Ezayíi
24 Mi kpɔ́n! Jexóva ɖo mɛ bǐ ɖe sín to ɔ mɛ* wɛ, bo ɖo blǒbló wɛ bɔ é ɖo vɔ̌ jɛ wɛ.
É nɔ flí to ɔ xwe,* bo nɔ fúnfún mɛ e nɔ nɔ mɛ lɛ́ é kpé.
2 Nǔ ɖokpó ɔ wɛ é ná nyí nú mɛ bǐ:
togun ɔ kpó vɔ̌sánúxwlémawutɔ́ ɔ kpó,
mɛsɛntɔ́ súnnu kpó gǎn tɔn súnnu kpó,
mɛsɛntɔ́ nyɔ̌nu kpó gǎn tɔn nyɔ̌nu kpó,
nǔxɔtɔ́ kpó nǔsatɔ́ kpó,
axɔ́tɔ́nɔ kpó axɔ́ɖutɔ́ kpó,
akwɛ́nyanúmɛtɔ́ kpó akwɛ́nyatɔ́ kpó.
3 È ná ɖe mɛ bǐ sín to ɔ mɛ mlɛ́mlɛ́;
è ná vɔ ɛ bǐ mlɛ́mlɛ́,
ɖó Jexóva wɛ ɖɔ xó énɛ́.
4 To ɔ ɖo aluwɛ mɛ;* é ɖo gblěgblé wɛ.
Ayǐkúngban e nɔ ná sínsɛ́n é ɖo xúxú wɛ; é ɖo sísá wɛ.
Gbɛtɔ́ nukúnɖéjí e ɖo to ɔ mɛ lɛ́ é ɖo gǒ xú wɛ.
5 Mɛ e nɔ nɔ to ɔ mɛ lɛ́ é hɛn to ɔ kwíji,
ɖó yě gba sɛ́n lɛ́,
bo ɖyɔ́ gbetakɛ́n lɛ́,
lobo gba akɔjijɛ e ɖo ayǐ káká sɔ́yi é.*
6 Énɛ́ wɛ zɔ́n bɔ nudómɛ ɔ vɔ to ɔ,
bɔ è dó hwɛ tɔn mɛ e ɖ’é mɛ lɛ́ é.
Énɛ́ wú wɛ mɛ e ɖo to ɔ mɛ lɛ́ é sín kɛ́n ɖe kpo,
bɔ mɛ kwínwe ɖé jɛ́n è jó dó.
7 Vɛ̌ɛn yɔ̌yɔ́ ɔ ɖo aluwɛ mɛ,* vǐwuntín lɛ́ je,
bɔ mɛ ɖěɖěe sín ayi mɛ awǎjijɛ gɔ́ lɛ́ é bǐ ɖo azɔn wɛn wɛ.
8 Awǎjijɛ e ná wɛ hǔn lɛ́ ɖe é nɔ te;
kpacaɖútɔ́ lɛ́ sín zǐngídi wá vivɔnu;
awǎjijɛ sín gbe e dó wɛ agǐdigbo ɔ ɖe é nɔ te.
9 Yě nɔ nu vɛ̌ɛn han mɛvo,
bɔ ahan syɛ́nsyɛ́n nɔ vɛ́ ɖo mɛ ɖěɖěe ɖo nunu wɛ lɛ́ é sín nu mɛ.
10 È gba toxo e è hɔn jó dó é hánnyá;
è sú xwé lɛ́ bǐ bónú mɛ ɖěbǔ ní ma byɔ́ xwé lɛ́ gbe ó.
11 Yě nɔ sú xó ɖo toxomɛli lɛ́ jí, ɖó vɛ̌ɛn vɔ wútu.
Awǎjijɛ bǐ blí bú;
awǎjijɛ to ɔ tɔn ko yi.
12 Aglingbigba kɛ́ɖɛ́ wɛ kpo ɖo toxo ɔ mɛ;
è kíjá hɔntogbó ɔ bǐ mlɛ́mlɛ́.
13 Ðó lěe nǔ lɛ́ ná cí ɖo to ɔ mɛ, ɖo togun lɛ́ tɛ́ntin é ɖíe:
Yě ná cí hwenu e è húnhún olívutín é ɖɔhun,
yě ná cí hwenu e vǐwun yiya nɔ wá vivɔnu bɔ è nɔ cyán vǐwun e è jó dó lɛ́ é ɖɔhun.
14 Yě ná zé gbe dó jǐ,
yě ná sú xó kpó awǎjijɛ kpó.
Yě ná jlá susu Jexóva tɔn sín xu mɛ.*
15 Énɛ́ wú wɛ yě ná kpa susu nú Jexóva ɖo wěziza gbéjí;*
yě ná kpa susu nú Jexóva, Mawu Izlayɛ́li tɔn ɔ sín nyǐkɔ ɖo tɔtɛ́ntinto xu ɔ tɔn lɛ́ mɛ.
16 Mǐ se han lɛ́ sín fí e ayǐkúngban ɔ kponu ɖó lɛ́ é:
“Susu* nú Nǔjlɔ́jlɔ́watɔ́ ɔ!”
Amɔ̌, un ɖɔ: “Un ɖo gǒ xú wɛ, un ɖo gǒ xú wɛ!
Heelú mì! Gbejímanɔtɔ́ lɛ́ wa nǔ kpó gbejímanɔ kpó;
ɛɛn, gbejímanɔtɔ́ lɛ́ nɔ fɔ́n bo nɔ ɖo nǔ wa kpó gbejímanɔ kpó wɛ.”
17 Hwi mɛ e nɔ nɔ to ɔ mɛ é, adohu adohu, do lɛ́ kpó fɛ́ca lɛ́ kpó ɖo te kpɔ́n we.
18 Mɛ ɖěbǔ e ɖo hinhɔn nú nǔɖiɖɔ e ɖo adohu adohu ɖó nú mɛ wɛ é ná jɛ do mɛ,
bɔ mɛ ɖěbǔ e ɖo do mɛ tɔ́n sín wɛ é ná sɔ́ fɛ́ca.
Ðó è ná hun sin e ɖo aga é sín hɔntogbó lɛ́,
bɔ dodónu ayǐkúngban ɔ tɔn lɛ́ ná húnhún.
19 Ayǐkúngban ɔ zɛ ɖó vovo;
ayǐkúngban ɔ húnhún;
ayǐkúngban ɔ dán wǔ kpó zǐngídi kpó.
20 Ayǐkúngban ɔ nɔ fún sa ahannumúnɔ ɖɔhun,
é yi gǔdo ɔ, é nɔ wá nukɔn azava e jɔhɔn ɖo dǐndán wɛ é ɖɔhun.
Nǔwanyido tɔn kpɛn tawun ɖo jǐ tɔn,
é ná j’ayǐ, bo sɔ́ ná lɛ́ sí te ǎ.
21 Ðo azǎn énɛ́ gbe ɔ, Jexóva ná sɔ́ ayi tɔn ɖó ahwankpá e ɖo jǐ aga é jí,
bo ná lɛ́ sɔ́ ɖó axɔ́sú ayǐkúngban jí tɔn lɛ́ jí ɖo ayǐkúngban ɔ jí.
22 È ná xo yě kplé ɖó kpɔ́,
gantɔ́ e è kplé ɖó do mɛ lɛ́ é ɖɔhun,
è ná sú yě dó gankpá do glɔ́ tɔn mɛ;
azǎn gěgé gúdo ɔ, è ná sɔ́ ayi ɖó yě jí.
23 È ná dó winnyá sunkpéká,
bo ná dó winnyá hwe e ɖo kínkɔ́n wɛ é,
ɖó Jexóva ahwankpá lɛ́ tɔn ko húzú Axɔ́sú ɖo Sinyɔ́ɔ só ɔ jí, bo lɛ́ húzú ɖo Jeluzalɛ́mu,
É húzú Axɔ́sú susunɔ ɖo togun tɔn sín tomɛxó lɛ́ nukɔn.*