Zakalíi
10 “Mi byɔ́ jǐ Jexóva ɖo xwejíhwenu.
Jexóva wɛ nɔ bló akpɔ́kpɔ́ e nɔ dɔn jɔhɔn syɛ́nsyɛ́n wá lɛ́ é,
éyɛ́ wɛ nɔ bló bɔ jǐ nɔ ja nú gbɛtɔ́ lɛ́,
bo nɔ ná gběhan e ɖo gle mɛ lɛ́ é mɛ bǐ.
Yě nɔ ɖɔ xó dó dlɔ̌ maɖótaɖé lɛ́ wú,
bo nɔ tɛ́n kpɔ́n bo ná dó gbɔ nú mɛ, é ka nɔ ná nǔɖé ǎ.
Nǔ e wú yě ná flú lɛ̌ngbɔ́ lɛ́ ɖɔhun é nɛ́.
Yě ná se wǔvɛ́, ɖó lɛ̌ngbɔ́nyitɔ́ ɖě ɖe ǎ.
3 Un sin xomɛ dó lɛ̌ngbɔ́nyitɔ́ lɛ́ syɛ́nsyɛ́n,
un ná byɔ́ gǎn yadónúmɛtɔ́ lɛ́* ɖɔ yě ní ɖó gbe;
ɖó Jexóva ahwankpá lɛ́ tɔn nyi kɔ kpɔ́n lɛ̌ngbɔ́hwan tɔn, ɛɛn, togun Judáa tɔn,
bo bló bɔ yě cí sɔ́ tɔn susunɔ ɔ ɖo ahwangbénu ɖɔhun.
4 É gɔ́n wɛ gǎn ɔ* nɔ gosín,
é gɔ́n wɛ acɛkpatɔ́ e nɔ d’alɔ mɛ é* nɔ gosín,
é gɔ́n wɛ daswé* ahwanfunfun tɔn ɔ nɔ gosín,
é gɔ́n wɛ nukúnkpénǔwútɔ́* lɛ́ bǐ nɔ gosín, kplékplé yě bǐ tɔn.
5 Yě ná wá cí ahwanfuntɔ́ ɖěɖěe
nɔ gbídí ali jí sín babá ɖó afɔ wú ɖo ahwangbénu lɛ́ é ɖɔhun.
Yě ná fun ahwan, ɖó Jexóva ɖo kpɔ́ xá yě;
bɔ è ná dó winnyá sɔ́xátɔ́ lɛ́.
6 Un ná bló bɔ togun Judáa tɔn ná ɖu ɖ’é jí,
bo ná hwlɛ́n xwédo Jozɛ́fu tɔn.
Un ná kplá yě lɛ́ kɔ wá to yětɔn mɛ,
ɖó un ná kú nǔbláwǔ nú yě;
ninɔmɛ yětɔn ná cí ɖɔ un kún nya yě dó gbě kpɔ́n ó ɖɔhun;
ɖó nyɛ wɛ nyí Jexóva Mawu yětɔn; un ná ná xósin yě.
7 Mɛ e nyí Eflayímu tɔn lɛ́ é ná wá cí ahwanfuntɔ́ hlɔ̌nhlɔ́nnɔ ɖé ɖɔhun,
awǎjijɛ ná gɔ́ ayi yětɔn mɛ, vɛ̌ɛn wɛ yě nu ɖɔhun.
Vǐ yětɔn lɛ́ ná mɔ nǔ énɛ́ bo ná j’awǎ;
awǎjijɛ ná gɔ́ ayi yětɔn mɛ, ɖó Jexóva wú.
8 ‘Un ná kwínkwín dó ylɔ́ yě, bo ná xo yě kplé ɖó kpɔ́;
ɖó un ná vɔ́ yě xɔ, bɔ yě ná wá sukpɔ́,
bo ná lɛ́ ɖo kpɔ́ su d’é jí wɛ.
9 Un na bo fúnfún yě kpé nǔkún ɖɔhun ɖo togun lɛ́ tɛ́ntin ɔ,
yě ná flín mì ɖo fí e lín tawun lɛ́ é;
gǎn ná lɛ́ wá yě kpó vǐ yětɔn lɛ́ kpó wú, bɔ yě ná lɛ́ kɔ.
10 Un ná kplá yě lɛ́ kɔ sín Ejípu to mɛ,
bo ná xo yě kplé sín Asilíi;
un ná kplá yě wá Galádi yíkúngban jí kpó Libáan kpó,
bɔ tɛnmɛ ná kpé yě ǎ.
11 Un ná sɔ́ awě dó xo xu ɔ zlɛ́;
un ná hwíhwɛ́ aslɔkɛ́ xu ɔ tɔn lɛ́;
Nilu sín sin lɛ́ bǐ ná mɛ.
È ná hwíhwɛ́ goyíyí Asilíi tɔn,
bɔ gǎnkpo Ejípu tɔn ná bú.
12 Yě ná ɖó ɖuɖéjí gbɔn nyɛ Jexóva gblamɛ,
bɔ yě ná ɖi zɔnlin ɖo nyǐkɔ ce mɛ,’ wɛ Jexóva ɖɔ.”