Ezayíi
4 Nyɔ̌nu tɛ́nwe ná zunfán súnnu ɖokpó ɖo azǎn énɛ́ gbe, bo ná ɖɔ:
“Mǐ ná nɔ ɖu wɔ̌xúxú mǐɖésúnɔ tɔn,
bo ná nɔ dó awu mǐɖésúnɔ tɔn lɛ́,
yǐ gbe kpowun bónú mǐ ní ɖó nyǐkɔ towe ɖo ta,
bo ná dó ɖe winnyá mǐtɔn síin.”*
2 Nǔ e Jexóva ná bló bɔ é ná tɔ́n kun ɖo azǎn énɛ́ gbe é ná nyɔ́ ɖɛkpɛ, bo ná xɔ susu, bɔ sínsɛ́n to ɔ tɔn ná nyí ahwanɖukpo Izlayɛ́li tɔn lɛ́ sín susu kpó ɖɛkpɛ kpó. 3 Mɛ ɖěɖěe kpo ɖo Sinyɔ́ɔ, bɔ è jó yě dó nyi Jeluzalɛ́mu lɛ́ é ɔ, è ná ylɔ́ yě ɖɔ mɛ mímɛ́, énɛ́ wɛ nyí mɛ e ɖo Jeluzalɛ́mu bɔ è wlán nyǐkɔ yětɔn ɖ’ayǐ bónú yě ná nɔ gbɛ lɛ́ é bǐ.
4 Hwenu e Jexóva ná klɔ́ ɖixó* vǐ nyɔ̌nu Sinyɔ́ɔ tɔn lɛ́ tɔn síin, bo ná klɔ́ hun e è kɔn nyi ayǐ ɖo Jeluzalɛ́mu é sín tɛ́ntin tɔn, gbɔn gbigbɔ hwɛɖiɖɔ tɔn kpó gbigbɔ e nɔ fyɔ́ nǔ* é kpó gblamɛ é ɔ, 5 Jexóva ná lɛ́ bló akpɔ́kpɔ́ kpó azizɔ kpó ɖo kéze, bo ná bló myɔ e nɔ ɖo jiji wɛ hɛhɛ é ɖo zǎnmɛ, ɖó Sinyɔ́ɔ só ɔ blěbú kpó nɔtɛn tɔn e è nɔ bló kpléɖókpɔ́ ɖaxó lɛ́ ɖe é kpó jí; ɖó bibɛtɛn ɖé ná tíin ɖo nɔtɛn susunɔ ɔ blěbú tanu. 6 Azava ɖé ná tíin bo ná nɔ ná yɛtɛn mɛ ɖo kéze ɖo yǒzo sí, bo ná nyí bibɛtɛn nú mɛ, lobo ná nya xɛ ɖo mɛ jí sín jɔhɔn syɛ́nsyɛ́n kpó jǐ kpó sí.