Ajée

2 Ðo sun tɛ́nwegɔ́ ɔ sín azǎn 21gɔ́ ɔ gbe ɔ, Jexóva ɖɔ xó gbɔn gbeyíɖɔ Ajée jí, bo ɖɔ: 2 “Kɛnklɛ́n kanbyɔ́ tokpɔngán Judáa tɔn Zolobabɛ́li Calutiɛ́li ví ɔ, kpó vɔ̌sánúxwlémawutɔ́ ɖaxó Jozuwée Yexosadáki ví ɔ kpó, gɔ́ nú mɛ e kpo ɖo togun ɔ mɛ lɛ́ é ɖɔ: 3 ‘Mɛ̌ ka ɖo mi mɛ, bo mɔ susu e xwé* élɔ́ ɖó ɖ’ayǐ é? Nɛ̌ mi ka mɔ gbɔn ɖo din? Mi mɔ ɖɔ é cí ɖɔ é kún sɔ́ ɖó susu e é ɖó ɖ’ayǐ é ó ǎ cé?’

4 “‘Amɔ̌ din ɔ, Zolobabɛ́li, kpan akɔ́n,’ wɛ Jexóva ɖɔ, ‘vɔ̌sánúxwlémawutɔ́ ɖaxó Jozuwée Yexosadáki ví ɔ, hwi lɔ ní kpan akɔ́n.’

“‘Mi mɛ e ɖo to ɔ mɛ lɛ́ é bǐ è mi, mi kpan akɔ́n,’ wɛ Jexóva ɖɔ, ‘bo wa azɔ̌.’

“‘Ðó un ɖo kpɔ́ xá mi,’ wɛ Jexóva ahwankpá lɛ́ tɔn ɖɔ. 5 ‘Mi flín akpá e un dó nú mi hwenu e mi tɔ́n sín Ejípu é, bo lɛ́ ɖeji ɖɔ gbigbɔ ce kpo ɖo tɛ́ntin mitɔn.* Mi ma ɖi xɛsi ó.’”

6 “Ðó xó e Jexóva ahwankpá lɛ́ tɔn ɖɔ é ɖíe: ‘É sɔ́ ná lín ǎ, bɔ un ná húnhún jǐnukúnsin kpó ayǐkúngban kpó, xu kpó ayǐkúngban xúxú kpó azɔn ɖěvo.’

7 “‘Un ná húnhún akɔta lɛ́ bǐ, bɔ nǔ xɔ akwɛ́* e ɖo akɔta lɛ́ bǐ mɛ lɛ́ é ná wá xwé élɔ́ gbe, bɔ un ná bló bɔ susu ná kpé xwé ɔ gbe,’ wɛ Jexóva ahwankpá lɛ́ tɔn ɖɔ.

8 “‘Kpatágan ɔ, ce wɛ, siká ɔ, ce wɛ,’ wɛ Jexóva ahwankpá lɛ́ tɔn ɖɔ.

9 “‘Susu e xwé élɔ́ ná ɖó ɖo sɔgúdo é ná hú gǎn ée é ɖó ɖ’ayǐ é,’ wɛ Jexóva ahwankpá lɛ́ tɔn ɖɔ.”

“‘Bɔ un ná ɖó fífá ayǐ ɖo tɛn élɔ́ mɛ,’ wɛ Jexóva ahwankpá lɛ́ tɔn ɖɔ.

10 Ðo sunzán tɛ́nnɛgɔ́ ɔ sín azǎn 24gɔ́ ɔ gbe, ɖo Daliwúsi sín xwe wegɔ́ ɔ mɛ ɔ, Jexóva ɖɔ xó nú gbeyíɖɔ Ajée, bo ɖɔ: 11 “Xó e Jexóva ahwankpá lɛ́ tɔn ɖɔ é ɖíe: ‘Kɛnklɛ́n, kan nǔ élɔ́ byɔ́ vɔ̌sánúxwlémawutɔ́ lɛ́ dó sɛ́n ɔ wú: 12 “Ényí mɛɖé sɔ́ lan e è sɔ́ dó sá vɔ̌ ná é* dó awu tɔn sín akpo mɛ, bónú awu ɔ jɛ wɔ̌xúxú, alǒ nǔsúnnú, alǒ vɛ̌ɛn, alǒ ami, alǒ nǔɖuɖu alɔkpa ɖěbǔ wú ɔ, nǔɖuɖu ɔ ná húzú nǔ mímɛ́ wɛ a?”’”

Vɔ̌sánúxwlémawutɔ́ lɛ́ yí gbe ɖɔ: “Éǒ!”

13 Énɛ́ gúdo ɔ, Ajée kanbyɔ́ ɖɔ: “Ényí mɛ e nyí mɛ blíblí, ɖó é ɖ’alɔ cyɔ wú wútu é* ɖ’alɔ nǔ énɛ́ lɛ́ ɖě wú ɔ, nǔ ɔ ná húzú nǔ blíblí wɛ a?”

Vɔ̌sánúxwlémawutɔ́ lɛ́ yí gbe ɖɔ: “É ná húzú nǔ blíblí.”

14 Énɛ́ ɔ, Ajée ɖɔ: “‘Mɔ̌ wɛ togun élɔ́ cí, mɔ̌ wɛ akɔta élɔ́ cí ɖo nukɔn ce,’ wɛ Jexóva ɖɔ, ‘bɔ mɔ̌ wɛ alɔ yětɔn núwiwa lɛ́ lɔ bǐ cí; nǔ ɖěbǔ e yě nɔ dó sá vɔ̌ lɛ́ é nɔ nyí nǔ blíblí.’

15 “‘Amɔ̌ din ɔ, mi kɛnklɛ́n sɔ́ ayi ɖó* nǔ élɔ́ jí ganjí, bɛ́ sín égbé ɖidó: Cóbónú è ná sɔ́ awǐnnya ɖě dó ɖěvo jí ɖo sinsɛnxɔ Jexóva tɔn mɛ ɔ, 16 nɛ̌ nǔ lɛ́ ka ɖe gbɔn hwenɛ́nu? Ényí mɛɖé wá nǔkún sín agɔ̌ kɔn, bo ɖó nukún nǔjlɛ́nú 20 ɔ, 10 géé wɛ é nɔ mɔ; bɔ ényí mɛɖé wá vɛ̌ɛn sín balíi kɔn, bo jló ná gbɔ́n nǔjlɛ́nú 50 sín mɛ ɔ, 20 géé wɛ é nɔ mɔ; 17 un sɔ́ jɔhɔn xúxú, azɔn e nɔ hu nǔ e ɖo gle mɛ lɛ́ é kpó kɛ́njí kpó dó xo mi, énɛ́ wɛ nyí alɔ mitɔn núwiwa lɛ́ bǐ, loɔ, mi mɛ ɖě lɛ́ kɔ wá gɔ̌n ce ǎ,’ wɛ Jexóva ɖɔ.

18 “‘Égbé, ɖo sun tɛ́nnɛgɔ́ ɔ sín azǎn 24gɔ́ ɔ gbe ɔ, è dó sinsɛnxɔ Jexóva tɔn do; mi kɛnklɛ́n sɔ́ ayi ɖó* nǔ élɔ́ jí ganjí, bɛ́ sín égbé ɖidó: 19 Nǔkún kpo ɖo agɔ̌* mɛ wɛ a? Vǐwuntín, fígitín, glenáditín kpó olívutín kpó ko ná sínsɛ́n ǎ, kabǐ? Bɛ́ sín égbé ɔ, un ná nɔ kɔn nyɔ̌ná dó mi jí.’”

20 Ðo sun ɔ sín azǎn 24gɔ́ ɔ gbe ɔ, Jexóva ɖɔ xó nú Ajée azɔn wegɔ́ ɔ, bo ɖɔ: 21 “Ðɔ nú tokpɔngán Judáa tɔn Zolobabɛ́li ɖɔ: ‘Un ɖo jǐnukúnsin kpó ayǐkúngban kpó ná húnhún wɛ. 22 Un ná flí axɔ́súɖuto lɛ́ sín axɔ́súzinkpo lɛ́ xwe, bo ná yí axɔ́súɖuto akɔta lɛ́ tɔn lɛ́ sín hlɔ̌nhlɔ́n sín yě sí; un ná flí ahwankɛkɛ́ ɔ kpó mɛ e ɖo kunkun wɛ lɛ́ é kpó xwe, bɔ sɔ́ lɛ́ kpó sɔ́xátɔ́ lɛ́ kpó ná j’ayǐ, mɛ ɖokpó ɖokpó gbɔn nɔví tɔn sín hwǐ gblamɛ.’”

23 “‘Ðo azǎn énɛ́ gbe ɔ,’ wɛ Jexóva ahwankpá lɛ́ tɔn ɖɔ, ‘hwɛ mɛsɛntɔ́ ce Zolobabɛ́li Calutiɛ́li ví ɔ, un ná sɔ́ we,’ wɛ Jexóva ɖɔ, ‘un ná bló bɔ a ná cí alɔkɛ́ e è nɔ ɖó wuntun nǔ ná é ɖɔhun, ɖó hwi wɛ nyí mɛ e un sɔ́ é,’ wɛ Jexóva ahwankpá lɛ́ tɔn ɖɔ.”