei na ono na itovo eda sa veivosakitaka mai.​—Roma 11:33.

¹⁹ Meda saga tiko ga meda vakatotomuria vinaka sara na itovo talei i Jiova. Eda na cakava qori ena noda vulica nona itovo, noda vakasamataka da qai vakatotomuria sara. (Efeso 5:1) Eda sa na qai duavata ga kina kei na daunisame ni lagata: “Koi au, e yaga vei au me’u toro vua na Kalou.”​—Same 73:28.