Vakabula na Kawatamata na Kalou

A yalataka na Kalou vua na turaga yalodina o Eparama ni na basika ena nona kawa na “kawa” yalataki. Na kawa qori era na vakalougatataki kina na “veimatanitu kecega.” (Vakatekivu 22:18) Toso na gauna, a toki i Ijipita na makubui Eparama o Jekope kei ira na nona vuvale ra qai vakaitikotiko e kea me yacova ni sa tauyavu na matanitu o Isireli.

Nira tiko mai Ijipita na Isireli, era sa qai vakabobulataki vua na Fero voravora me yacova nona digitaki Mosese na Kalou me liutaki ira tani mai kea ena nona wasea rua vakacakamana na Wasa Damudamu. Oti qori, a solia na Kalou vei ira na Isireli na lawa me dusimaki ira qai taqomaki ira, wili kina na iVunau e Tini. E vakamatatataki ena lawa qori na isoro me vosoti kina na ivalavala ca. E uqeti Mosese na Kalou me tukuna vei ira na Isireli ni na muri mai e dua tale na parofita. Na parofita qori na “kawa” yalataki.

Sivia na 400 na yabaki tarava, e yalataka na Kalou vei Tui Tevita ni na liutaka e dua na matanitu me tawamudu na “kawa” yalataki. Qori e dusi koya na Mesaia, a digitaka na Kalou me vakabula na kawatamata qai vakalesuya mai na Parataisi e vuravura.

Na Kalou e vakayagataki Tevita kei na so tale na parofita mera vakatakila tiko vakalalai na veika me baleta na Mesaia. Era parofisaitaka ni o koya na Mesaia e dau yalomalua qai yalololoma, ena vakaotia tale ga na waloloi, veika tawadodonu kei na ivalu ena gauna sa na veiliutaki kina. Era na veiyaloni na tamata kece, era na sega tale ga ni rerevaka na manumanu kila. Sa na sega na tauvimate, rarawa kei na mate, era na vakaturi mada ga na mate ni a inaki taumada ni Kalou meda marautaka na bula tawamudu.

A uqeti Maika na Kalou me parofisaitaka ni na sucu na Mesaia e Peceliema, a uqeti Taniela tale ga me parofisaitaka na nona mate. Ia na Kalou ena vakaturi koya na Mesaia qai digitaki koya me Tui mai lomalagi. A raivotutaka tale ga o Taniela ni Matanitu vakaMesaia ena sosomitaka na matanitu kece vakatamata. A yaco dina mai na Mesaia me vaka a parofisaitaki?

​—Yavutaki ena Vakatekivu wase 22-50, kei na Lako Yani, Vakarua, 2 Samuela, Same, Aisea, Taniela, Maika, Sakaraia 9:9.

[Kato ena tabana e 5]

NA YACA TABU NI KALOU

Ena Vakatekivu 2:4 e basika kina ena imatai ni gauna na yaca Jiova. E voleka ni basika vaka7,000 na yaca tabu qori ena ivolavivigi a volai taumada kina na iVolatabu. Na ibalebale ni yaca ni Kalou, “O Koya sa Vakavuna me Yaco,” e vakadeitaka vei keda ni na vakayacora kece na nona inaki kei na ka e yalataka.

[iYaloyalo ena tabana e 5]