Noqu Vakatulewa Niu se Gone

Ena 1985, niu se yabaki tini, era mai vuli ena koronivuli au vuli tiko kina e Columbus, Ohio, e Merika o ira na gone mai Cambodia. Dua vei ira na gonetagane mai na vanua qori e kila vakalailai na vosa vakavalagi. E vakayagataka na iyaloyalo me talanoataka vei au na italanoa vakarerevaki ni veivakatotogani, veivakamatei kei na nodra dau dro mai kea. Au dau tagi ena bogi niu vakasamataki ira na gone qo. Dua na ka noqu via tukuna vei ira na inuinui me baleta na Parataisi kei na veivakaturi, ia era sega ni kila na vosa vakavalagi. Au se gone, ia au vakatulewataka meu vulica na vosa vakaCambodia meu rawa ni tukuna vei ira na lewe ni noqu kalasi na veika me baleti Jiova. Ia au sega ni kila ni vakatulewa qori ena tara sara ga na noqu bula ena veigauna se bera mai.

E sega ni rawarawa na vulici ni vosa vakaCambodia. Au vakatulewataka vakarua meu sa kua ni tomana noqu vuli, ia e vakayaloqaqataki au o Jiova ena nona vakayagataki rau na noqu itubutubu. Toso na gauna, era uqeti au na noqu qasenivuli kei ira na noqu lewe ni kalasi meu saga na cakacaka saulevu. Ia au via painia, niu sa lai vuli ena sekeneri, au digia na ulutaga ni vuli ena vukei au meu rawa ni cakacaka vagauna, meu tadolova kina noqu isausau. Ni suka na vuli, au dau lai sota kei na so na painia me keimami veitomani ena cakacaka vakaitalatala. Au vakavulica tale ga eso na gonevuli era vulica tiko na vosa vakavalagi me ikarua ni nodra vosa​—na vakatulewa ena yaga vakalevu vei au ena gauna se bera mai.

Niu sa yabaki 16, au rogoca ni tiko e dua na iwasewase lailai ena vosa vakaCambodia e Long Beach, California, e Merika. Au gole ena iwasewase ya, au qai vulica kina na wiliwili vakaCambodia. Niu tauri ivola oti e koronivuli, au sa dua sara na painia, au tomana tale ga noqu vunau vei ira na kai Cambodia era tiko tikivi au. Niu sa yabaki 18, au vakasamataka meu sa toki e Cambodia. E vanua vakarerevaki, ia au kila ni vica vei ira na tini na milioni era vakaitikotiko e Cambodia era sa rogoca na itukutuku vinaka ni Matanitu ni Kalou. Ena gauna ya, a dua tiko ga na ivavakoso e Cambodia, era le 13 ga na dautukutuku. Na imatai ni gauna au gole kina e Cambodia au se qai yabaki 19. Ni oti e rua na yabaki, au vakatulewataka meu sa toki ekea. Au kunea e dua na cakacaka vagauna meu dua na dauvakadewa, meu veivakavulici tale ga ena vosa vakavalagi me tokoni au ena noqu cakacaka vakaitalatala. Toso na gauna au sa vakawatitaka sara e dua e tautauvata na neirau isausau. Keirau sa marautaka tiko na neirau vukea e levu mai Cambodia mera yalataka nodra bula vua na Kalou.

Sa vakarautaka vei au o Jiova ‘na ka e gadreva na lomaqu.’ (Same 37:4) E cakacaka marautaki duadua na veivakatisaipelitaki. Ena 16 na yabaki ni noqu tiko e Cambodia, e sa tubu na ivavakoso mai na 13 na dautukutuku me lai 12 na ivavakoso qai 4 na iwasewase tu yawa!​—Talanoataka o Jason Blackwell.