Veisere​—Guilecava na ka sa Sivi

“Dua na ka na noqu veilecayaki. E toso vinaka tu na bula qai veisau vakasauri, e vaka ga e yali na ka kece au taukena.”​—MARK,a sa dua na yabaki nona veisere.

“A lasa o watiqu kei na dua na goneyalewa erau yabaki vata kei na luvei keirau yalewa. Ni keirau sere au lomavakacegu niu sa na sega ni sotava na nona dau yalokatakata, ia dua na ka noqu madua, au nanuma tale ga niu tawayaga.”​—EMMELINE, sa 17 na yabaki nona veisere.

Eso era vakatulewataka mera veisere nira nanuma ni na vinaka cake na nodra bula, eso tale era vinakata me tiko ga o watidra, ia era na sega ni surevaka qori. Levu era vakadinata ni sa qai dredre ga na bula ni oti na veisere. Ke o se qai veisere ga, qori e dua na ituvaki dredre duadua ena bau yaco ena nomu bula. Ena veivuke sara ke o dikeva na ivakasala yaga ena iVolatabu mo vosota kina na ituvaki dredre qori.

KENA IMATAI: RAI CALA.

Na nuiqawaqawataki ni veika vakailavo, veisusu, lako vata kei na galili ena rawa ni veivakayalolailaitaki, ena taura toka na gauna me seavu. E kaya e dua na vuniwai ni mona sa takali o Judith Wallerstein, ni oti e vica na yabaki nodra veisere era nanuma eso nira “tawayaga, era lomabibi qai galili.”

KA O RAWA NI CAKAVA

▪ Tagicaka na ka e yaco. De dua o na dau vakananumi koya o domona. Rairai o na rarawataka ni a sega ni yaco na ka o namaka ena nomu bula vakawati. (Vosa Vakaibalebale 5:18) Kua ni madua mo “tagi” ena so na gauna.​—Dauvunau 3:​1, 4.

▪ Saga mo dauveimaliwai. O na rairai vinakata mo tu duadua ga, qori e sega ni ka vakayalomatua me vakamatauni. (Vosa Vakaibalebale 18:1) Ni o veitalanoa kei ira na nomu itokani, veivosakitaka na ka e veivakayaloqaqataki. Era na yawaki iko ke o dau tukuna tu ga na veika ca me baleti watimu e liu. Ke dua na ka bibi mo na vakatulewa kina ni oti ga na veisere, kerea na nona veivuke e dua na nomu itokani nuitaki.

▪ Kauaitaka nomu bula. Na nuiqawaqawataki ni bula ni oti na veisere e vakavuna na tubunidra se na vutu ni ulu. Saga mo kana vakavinaka, vakaukauayago qai moce vakavinaka.​—Efeso 5:29.

▪ Biuta tani eso na ka nei watimu e liu e vakavuna nomu cudru se o na sega ni vakayagataka, maroroya ga na ivola e yaga vei iko. Ke so tale na ka me vaka na itaba ni nomudrau vakamau e vakavuna nomu rarawa, tawana ena kateni qai maroroya tu me baleti ratou na gone.

▪ Valuta na rai cala. E tukuna o Olga a sereki watina ni veibutakoci: “Au lomatarotarotaka, ‘Na cava e tiko vua na yalewa ya, e sega vei au?’” Sa qai kidava o Olga ni rai cala e rawa ni vakavuna na ‘mavoa ni yalo.’​—Vosa Vakaibalebale 18:14.

Era tukuna e levu, nira vola na ka era vakasamataka e vukei ira mera veisautaka nodra rai. Ke o cakava ya, vakasamataka tale ga eso na ka vinaka me sosomitaka na rai cala o valuta tiko. (Efeso 4:23) Kena ivakaraitaki:

Rai cala: E bale ga vei au na nona tawayalodina o watiqu.

Rai donu: E tu na noqu malumalumu, e sega ga ni dodonu me lawakitaki au.

Rai cala: Maumau wale na vica na yabaki au vakawatitaka tu kina na tagane ya.

Rai donu: Au na marau keu kauaitaka ga na ka sa tu mai liu, sega ni veika sa sivi.

▪ Kua ni kauaitaka na vosa mosimosi. O ira na nomu itokani se o ira na wekamu era nanumi iko era na rairai sega ni duavata ena ka o cakava se ra tukuna eso na ka mosimosi, me vaka: ‘E sega ni ganiti iko o koya,’ se ‘na Kalou e cata na veisere.’b Sa rauta me vakarota na iVolatabu: “Kakua ni ko nanuma na vosa kece sa vosataki.” (Dauvunau 7:21) E tukuna o Martina sa oti e rua na yabaki na nona veisere: “Au sega ni via kauaitaka na vosa mosimosi, ia meu vakasamataka ga na rai ni Kalou, ni cecere na nona vakanananu mai na noda vakanananu.”​—Aisea 55:​8, 9.

▪ Masu vua na Kalou. E uqeti ira na nona tamata na Kalou mera ‘biuta vua na nodra lomaocaoca kece,’ vakauasivi na veika mosimosi era sotava.​—1 Pita 5:7.

TOVOLEA QO: Vola na tikinivolatabu o kila ni yaga vei iko qai biuta ena dua na vanua e laurai levu. Rawa ni vola tale ga na kena era tiko ena ulutaga qo. E levu era veisere era vakadinata na yaga ni tikinivolatabu qo: Same 27:10; 34:18; Aisea 41:10; kei na Roma 8:​38, 39.

KENA IKARUA: VEIMALIWAI KEI NA WATIMU E LIU.

E tukuna o Juliana a 11 na yabaki nona vakawati: “Au vakamasuti watiqu me kua ni lako. Ni sa biubiu, dua na ka na noqu katakatataki koya kei na nona vakasuva.” E levu era veisere era cudruvi watidra tu ena dua na gauna balavu. Ia ena vinakati ga me rau dau veivosaki ke rau vakaluveni.

KA O RAWA NI CAKAVA

▪ Saga mo rokovi watimu e liu. Ni dua na ka bibi mo drau veivosakitaka me lekaleka ga, mo vosa tale ga vakadodonu. Na iwalewale qo era vakadinadinataka e levu ni rawati kina na veiyaloni.​—Roma 12:18.

▪ Qarauna na vosa e veivakacudrui. Ke o vakacudrui, vakasamataka na ivakasala vuku ena iVolatabu: “Ko koya sa kila vuku sa tarova na nona vosa.” (Vosa Vakaibalebale 17:27) Ke o kila ni o sa sega ni lewa rawa vakavinaka na veivosaki, o rawa ni tukuna: “Au se vakasamataka tale mada na ka o tukuna, daru qai veitalanoa ena dua tale na gauna.”

▪ Vakuai iko mai na so na ka drau okati vata kina kei watimu e liu me vaka na veika vakalawa, veika vakailavo, kei na veiqaravi vakavuniwai.

TOVOLEA QO: Ni o veivosaki kei watimu e liu, qai dua vei kemudrau e vakaiulubale se yalokaukaua, o rawa ni kerea me cegu mada nomudrau veivosaki, se mo drau qai veitaratara tale ena imeli.​—Vosa Vakaibalebale 17:14.

KENA IKATOLU: VUKEI RATOU NA GONE.

E nanuma lesu o Maria na ka e yaco ni oti ga nona veisere kei watina: “E tagi e veigauna na luvequ yalewa lailai, tekivu tale nona dau mi moce ena bogi. Au raica tale ga ni sa duatani na ivakarau nei luvequ goneyalewa, sa sega ni dau talaucaka na lomana.” O na rairai nanuma ni sa sega nomu gauna kei na kaukaua mo vukei luvemu ena ka e gadreva.

KA O RAWA NI CAKAVA

▪ Mo uqeti luvemu me talaucaka vei iko na lomana, ke vaka mada ga e cavuti kina eso na ‘ka lialia.’​—Jope 6:​2, 3.

▪ Vakayacora na nomu itavi. De dua o na gadreva tu na veivakacegui, ia e sega ni ka vakayalomatua mo talaucaka vei luvemu na nomu leqa, ni sega ni nona itavi qori. (1 Korinica 13:11) Mo kua ni vakayagataki luvemu me nomu matamata vei watimu e liu.

▪ Lewa vinaka nodratou bula na luvemu. Me dua ga na vanua eratou tiko kina, ena yaga tale ga me tiko na ituvatuva ni ka me caka, vakabibi na veika vakayalo wili kina na wili iVolatabu kei na sokalou vakavuvale.​—Vakarua 6:​6-9.

TOVOLEA QO: Mo tukuna vei ratou na luvemu ena dua na siga na macawa qo ni o lomani ratou, e sega ni bale vei ratou nomudrau veisere. Kua ni beitaki watimu, sauma ga nodratou taro.

Ni oti na veisere saga mo guilecava na ka sa sivi. E tukuna o Melissa a 16 na yabaki na nona vakawati: “Niu sa sere, au vakasamataka, ‘Au sega sara ga ni tadra ni na yaco qo ena noqu bula vakawati.’ ” E lomavakacegu ena ituvaki sa tu kina qo. E tomana, “Au lomavakacegu niu guilecava na ka sa sivi.”

[iVakamacala e ra]

TAROGI IKO . . .

▪ Au dau via kinoca noqu tagi?

▪ Na cava meu cakava me oti kina noqu cudruvi watiqu e liu?

[iYaloyalo ena tabana e 8]

[iYaloyalo ena tabana e 9]

Me dusimaki iko tiko ga na Vosa ni Kalou ena veika dredre kece e yaco

[iYaloyalo ena tabana e 10]