‘Raica, Au na Tiko Vata Kei Kemuni e Veisiga Kece’

1. (a) Vakamacalataka vakalekaleka na vosa vakatautauvata ni witi kei na co ca. (b) E vakamacalataka vakacava o Jisu na kena ibalebale?

ENA dua na vosavakatautauvata i Jisu me baleta na Matanitu ni Kalou, e vakamacalataki kina na dauteitei e kaburaka na itei vinaka ni witi kei na meca e kaburaka na co ca ena loganiwiti. E tubu sivita na witi na co ca, ia a qai vakaroti ira nona dauveiqaravi na dauteitei mera “laiva me rau tubu vata tiko me yacova na gauna ni tatamusuki.” Ena gauna ni tatamusuki, era vakarusai na co ca, ra qai kumuni na witi. E qai vakamacalataka o Jisu na vosa vakatautauvata qori. (Wilika Maciu 13:​24-30, 37-43.) Na cava e kilai mai na vosa vakatautauvata qo? (Raica na kato “Na Witi kei na co Ca.”)

2. (a) Na cava e vakaraitaka na veika era yaco tiko ena nona were na dauteitei? (b) Na tikina cava ena vosa vakatautauvata eda na veivosakitaka?

² Na veika era yaco tiko ena nona were na dauteitei e vakaraitaka na sala kei na gauna ena kumuni ira kina na ilawalawa witi o Jisu, qori o ira na lotu vaKarisito lumuti era na veiliutaki kei koya ena Matanitu ni Kalou. A tekivu na kakaburaki ena Penitiko 33 S.K. Ena oti na kumukumuni nira sa dregati kece ra qai kau e lomalagi na lumuti era se bula tiko ni cava na ituvaki qo. (Maciu 24:31; Vkta. 7:​1-4) Me vaka ga nona rawa ni raica vinaka e dua na veika e yavoliti koya ni tu mai na dua na ulunivanua cere, e rawa tale ga nida kila vinaka mai na vosa vakatautauvata qori na veika era na yaco ena rauta na loma ni 2,000 na yabaki. Mai na noda rai, na cava eso na ka me baleta na Matanitu ni Kalou eda kila ni na yaco? E vakamacalataki ena vosa vakatautauvata na gauna ni kakaburaki, tubu, kei na tatamusuki. Ena veivosakitaki vakalevu ena ulutaga qo na gauna ni tatamusuki.a

VEITAQOMAKI O JISU

3. (a) Na cava e yaco ni sa oti na imatai ni senitiuri? (b) Na taro cava a basika ena Maciu 13:​28, o cei e taroga qori? (Raica tale ga na ikuri ni ivakamacala.)

³ Ni se qai tekivu na ikarua ni senitiuri S.K., era ‘kadre na co ca’ nira basika ena were kei vuravura na lotu vaKarisito lasu. (Maciu 13:26) Ena ikava ni senitiuri era sa lewe levu sara na lotu vaKarisito era vaka na co ca, era lailai na lotu vaKarisito lumuti. Nanuma tiko ena vosa vakatautauvata qori, era kerea na dauveiqaravi vua nodra turaga mera cavuraka na co ca.b (Maciu 13:28) Na cava e qai tukuna na nodra turaga?

4. (a) Na cava e kilai ena nona isau ni taro na Turaga o Jisu? (b) Gauna cava e sa qai kilai kina o ira na lotu vaKarisito era vaka na witi?

⁴ E tukuna o Jisu me baleta na witi kei na co ca: “Laiva me rau tubu vata tiko me yacova na gauna ni tatamusuki.” E kilai mai na ivakaro qori ni tekivu mai na imatai ni senitiuri me yaco mai nikua, era dau tiko ga eso na lotu vaKarisito lumuti e vuravura era vaka na witi. E qai vakadeitaki qori ena ka e tukuna e muri o Jisu vei ira na nona tisaipeli: ‘Au na tiko vata kei kemuni e veisiga kece.’ (Maciu 28:20) Ena taqomaki ira gona na lotu vaKarisito lumuti o Jisu e veisiga me yacova sara na ivakataotioti. Ia ni lailai na kedra iwiliwili mai vei ira na lotu vaKarisito era vaka na co ca, eda sega ni vakadeitaka sara kina se o cei e lewena na ilawalawa ni witi ena loma ni gauna balavu ya. Ia ni vo e rauta e 30 na yabaki me qai tekivu na gauna ni tatamusuki, e sa qai kilai se o cei e wili ena ilawalawa witi. E kilai vakacava ya?

ITALAI E ‘CARAMAKA NA SALA’

5. E vakayacori vakacava ena imatai ni senitiuri na parofisai i Malakai?

⁵ Ni bera na vica na senitiuri me qai tukuna o Jisu na vosa vakatautauvata me baleta na witi kei na co ca, o Jiova a uqeta na nona parofita o Malakai me parofisaitaka na veika ena yaco ena vosa vakatautauvata i Jisu. (Wilika Malakai 3:​1-4.) Na Dauveipapitaisotaki o Joni na ‘italai a caramaka na sala.’ (Maciu 11:​10, 11) Ena gauna a basika kina o Joni ena 29 S.K., sa voleka na gauna me lewai kina na matanitu o Isireli. O Jisu na ikarua ni italai. A vakasavasavataka vakarua na valenisoro e Jerusalemi​—kena imatai ni tekivu nona cakacaka vakaitalatala, na kena ikarua na gauna sa vakarau oti kina. (Maciu 21:​12, 13; Joni 2:​14-17) Koya gona, e taura toka e dua na gauna na veivakasavasavataki i Jisu.

6. (a) A vakayacori vakacava ena ivakatagedegede e levu cake na parofisai i Malakai? (b) Gauna cava a dikeva kina o Jisu na valenisoro vakayalo? (Raica tale ga na ikuri ni ivakamacala.)

⁶ Ena vakayacori vakacava ena ivakatagedegede e levu cake na parofisai i Malakai? Ena vicasagavulu na yabaki ni bera na 1914, eratou a cakava o C. T. Russell kei ira na nona itokani voleka na cakacaka e tautauvata kei na kena a cakava o Joni na Dauveipapitaisotaki. Qori na cakacaka bibi ni kena vakalesui mai na ka dina vakaivolatabu. Era vakavulica na Gonevuli ni iVolatabu na ibalebale dina ni isoro ni veivoli i Karisito, vakatakila na ivakavuvuli lasu ni bukawaqa e eli, ra qai kacivaka ni sa vakarau cava na Nodra Gauna na Veimatanitu ena 1914. Ia era se tukuna tiko ga e levu na isoqosoqo lotu nira imuri i Karisito. E bibi gona me saumi na taro qo: O cei vei ira na ilawalawa qo era witi? A saumi na taro qori ena nona tekivu dikeva o Jisu na valenisoro vakayalo ena 1914. Na nona dikeva qori kei na nona veivakasavasavataki e taura toka e dua na gauna​—mai na 1914 ina itekitekivu ni 1919.c

GAUNA NI VAKADIDIKE KEI NA VEIVAKASAVASAVATAKI

7. Na cava a raica o Jisu ena gauna sa tekivu vakadidike kina ena 1914?

⁷ Na cava a raica o Jisu ena gauna a tekivu vakadidike kina? A raica ni dua na ilawalawa lailai ni Gonevuli ni iVolatabu gugumatua, era vakayagataka ena sivia na 30 na yabaki na nodra igu kei na nodra iyau mera vakaitavi vakalevu ena cakacaka vakavunau.d Sa na wacava mada ga na nona marau o Jisu kei ira na agilosi mera raica ni o ira na co ca i Setani era sega ni vakaleqa na vica na vu ni witi kaukaua! Ia a vinakati ga mera ‘vakasavasavataki na luvei Livai,’ o ira na lumuti. (Mala. 3:​2, 3; 1 Pita 4:17) Cava na vuna?

8. Na cava e yaco ni oti na 1914?

⁸ Ena icavacava ni 1914, era yalolailai eso na Gonevuli ni iVolatabu nira sega ni lako e lomalagi. E vakadredretaka na nodra cakacaka vakavunau ena 1915 kei na 1916, na veitusaqati mai na taudaku ni isoqosoqo. Sa qai ca sara ni sa takali o Brother Russell ena Okotova 1916, nira veitusaqati sara ga na tiko ena loma ni isoqosoqo. E le va mai na vitu na dairekita ni Watch Tower Bible and Tract Society eratou saqata na nona digitaki o Brother Rutherford me liutaka na isoqosoqo. Eratou saga mera duiyaloyalo na mataveitacini, ia ena Okosita 1917, eratou biubiu mai Peceli​—dua dina na veivakasavasavataki! Eso tale ga na Gonevuli ni iVolatabu e vakaleqai ira nodra rerevaka na tamata. Ia era yalorawarawa mera ciqoma vakailawalawa na veivakasavasavataki i Jisu ra qai cakava na veisau e gadrevi. E raici ira gona o Jisu mera lotu vaKarisito dina era vaka na witi, ia e sega ni vakadonui ira kece na lotu vaKarisito lasu, wili kina o ira kece na lewe ni Lotu ni Veivanua Vakarisito. (Mala. 3:5; 2 Tim. 2:19) Na cava e yaco tarava? Me kilai qori, meda raica tale mada na vosa vakatautauvata me baleta na witi kei na co ca.

CAVA E YACO NI TEKIVU NA GAUNA NI TATAMUSUKI?

9, 10. (a) Na cava eda na dikeva qo me baleta na gauna ni tatamusuki? (b) Na cava na imatai ni ka e yaco ena gauna ni tatamusuki?

⁹ E tukuna o Jisu: “Na gauna ni tatamusuki, na ivakataotioti ni veika vakavuravura.” (Maciu 13:39) A tekivu na gauna ni tatamusuki ena 1914. Eda na veivosakitaka e lima na ka e parofisaitaka o Jisu ni na yaco ena gauna ya.

¹⁰ Kena imatai, ena cavuraki na co ca. E kaya o Jisu: “Ena gauna ya au na qai kaya vei ira na dautatamusuki, ni cavuraka mada e liu na co ca, ni vesuka vata.” Ni oti na 1914, o ira na agilosi era tekivu ‘cavuraki’ ira na lotu vaKarisito era vaka na co ca, ena nodra tawasei ira mai vei ira na lumuti era “luve ni matanitu.”​—Maciu 13:​30, 38, 41.

11. Me yacova mai qo, na cava e vakaduiduitaki ira tiko ga na lotu vaKarisito dina mai vei ira era kaya nira lotu vaKarisito?

¹¹ Sa qai matata ga na kedrau duidui na rua na ilawalawa ni sa cavuraki tiko na co ca. (Vkta. 18:​1, 4) E sa qai kilai ena 1919 ni sa bale o Papiloni na Ka Levu. Na cava e vakaduiduitaki ira vakalevu na lotu vaKarisito dina mai vei ira era kaya nira lotu vaKarisito? Na cakacaka vakavunau. O ira na liutaki ira tiko na Gonevuli ni iVolatabu era vakabibitaka na vunautaki ni Matanitu ni Kalou. Kena ivakaraitaki, a tabaki ena 1919 na ivola lailai To Whom the Work Is Entrusted, era uqeti kece kina na lotu vaKarisito lumuti mera vunau e veivale. E tukuni kina: “E rairai cakacaka levu, ia e nona na Turaga, eda na cakava rawa ga ena nona kaukaua. E ka dokai moni vakaitavi kina.” Cava sa qai yaco? Tekivu mai na gauna qori, e tukuni ena Watch Tower ni 1922 nira sa qai vakaitavi vakalevu ena cakacaka vakavunau na Gonevuli ni iVolatabu. Na cakacaka vakavunau e veivale sa vakatakilakilataki ira sara ga na lotu vaKarisito yalodina​—me vaka ga nikua.

12. Gauna cava era kumuni kina na ilawalawa era vaka na witi?

¹² Kena ikarua, nodra kumuni na witi. E vakaroti ira na nona agilosi o Jisu: ‘Kumuna na witi ina noqu lololo.’ (Maciu 13:30) Era sa kumuni tiko mai ena 1919 na lumuti ina ivavakoso vaKarisito sa vakasavasavataki. O ira na lumuti era na bula tiko ni cava na ituvaki qo era na qai kumuni kece nira sa rawata na nodra icovi vakalomalagi.​—Tani. 7:​18, 22, 27.

13. E vakamacalataki vakacava ena Vakatakila 18:7 na nona rai nikua na saqamua, se o Papiloni na Ka Levu, wili kina o Lotu ni Veivanua Vakarisito?

¹³ Kena ikatolu, tagi kei na katibati. Na cava e yaco nira sa vesuka vata na co ca na agilosi? E tukuna o Jisu me baleti ira na ilawalawa era vaka na co ca: “Era na tagi, era na katibati.” (Maciu 13:42) Vakacava e yaco tiko qori nikua? Sega. O Lotu ni Veivanua Vakarisito e wili tale ga vua na saqamua, e se tukuna tiko ga nikua: “Au sa dabe toka qo ena noqu idabedabe vakaranadi, au sega ni yada, au na sega sara ga ni lolosi.” (Vkta. 18:7) Io, e nanuma sara tu ga o Lotu ni Veivanua Vakarisito ni tu vua na lewa, e raqataka mada ga ni ‘dabe toka me vaka na nodra ranadi’ na iliuliu vakapolitiki. Ena gauna qo era se dokadoka tiko o ira na matataki ira na co ca, era se sega ni tagi. Ia qori sa na vakarau veisau.

14. (a) Na gauna cava era na “katibati” kina na lotu vaKarisito lasu, na vuna? (b) E lakovata vakacava kei na Same 112:10 na veisau ni ka eda kila me baleta na Maciu 13:42? (Raica na ikuri ni ivakamacala.)

¹⁴ Nira sa vakarusai kece na lotu lasu ena veivakararawataki levu, era na cici ni vaqara bula o ira na dauveitokoni tu e liu, ia ena sega ni dua na vanua mera vuni kina. (Luke 23:30; Vkta. 6:​15-17) Nira kila ni na sega ni drotaki rawa na veivakarusai, era na tagi ena rarawa ra qai “katibati” ena cudru. Me vaka ga e parofisaitaka o Jisu me baleta na veivakararawataki levu, era na “tavimabu ena vakaisaisa” ena gauna rarawataki ya.e​—Maciu 24:30; Vkta. 1:7.

15. Na cava ena caka vei ira na co ca, gauna cava ena yaco kina qori?

¹⁵ Kena ikava, ena kolotaki ina lovo e caudre tu. Na cava ena caka vei ira na ivesu co ca? O ira na agilosi era na ‘kolotaki ira qori ina lovo e caudre tu.’ (Maciu 13:42) Qori na nodra vakarusai vakadua. Era na vakarusai gona o ira na dauveitokoni tu vei lotu lasu ena iotioti ni iwasewase ni veivakararawataki levu, na Amaketoni.​—Mala. 4:1.

16, 17. (a) Na cava na iotioti ni ka e tukuna o Jisu ena nona vosa vakatautauvata ni na yaco? (b) Na cava eda tukuna kina ni na vakayacori na parofisai oya ena gauna e se bera mai?

¹⁶ Kena ikalima, era na ramase. E tinia o Jisu na nona parofisai ni kaya: “Ena gauna ya era na ramase na ivalavala dodonu me vaka na matanisiga ena matanitu nei Tamadra.” (Maciu 13:43) Gauna kei na vanua cava ena yaco kina qori? Ena qai vakayacori qori ena gauna se bera mai. A sega ni parofisaitaka o Jisu e dua na ka e yaco tiko ena gauna qo e vuravura, ia e dua na ka ena vakayacori mai lomalagi ena gauna se bera mai.f Dikeva e rua na vuna e dina kina qori.

¹⁷ Kena imatai, na gauna e vakayacori kina. E tukuna o Jisu: “Ena gauna ya era na ramase na ivalavala dodonu.” Na matavosa “gauna ya” e dusia tiko na ka e se qai cavuta ga o Jisu, qori nodra ‘kolotaki na co ca ina lovo e caudre tu.’ Ena yaco qori ena iotioti ni iwasewase ni veivakararawataki levu. Kena ibalebale era na qai “ramase” tale ga na lumuti ena gauna ya. Kena ikarua, na vanua ena vakayacori kina. E tukuna o Jisu nira na ‘ramase ena matanitu’ na ivalavala dodonu. Na cava e kena ibalebale? O ira kece na lumuti yalodina era se bula tiko e vuravura ni sa oti na imatai ni iwasewase ni veivakararawataki levu era sa na dregati taucoko. Me vaka ga e vakaraitaka o Jisu ena nona parofisai me baleta na veivakararawataki levu, era na kumuni e lomalagi. (Maciu 24:31) Qori na vanua era na ramase kina “ena matanitu nei Tamadra,” ena yaco qori ni oti ga na Amaketoni. Era na marautaka mera ‘vakamau kei na Lami,’ mera wati Jisu.​—Vkta. 19:​6-9.

KENA YAGA VEI KEDA

18, 19. E vukei iko vakacava na nomu kila na vosa vakatautauvata i Jisu me baleta na witi kei na co ca?

¹⁸ E yaga vakacava vei keda na noda sa mai kila vinaka na vosa vakatautauvata qo? Raica mada qo e tolu na sala. Kena imatai, e vakalevutaka na noda kilaka. E laurai mai na vosa vakatautauvata e dua na vuna bibi e se vakalaiva tiko ga kina o Jiova me yaco na veika ca. E ‘vosoti ira na iyaya cudruvi’ me vakarautaki ira kina na “iyaya lomani”​—na ilawalawa era vaka na witi.g (Roma 9:​22-24) Kena ikarua, e vakanuideitaki keda. Ni sa voleka na icavacava, ena qai kaukaua ga na nodra saqati keda na meca, ‘ia ena guce’ na nodra sasaga. (Wilika Jeremaia 1:19.) Me vaka ga na nona dau taqomaki ira voli mai na ilawalawa era vaka na witi o Jiova, na Tamada vakalomalagi ena tiko tale ga kei keda e ‘veisiga kece’ ena nona vakayagataki Jisu kei ira na agilosi.​—Maciu 28:20.

¹⁹ Kena ikatolu, eda rawa ni kilai ira kina na ilawalawa era vaka na witi. Na cava e bibi kina qori? Na noda kilai ira na lotu vaKarisito era vaka na witi eda rawa ni sauma kina na taro i Jisu me baleta na parofisai ni iotioti ni veisiga. A taroga o Jisu: “O cei mada na dauveiqaravi yalodina e vuku?” (Maciu 24:45) Na rua na ulutaga e tarava ena saumi kina vakadodonu na taro qori.