Sega ni Yaco Kece na Vatavatairalago!

O via kila na veika ena yacovi iko ena veisiga se bera mai? Qori na ka era kauai kina e levu. Eso na tamata era tukuna na veika se bera ni yaco, ia e sega ni yaco kece. Dikeva mada qo:

• SAENITISI: Era vakayagataka na misini vereverea kei na dua na iwase levu ni ilavo mera tukuna kina na veika se bera ni yaco. Kena ivakaraitaki, na veika ena yaco ni benuci tiko ga na noda vuravura se ni veiveisau na draki.

• DAUVAKADIDIKE: Era tukuna na ka ena yaco ena veika vakabisinisi se politiki. E vakatokai me parofita o Warren Buffett e dua na daunibisinisi vutuniyau ni dau donu na ka e tukuna me baleta na veika vakabisinisi. Dua tale na turaga o Nate Silver, e dau dikeva na itukutuku qai tukuna na veika ena yaco ena veika vakapolitiki e Merika, kei ira era na vakaicovitaki ena tabana ni caka iyaloyalo mai Hollywood.

• IVOLATUKUTUKU NI GAUNA MAKAWA: E dau vakatokai tu qori me parofisai. Kena ivakaraitaki, era tukuna eso ni sa vakayacori tiko ena noda gauna na itukutuku buawa e vola o Michel de Notredame (Nostradamus) ena ika16 ni senitiuri. Era tukuna tale ga eso ni na yaco na veika vakadomobula ra qai yavutaka qori ena nodra ivolanivula na Maya a cava ena 21 Tiseba, 2012.

• ILIULIU NI LOTU: Era tukuna ena so na gauna na veika vakadomobula ena yaco e vuravura mera veivakasalataki kina, me levu tale ga na nodra lewe ni lotu. E vakatokai me parofita o Harold Camping qai kacivaka raraba kei ira nona imuri ni na vakarusai na vuravura ena 2011. Ia e se tiko ga qo na vuravura.

• DAURAIRAI: Era kaya ni tu vei ira na kaukaua mera tukuna na veika se bera ni yaco. A yaco dina eso na ka rau tukuna me baleta na ika20 ni senitiuri o Edgar Cayce kei Jeane Dixon. Ia e levu tale ga na ka rau tukuna e sega ni yaco. Kena ivakaraitaki, a tukuna o Dixon ni na cabolo na iKatolu ni iValu Levu ena 1958, a tukuna tale ga o Cayce ni na dromu e wasawasa na siti o Niu Yoka ena veiyabaki ni 1970.

Vakacava e tiko e dua na idusidusi nuitaki me kilai kina na veika se bera ni yaco? E taro vinaka qori. Na nomu kila na veika se bera ni yaco ena yaga ena nomu bula kei na nomu vakatulewa.