Nǔnywɛ́xó
9 Nǔnywɛ́ jɔ nǔnywɛ́ gbá xɔ tɔn;
é kpa dotín tɛ́nwe ná.
2 É ɖa nǔɖuɖu tɔn ganjí;
é ɖa vɛ̌ɛn tɔn;
é lɛ́ tɛ́ távo tɔn.
3 É sɛ́ mɛsɛntɔ́ tɔn nyɔ̌nu lɛ́ dó
ɖɔ yě ní nɔ fí e yi jǐ ɖo toxo ɔ mɛ lɛ́ é bo sú xó ɖɔ:
4 “Xlonɔ lɛ́ mi, mi wá fí.”
É nɔ ɖɔ nú ayivɔvúnnánɔ lɛ́ ɖɔ:
5 “Mi wá bá ɖu nǔɖuɖu ce,
lobo nu vɛ̌ɛn e un ɖa é.
6 Mi jó xlojijɔ dó bá nɔ gbɛ;
nukúnnúmɔjɛnǔmɛ ní xlɛ́ ali mi.”
7 Mɛ e nɔ gbɛ́ nǔ nú mɛcákotɔ́ é ná ɖu winnyá,
mɛ ɖěbǔ e nɔ kɛ nu dó nǔ wú nú mɛdídá é ná wa nǔ dó éɖée wú.
8 Ma nɔ kɛ nu dó nǔ wú nú mɛcákotɔ́ ó, é ma nyí mɔ̌ ǎ ɔ, é ná gbɛ́ wǎn nú we.
Nɔ kɛ nu dó nǔ wú nú nǔnywɛ́tɔ́, énɛ́ ɔ, é ná yí wǎn nú we.
9 Kplɔ́n nǔ mɛ e nyɔ́nǔi é, énɛ́ ɔ, é ná nyɔ́nǔi d’é jí.
Kplɔ́n nǔ nǔjlɔ́jlɔ́watɔ́, énɛ́ ɔ, é ná lɛ́ tuun nǔ d’é jí.
10 Sísí e gɔ́ngɔ́n é ɖíɖó nú Jexóva wɛ nyí fí e nǔnywɛ́ bɛ́ sín é,
Mɛ e mɛ́ bɔ nǔ bǐ vɔ ɖ’é wú é tuuntuun wɛ nɔ ná nukúnnúmɔjɛnǔmɛ.
11 Ðó un ná bló bɔ azǎn towe lɛ́ ná sukpɔ́,
bɔ xwe ná jɛ xwe jí nú we.
12 Ényí a húzú nǔnywɛ́tɔ́ ɔ, ɖagbe hwiɖésúnɔ tɔn wɛ,
amɔ̌, ényí a nyí mɛcákotɔ́ ɔ, hwiɖokpó wɛ ná hɛn agban tɔn.
13 Nyɔ̌nu xlonɔ nɔ ɖú zǐngídi.
É nɔ ɖo vi mɛ, bo ka lɛ́ tuun nǔtí ǎ.
14 É nɔ jínjɔ́n xwé tɔn sín ali nu,
ɖo zinkpo jí ɖo fí e yi jǐ ɖo toxo ɔ mɛ é,
15 bo nɔ sú xó ylɔ́ mɛ ɖěɖěe ɖo fínɛ́ gbɔn wɛ lɛ́ é,
mɛ ɖěɖěe ɖo zɔnlin ɖi wɛ tlélé ɖo ali yětɔn jí lɛ́ é ɖɔ:
16 “Xlonɔ lɛ́ mi, mi wá fí.”
É nɔ ɖɔ nú ayivɔvúnnánɔ lɛ́ ɖɔ:
17 “Sin e è fin nu é nɔ víví,
bɔ nǔ e è ɖu ɖo nǔglɔ́ é nɔ nyɔ́.”