Jonási
2 Hwenu e Jonási ɖo hweví ɔ xomɛ é ɔ, é xo ɖɛ sɛ́dó Jexóva Mawu tɔn, 2 bo ɖɔ:
“Hwenu e un ɖo wǔvɛ́ mɛ é ɔ, un sa vo nú Jexóva, bɔ é ɖótó mì.
Hwenu e un ɖo Yɔdo* gɔngɔn* mɛ é ɔ, un sú xó bo byɔ́ alɔdó.
A se gbe ce.
3 Hwenu e a sɔ́ mì nyi dó do gɔngɔn mɛ, ɖo xu ɔ sín azan jí é ɔ,
sin e ɖo adǎn wa wɛ lɛ́ é ɖi bú mì.
Aslɔkɛ́ agbɔ̌nnɔ e a fɔ́n lɛ́ é ɖi bú mì.
4 Bɔ un ɖɔ: ‘È ko nya mì sín nukɔn towe!
Un ka sɔ́ sixú lɛ́ wá kpɔ́n sinsɛnxɔ mímɛ́ towe tlítlí gbeɖé a?
5 Sin ɖi bú mì, bɔ gbɛ ce ɖo axɔ́ nu;*
sin gɔngɔn ɖi bú mì.
Xumɛgbéhan nyanya lɛ́ lɛ́ dó ta ce.
6 Un syɔ́ káká yi só lɛ́ glɔ́.
Ayǐkúngban ɔ sín hɔntogbó lɛ́ sú dó mì káká sɔ́yi.
Amɔ̌, Jexóva Mawu ce, a ɖe mì sín do gɔngɔn mɛ wá gbɛ.
7 Hwenu e un* ɖo kú donu é ɔ, hwi Jexóva wɛ nyí mɛ e un flín é.
Énɛ́ ɔ, ɖɛ ce wá gɔ̌n towe, káká wá sinsɛnxɔ mímɛ́ towe mɛ.
8 Mɛ ɖěɖěe zé yěɖée jó nú bǒcyɔ ma xɔ akwɛ́ lɛ́ é wɔn mɛ e nyí jɔtɛn wǎnyíyí e ma nɔ sɛ do ǎ é tɔn nú yě é.*
9 Amɔ̌ nyɛ ɔ, un ná sɔ́ gbe ce dó dó kú nú we, bo lɛ́ xwlé vɔ̌sánú we.
Akpá e un dó é ɔ, un ná ɖe.
Jexóva gɔ́n wɛ hwlɛngán nɔ gosín.”
10 É wá yá é ɔ, Jexóva ɖe gbe nú hweví ɔ, bɔ é vi Jonási nyi agě jí.