Na Vakadomobula ni iValu
Eda dau sotava na ituvaki dredre, ia eda vakila e levu na rarawa e vu mai ena ivalu kei na itovo kaukaua. Qo eso na ka era kaya na sotia kei na lewenivanua era raica sara ga na ituvaki vakaloloma e dau yaco kina.
SOTIA
“O na raica tu ga nodra vakamatei, kei na nodra mavoa vakaca e levu ena veika vakadomobula e yaco ena ivalu. O na lomaleqa qai taqaya.”—Gary, Peritania.
“E lauvana na dakuqu kei na mataqu. Au raica nodra vakamatei e levu, wili kina o ira na gone kei na itabaqase. Na ivalu ena vakavuna mo yalokaukaua.”—Wilmar, Colombia.
“Ni dua e lauvana e matamu, ena dredre mo guilecava. O na vakasamataka tu ga na nona qoqolou kei na nona tagi. O na sega vakadua ni guilecava na ka e yaco.”—Zafirah, Merika.
LEWENIVANUA
“Au nanuma niu na sega tale ni marau. Au sega ni via mate, au leqataki ratou vakalevu noqu vuvale kei ira noqu itokani.”—Oleksandra, Ukraine.
“Dua na ka neitou rere ni keitou waraka tiko na kakana me sivia na 20 na aua. Baleta ni keitou kila rawa ni dua ga na gauna ya keitou na lauvana kina.”—Daler, Tajikistan.
“Rau mate noqu itubutubu ena ivalu. Au biu tu vaka na luveniyali e sega ni dua me vakacegui au se kauaitaki au.”—Marie, Rwanda.
Qori na nodra ivakaraitaki eso era vakila na revurevu ni ivalu. Ia era sa vakila tiko na vakacegu ena gauna qo. Era nuidei tale ga ni sa voleka na gauna me oti kina na ivalu kei na itovo kaukaua kece. Na iVolatabu ga e vakamacalataka na sala ena yaco kina qori ena Vale ni Vakatawa qo.