ULUTAGA LEVU: CAVA E LEVU KINA NA RARAWA? ENA OTI NI NAICA?

Era Mate na Sega ni Cala!

O Noelle e dua na goneyalewa lailai mamarau e dau taleitaka na droini. Ena dua na yakavi donuya na vulaikatakata e wavoki voli ena daku ni nodratou vale, lutu vakacalaka ena nodratou tobu ni sisili mani luvu sara. A tinikoso nona bula ni se vo e rua na macawa me yabaki va.

O Charlotte, Daniel, Olivia, Josephine kei na so tale na gone era lauvana mate ena dua na koronivuli mai Connecticut, e Merika ena 14 Tiseba, 2012. Era mate kina e 26, qai 20 vei ira qori era yabaki 6 se 7. Ena lotu ni veibulu, a cavuta yadudua na yacadra o Obama na peresitedi kei Merika, qai tukuna vei ira na tu e kea: “Ena sega ni yaco tale qo.”

Ena 1996, eratou biubiu mai Iraki me ratou toki i Norway na vuvale i Bano, e dua na goneyalewa yabaki 18. Era dau kacivi koya nona itokani ena yaca na Sun Rays. Ka ni rarawa ni o Bano e dua vei ira na le 77 era lauvana mate ena 22 Julai, 2011, vua e dua na turaga e dau vakaduduile. E tukuna ena dokadoka na turaga qori: “E vinaka ni . . . sega ni levu au vakamatea.”

E levu tale na itukutuku vakaloloma va qori e rogoci e veiyasa i vuravura. Vakasamataka mada na rarawa kei na mosi e vakilai ni yaco na vakacalaka, basulawa, ivalu, vakacaca ni batikadi, leqa tubukoso, kei na so tale na leqa lelevu. Dua na ka na levu ni tamata era rarawa ra qai mate, ia e sega na nodra cala!

Eso era beitaka na Kalou nira nanuma ni sega ni kauaitaka na kawatamata. Eso tale era tukuna ni raica vinaka tu na noda rarawa na Kalou, ia e sega ni via cakava kina e dua na ka. Era tukuna tale ga eso ni veika kece qori sa lewa ga ni Kalou. E duidui na ka era tukuna e levu me baleta na vakasama qo. Ia eda na kunea e vei na kena isau matata qai veivakacegui? Ena ulutaga tarava, eda na raica na ka e tukuna na iVolatabu me baleta na vuna e yaco kina na rarawa kei na sala ena vakaoti kina.

[iYaloyalo ena tabana e 3]