Sofoníi
3 Heelú toxo gǔfɔ́ntɔ́, toxo blíblí, toxo yadónúmɛtɔ́ ɔ!
2 É ɖótó mɛ ɖěbǔ sín gbe ǎ; é yí kplɔ́n e è ná ɛ é ɖě ǎ.
É ɖeji dó Jexóva wú ǎ; é sɛkpɔ́ Mawu tɔn ǎ.
3 Axɔ́ví tɔn e ɖo toxo ɔ mɛ lɛ́ é ɔ, kinnikínní e ɖo gbe dó wɛ lɛ́ é wɛ yě nyí.
Hwɛɖɔtɔ́ tɔn lɛ́ ɔ, hla e ɖo gbě nya wɛ zǎnmɛ lɛ́ é wɛ yě nyí;
yě nɔ jó xú ɖokpó vɔ́vɔ́ dó nú è ná gba zǎnzǎn ǎ.
4 Gbeyíɖɔ tɔn lɛ́ nɔ sí mɛ ǎ, bo lɛ́ nyí gbejímanɔtɔ́.
vɔ̌sánúxwlémawutɔ́ tɔn lɛ́ nɔ hɛn nǔ e nyí nǔ mímɛ́ é blí;
yě nɔ gba sɛ́n.
5 Amɔ̌, Jexóva nyí nǔjlɔ́jlɔ́watɔ́ ɖo toxo ɔ mɛ; é nɔ wa nǔ masɔgbe ɖě ǎ.
Ayǐhɔ́ngbe ayǐhɔ́ngbe ɔ, é nɔ bló bɔ è nɔ tuun hwɛɖiɖɔ tɔn lɛ́,
lěe kéze sín wěziza ma nɔ gblá ǎ gbɔn é.
É ɖo mɔ̌ có, nǔagɔwatɔ́ nɔ tuun winnyá ǎ.
6 “Un sú kún dó nú akɔta lɛ́; atɔxwɛ yětɔn zwejí tɔn lɛ́ jɛ vɔ̌.
Un hɛn ali yětɔn lɛ́ gblé, mɔ̌ mɛ ɔ, mɛ ɖěbǔ sɔ́ nɔ gbɔn jí ǎ.
Toxo yětɔn lɛ́ húzú aglingbigba, súnnu ɖě, ɛɛn, mɛ ɖě sɔ́ ɖo yě mɛ ǎ.
7 Un ɖɔ: ‘É ɖo wɛn ɖɔ a ná ɖó sísí e gɔ́ngɔ́n é nú mì, bo ná yí gbe nú kplɔ́n,’*
bónú è ní ma gba nɔtɛn tɔn hánnyá ó,
—un ɖó ná byɔ́ ɛ ɖɔ é ní ɖó nǔ énɛ́ lɛ́ bǐ sín gbe.*
Loɔ, nǔ e nɔ sɔ́ akpakpa yě bǐ hú gǎn é wɛ nyí nǔmawaɖósɛ́nxwijí.
8 ‘Énɛ́ wú ɔ, mi ní kpo ɖo nukún ɖó mì wɛ,’* wɛ Jexóva ɖɔ,
‘káká jɛ gbe e gbe un ná sí te bo ná vɔ mɛ é,*
hwɛɖiɖɔ sín gbeta ce wɛ nyí ɖɔ un ná kplé akɔta lɛ́, un ná xo axɔ́súɖuto lɛ́ kplé,
bo ná kɔn xomɛsin ce, xomɛsin ɖaxó e jí un ɖe é bǐ dó yě jí;
ɖó akpakpa sɔ́ mɛ ce sín myɔ ná fyɔ́ ayǐkúngban ɔ blěbú.
9 Ðó ɖo hwenɛ́nu ɔ, un ná húzú togun lɛ́ sín gbe, bɔ é ná nyí gbe mímɛ́ ɖé,
mɔ̌ mɛ ɔ, yě bǐ sixú ylɔ́ nyǐkɔ Jexóva tɔn,
bo ná sɛn ɛ ɖo bǔ.’*
10 Mɛ ɖěɖěe ɖo vo sa nú mì wɛ, ɛɛn, mɛ ce e fúnfún kpé lɛ́ é sín vǐ nyɔ̌nu ɔ ná hɛn nǔníná ɖé wá nú mì
sín tɔsisa Etiopíi tɔn lɛ́ gbéjí.
11 Gbe énɛ́ gbe ɔ, winnyá ná hu we,*
ɖó nǔ ɖěɖěe a wa dó fɔ́n gǔ dó jǐ ce lɛ́ é bǐ wú ǎ,
ɖó hwenɛ́nu ɔ, un ná ɖe goyítɔ́ e nɔ tɛ afɔ ayǐ ɖo tɛ́ntin towe lɛ́ é síin;
bɔ a sɔ́ ná yí go ɖě gbeɖé ɖo só mímɛ́ ce jí ǎ.
12 Un ná yí gbe bɔ togun e nɔ sɔ́ éɖée hwe, bo nɔ lɛ́ hwíhwɛ́ éɖée é ɖé ná nɔ tɛ́ntin towe,
bɔ yě ná ba bibɛtɛn ɖo nyǐkɔ Jexóva tɔn mɛ.
13 Mɛ e kpo ɖo Izlayɛ́li lɛ́ é ná wa nǔ agɔ ǎ;
yě ná ɖó adingban ǎ, mɔ̌ jɛ́n è ma ka ná mɔ ɖɛ̌ mɛblɛ́blɛ́ tɔn ɖo nu yětɔn mɛ ǎ é nɛ́;
yě ná ɖu nǔ* bo ná mlɔ́ ayǐ, bɔ mɛ ɖě ná dó xɛsi yě ǎ.”
14 Vǐ nyɔ̌nu Sinyɔ́ɔ tɔn è, sú xó kpó awǎjijɛ kpó!
Izlayɛ́li è, sú ɖuɖéjí sín xó!
Vǐ nyɔ̌nu Jeluzalɛ́mu tɔn è, xomɛ ní hun we, jɛ awǎ kpó ayi towe bǐ kpó!
15 Hwɛ e è ɖó nú we lɛ́ é ɔ, Jexóva ɖe yě síin.
É lɛ́ kɔ nú kɛntɔ́ towe.
Jexóva, Axɔ́sú Izlayɛ́li tɔn ɔ, ɖo kpɔ́ xá we.
A sɔ́ ná ɖi xɛsi nú awěxomɛ ɖě ǎ.
16 Ðo gbe énɛ́ gbe ɔ, è ná ɖɔ nú Jeluzalɛ́mu ɖɔ:
“Sinyɔ́ɔ è, ma ɖi xɛsi ó.
Ma nú alɔ towe lɛ́ kúyɛ ó.
17 Jexóva Mawu towe ɖo kpɔ́ xá we.
Ðó é ɖó hlɔ̌nhlɔ́n wútu ɔ, é ná hwlɛ́n we.
É ná gó ɖó wǔ we kpó awǎjijɛ ɖaxó kpó.
Wǎn e é yí nú we é ná fá kɔ n’i.*
É ná hun xomɛ dó wǔ we kpó xósúsú awǎjijɛ tɔn kpó.
18 Un ná xo mɛ ɖěɖěe ɖo aluwɛ mɛ, ɖó gɔn e yě gɔn xwe towe lɛ́ domɛ é wútu lɛ́ é kplé;
yě gɔn gɔ̌n towe, ɖó winnyá e ɖu wɛ yě ɖe ɖó wǔ tɔn é wútu.
19 Éɖíe! Ðo hwenɛ́nu ɔ, un ná wa nǔ xá mɛ ɖěɖěe ɖo ya dó nú we wɛ lɛ́ é bǐ syɛ́nsyɛ́n;
un ná hwlɛ́n mɛ e ɖo tintɔn wɛ lɛ́ é,
bo ná xo mɛ ɖěɖěe gba kpé lɛ́ é kplé.
Un ná bló bɔ è ná nɔ kpa yě, bɔ nyǐkɔ yětɔn ná lɛ́ yi jǐ,
ɖo to e mɛ è dó winnyá yě ɖe lɛ́ é bǐ mɛ.
20 Ðo hwenɛ́nu ɔ, un ná kplá mi wá xwé,
ɛɛn, ɖo hwenɛ́nu ɔ, un ná xo mi kplé.
Ðó un ná bló bɔ nyǐkɔ mitɔn ná yi jǐ, bɔ è ná nɔ kpa mi ɖo togun e ɖo ayǐkúngban ɔ jí lɛ́ é bǐ mɛ,
hwenu e un ná kplá kannumɔ mitɔn lɛ́ lɛ́ kɔ bɔ mi ná mɔ é,” wɛ Jexóva ɖɔ.