Cava e Levu Kina na Rarawa?

Me matata vei keda na vuna e levu kina na rarawa kei na nodra sega ni vakaotia rawa qori na tamata, e vinaka meda kila mada na veika e dau vakavuna. E duidui tu na nodra nanuma e levu me baleta na vuna eda rarawa kina, ia e tiko ena iVolatabu na kena isau matata. Ena vakamacalataki ena ulutaga qo e lima na vuna. E vinaka mo vakadeitaka sara ga qori mai na Vosa ni Kalou.​—2 Timoci 3:16.

◼ VEILIUTAKI CA

E tukuna na iVolatabu: “Ni ra sa lewa ko ira nai valavala ca, era sa qai tagi na tamata.”​—Vosa Vakaibalebale 29:2.

E dau voravora na nodra veiliutaki e levu na iliuliu ena veitabagauna sa oti, ra qai vakaloloma na lewe ni nodra matanitu. Eso na iliuliu e sega ni va qori na nodra veiliutaki, era vinakata mera vukei na lewenivanua. Ia e sega ni yaco na nodra inaki ni dau veiqatitaki na itutu ni veiliutaki. Era dau vakayagataka tale ga vakatani na nodra lewa mera rawaka kina ra qai vakaloloma o ira na vakarurugi ena nodra lewa. E tukuna o Henry Kissinger, a Vunivola tu e liu ni dua na yasayasa o Merika: “E laurai ena veigauna sa oti ni dau dreve na nodra sasaga na veiliutaki, era vakanuinuikara wale tu ga.”

E tukuna tale ga na iVolatabu: “Sa sega ni vu mai vua na tamata sa lako tu me lewa na nonai lakolako.” (Jeremaia 10:23) Nida ivalavala ca, e sega gona vei keda na vuku kei na yalomatua meda lewa vakavinaka na noda bula. Ke sa sega ni lewai koya rawa vakavinaka e dua na tamata, ena qai rawa vakacava me liutaka vinaka e dua na matanitu? Vakacava o sa kila na vuna e sega ni rawa kina vei ira na iliuliu vakatamata mera vakaotia na rarawa? Io, na ca ni veiliutaki e vakavuna vakalevu na rarawa!

◼ VEIVAKAMUAI O LOTU LASU

E tukuna o Jisu: “Na ka qo era na kila kece kina ni dou noqu tisaipeli, ke dou veilomani.”​—Joni 13:35.

Era dau vunautaka na veilomani kei na veiyaloni na iliuliu ni veimatalotu, ia era sega ni vakavulica vei ira na nodra lewenilotu na mataqali loloma ena vakaduavatataki ira. Era vakavuna ga na veisei, veicati, kei na veivakaduiduitaki vakamatatamata. Ena itinitini ni nona ivola na Christianity and the World Religions, e vola o Hans Küng, na daunicioloji: “Na veileti vakapolitiki voravora qai torosobu duadua e monataka se veivakamuai kina o lotu.”

Eso tale ga na iliuliu ni lotu era vakadonuya na veiyacovi ni bera na vakamau, veibutakoci, kei na veimoceri vakatagane se vakayalewa. Qori e vakavuna na dewa ni mate, vakalutu e nakiti, buketeisala, kavoro ni vuvale, rarawa kei na nuiqawaqawa.

◼ IVALAVALA CA, NANUMI KEDA GA

“E vakatovolei na tamata yadua ni bacani koya qai siwati koya na nona gagadre ca. Ni sa matua na nona gagadre ca, sa qai vakasucuma na nona ivalavala ca; ni sa votu na nona ivalavala ca, qo ena vakavuna nona mate.”​—Jemesa 1:​14, 15.

Eda dau cala kece nida kawa ivalavala ca, qai vinakati meda vorata na gagadre ni “ka e vinakata na yagoda.” (Efeso 2:3) E dau dredre meda vorata na gagadre ca ni basika na ituvaki meda vakaceguya kina na gagadre qori. Ke da rawai ena gagadre ca ni lomada, ena yaco ga kina na leqa.

E vola o P. D. Mehta e dua na dauvolaivola: “E levu na rarawa e dau vu ga mai na gagadre ca ni lomada, marau vakalialia, kocokoco, kei na noda via rogo.” Ke dua e dau dokai ena dua na itikotiko, ia e dau garova se bobula ena alakaolo, wainimategaga, veimauilavo, veiyacovi, kei na so tale, ena rogorogo ca kina ra qai rarawa na nona vuvale, itokani kei na so tale. Nida kila nida ivalavala ca, eda na vakadinata na ka e tukuna na iVolatabu: “Ni da sa kila, sa vutugu vata ko vuravura taucoko, ka sa yaluma e na rarawa, ka yacova na siga oqo.”​—Roma 8:​22, Ai Vola Tabu.

◼ VEIVAKAMUAI NI AGILOSI CA

E tukuna na iVolatabu ni o Setani e “kalou ni veika vakavuravura qo,” era tomani koya tale ga na agilosi ca era kilai me timoni.​—2 Korinica 4:4; Vakatakila 12:9.

Me vakataki Setani, era saga na timoni mera vakamuai ira na tamata ra qai lewai ira. E duavata kina na yapositolo o Paula ni tukuna: “Nida sega ni veivala wale ga kei ira era vakalewe ra qai vakadra, ia eda veivala kei ira na veimatanitu, o ira na iliuliu, o ira na lewa tu na vuravura butobuto qo kei ira na yalo ca tawarairai ena veiyasana vakalomalagi.”​—Efeso 6:12.

E sega ni nodra inaki na timoni mera vakararawataki ira wale ga na tamata, era vinakata sara ga mera vakamuai ira tani mera kua ni qaravi Jiova na Kalou Cecere Duadua. (Same 83:18) Era dau vakayagataki ira na dauraikalokalo, cakaiba, vakadraunikau, kei na daurairai mera veivakacalai kina. Qori na vuna e vakasalataki keda kina o Jiova qai yalataka ni na taqomaki ira kece era vorati Setani kei ira na timoni.​—Jemesa 4:7.

◼ EDA BULA TU ENA “IOTIOTI NI VEISIGA”

Ena rauta na rua na udolu na yabaki sa oti, a parofisaitaka tu mai na iVolatabu: “Mo kila ni na duatani sara na iotioti ni veisiga, ena vakilai kina e levu na ka dredre.”

E vakamacalataka tale ga na vuna ena dredre kina na gauna qori, e kaya: “Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, . . . sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakaucaca, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veinakicataki, era na domoqa, era na dokadoka, era na lomana ga na marau era sega ni lomana na Kalou.” Koya gona, na vuna levu e vakilai kina na rarawa nikua, oya nida sa bula tu qo ena “iotioti ni veisiga.”​—2 Timoci 3:​1-4.

Na veika eda sa raica oti mai e vakaraitaka vakamatata na vuna e sega ni vakaotia rawa kina na rarawa na tamata se mani vakacava na nodra sasaga. Eda na nuitaki cei me na vakaotia? Eda na nuitaka na Dauveibuli ni a yalataka me na “vaqeavutaka na cakacaka ni Tevoro” kei ira na nona ito. (1 Joni 3:8) Ena veivosakitaki ena ulutaga tarava na sala ena vakaotia kece kina na Kalou na rarawa.

[iYaloyalo ena tabana e 4]