Ezayíi
36 Ðo axɔ́súɖuɖu axɔ́sú Ezekiyási tɔn sín xwe 14gɔ́ ɔ mɛ ɔ, axɔ́sú Asilíi tɔn Senakelíbu wá tɔ́n ahwan toxo Judáa tɔn e è mɛ ahohó lɛ́ lɛ̌ dó lɛ́ é bǐ, bo yí yě. 2 Énɛ́ ɔ, axɔ́sú Asilíi tɔn sɛ́ Hlabucakée* ɔ kpó ahwankpá wɔ̌búwɔ́bú ɖé kpó dó sín Lakíci nú yě ná yi axɔ́sú Ezekiyási gɔ́n ɖo Jeluzalɛ́mu. Yě cí te ɖo fí e sinhwín sindo e ɖo só ta é tɔn ɖe é kpá; é ɖo gle avɔnyatɔ́ ɔ tɔn sín ali ɖaxó ɔ tó. 3 Énɛ́ ɔ, Eliyakímu, Ilukíya ví e nɔ kpé nukún dó axɔ́sú ɔ sín xwé* wú é, Cebúna wěgbójínɔtɔ́ ɔ kpó Yoáxi, Asáfu ví nǔwlánɖayǐtɔ́ ɔ kpó tɔ́n wá gɔ̌n tɔn.
4 Énɛ́ ɔ, Hlabucakée ɔ ɖɔ nú yě ɖɔ: “Mi kɛnklɛ́n ɖɔ nú Ezekiyási ɖɔ: ‘Nǔ e axɔ́sú ɖaxó, axɔ́sú Asilíi tɔn ɖɔ é ɖíe: “Étɛ́ wú a ka ɖeji dó? 5 A nɔ ɖɔ: ‘Un ɖó wlɛnwín e ná fun ahwan é, bo lɛ́ ɖó hlɔ̌nhlɔ́n,’ amɔ̌, xó yǎyá wɛ nyí xó énɛ́ lɛ́. Mɛ̌ wú a ka ɖeji dó, bo glá káká bo fɔ́n gǔ dó jǐ ce? 6 Éɖíe! A gán jɛ Ejípu énɛ́ e nyí fántín lílɔ́ é wú; éyɛ́ mɛ e ényí mɛɖé gán jɛ wǔ tɔn ɔ, é nɔ byɔ́ alɔkpákpá mɛ ɔ tɔn mɛ, bo nɔ tɔ́n ɛ é. Ali e nu Ejípu xɔ́sú Falawɔ́ɔn nɔ wa nǔ xá mɛ ɖěɖěe nɔ gán jɛ wǔ tɔn lɛ́ é bǐ ɖe é nɛ́. 7 Ényí a ka ɖɔ nú mì ɖɔ: ‘Mǐ ɖeji dó Jexóva Mawu mǐtɔn wú’ ɔ, é má nyí tɛn mímɛ́ tɔn lɛ́ kpó vɔ̌sákpe tɔn lɛ́ kpó wɛ hwɛ Ezekiyási ɖe síin, bo ɖɔ nú Judáa kpó Jeluzalɛ́mu kpó ɖɔ: ‘Mi ɖó ná ɖe kɔ́ ɖo vɔ̌sákpe élɔ́ ɔ nukɔn’ a?”’ 8 Hǔn din ɔ, kɛnklɛ́n kɛ́n nǔ élɔ́ xá aklúnɔ ce, axɔ́sú Asilíi tɔn ɔ: un ná ná we sɔ́ 2 000, ényí a kpé wú bá mɔ sɔ́xátɔ́ nú yě bǐ ɔ nɛ́. 9 Nɛ̌ a ná ɖo ji ɖe dó Ejípu sín kɛkɛ́ví lɛ́ kpó sɔ́xátɔ́ tɔn lɛ́ kpó wú wɛ, bo ná sixú ɖu ɖo tokpɔngán e tlɛ hwe hú gǎn ɖo aklúnɔ ce sín mɛsɛntɔ́ lɛ́ mɛ é jí gbɔn? 10 Din ɔ, Jexóva mɛvo wɛ un wá, bo ná tɔ́n ahwan to élɔ́, bo ná sú kún tɔn dó wɛ a vɛdó a? Jexóva ɖésúnɔ wɛ ɖɔ nú mì ɖɔ: ‘Yi, bo tɔ́n ahwan to énɛ́, lobo sú kún tɔn dó.’”
11 Ée é ɖɔ mɔ̌ é ɔ, Eliyakímu, Cebúna kpó Yoáxi kpó ɖɔ nú Hlabucakée ɔ ɖɔ: “Kɛnklɛ́n ɖɔ xó nú mɛsɛntɔ́ towe lɛ́ dó alámugbe* mɛ, ɖó mǐ sixú mɔ nukúnnú jɛ mɛ; ma ɖɔ xó nú mǐ dó Jwifu lɛ́ sín gbe mɛ ó, ɖó mɛ e ɖo ahohó ɔ ta lɛ́ é ɖo sise wɛ.” 12 Amɔ̌, Hlabucakée ɔ ɖɔ: “Aklúnɔ mitɔn kpó midɛɛ lɛ́ kpó kɛ́ɖɛ́ wɛ aklúnɔ ce sɛ́ mì dó ɖɔ má ɖɔ xó énɛ́ lɛ́ ná a? É má nyí súnnu énɛ́ lɛ́ e ɖo ayǐjínjɔ́n ɖo ahohó ɔ ta, bɔ miɖɔhun ɔ, yě ná ɖu mǐ yěɖésúnɔ tɔn, bo ná nu aɖɔ̌ yěɖésúnɔ tɔn lɛ́ é lɔ wú wɛ è ɖɔ má ɖɔ xó énɛ́ lɛ́ ǎ cé?”
13 Énɛ́ gúdo ɔ, Hlabucakée ɔ sú xó syɛ́nsyɛ́n bo ɖɔ dó Jwifu lɛ́ sín gbe mɛ ɖɔ: “Mi ɖótó xó e axɔ́sú ɖaxó, axɔ́sú Asilíi tɔn ɔ ɖɔ é. 14 Nǔ e axɔ́sú ɔ ɖɔ é ɖíe: ‘Mi ma nú Ezekiyási blɛ́ mi ó, ɖó é sixú hwlɛ́n mi ǎ. 15 Gɔ́ ná ɔ, mi ma nú xó élɔ́ e Ezekiyási nɔ ɖɔ é zɔ́n bónú mi ɖeji dó Jexóva wú ó: “É ɖo wɛn ɖɔ Jexóva ná hwlɛ́n mǐ, bɔ è ná jó toxo élɔ́ dó nyi alɔ mɛ nú axɔ́sú Asilíi tɔn ɔ ǎ.” 16 Mi ma ɖótó Ezekiyási ó, ɖó nǔ e axɔ́sú Asilíi tɔn ɔ ɖɔ é ɖíe: “Mi dó hwɛ gbɔ xá mì, bo jó ta,* énɛ́ ɔ, mɛ ɖokpó ɖokpó ná ɖu vǐwuntín tɔn sín sínsɛ́n, bo ná ɖu fígitín tɔn sín sínsɛ́n, lobo ná nu sitɛ́nu éɖésúnɔ tɔn sín sin, 17 káká jɛ hwenu e un ná wá, bo ná kplá mi yi to e cí to miɖésúnɔ tɔn ɖɔhun é mɛ é; to e mɛ jinukún kpó vɛ̌ɛn yɔ̌yɔ́ kpó ɖe é, to e mɛ wɔ̌xúxú kpó vǐwungbo lɛ́ kpó ɖe é. 18 Mi ma nú Ezekiyási ɖɔ xó élɔ́ bo dó flú mi ó: ‘Jexóva ná hwlɛ́n mǐ.’ Akɔta lɛ́ sín nǔmɛsɛn lɛ́ ɖě hwlɛ́n to yětɔn sín axɔ́sú Asilíi tɔn ɔ sín alɔ mɛ a? 19 Fítɛ́ nǔmɛsɛn Hamáti kpó Aapádu kpó tɔn lɛ́ ka ɖe? Fítɛ́ nǔmɛsɛn Sefaawayímu tɔn lɛ́ ka ɖe? Yě hwlɛ́n Samalíi sín alɔ ce mɛ a? 20 To énɛ́ lɛ́ ɖětɛ́ sín nǔmɛsɛn ka kpé wú bo hwlɛ́n to yětɔn sín alɔ ce mɛ, bɔ é ná nyí Jexóva wɛ ná hwlɛ́n Jeluzalɛ́mu sín alɔ ce mɛ?”’”
21 Amɔ̌, yě cí xwíí, bo ɖɔ xó ɖěbǔ dó ná ɛ xósin ǎ, ɖó gbe e axɔ́sú ɔ ɖe é ɖíe: “Mi ɖó ná ná ɛ xósin ǎ.” 22 Eliyakímu, Ilukíya ví e nɔ kpé nukún dó axɔ́sú ɔ sín xwé* wú é, Cebúna wěgbójínɔtɔ́ ɔ kpó Yoáxi, Asáfu ví nǔwlánɖayǐtɔ́ ɔ kpó yi Ezekiyási gɔ́n kpó awu vúnvún kpó ɖo kɔ, bo ɖɔ xó e Hlabucakée ɔ ɖɔ lɛ́ é n’i.