Nǔ e Mɛsɛ́dó lɛ́ wa lɛ́ é
25 Ée Fɛsitúsi wá tokpɔn ɔ mɛ bo jɛ acɛ kpa jí, bɔ é ko ɖó azǎn atɔn gúdo é ɔ, é gosín Sezalée bo yi Jeluzalɛ́mu. 2 Énɛ́ ɔ, vɔ̌sánúxwlémawutɔ́gán lɛ́ kpó Jwifu nukúnɖéjí lɛ́ kpó yi jɛ Pɔ́lu sín hwɛ n’i. Yě jɛ vo sa nú Fɛsitúsi jí ɖɔ 3 é ní jɔ wǔ émí bo sɛ́ wɛn dó, bónú è ní kplá Pɔ́lu wá Jeluzalɛ́mu. Tuto bló wɛ yě ka ɖe, bo ná tɔwu nú Pɔ́lu bo ná hu i ɖo ali ɔ jí. 4 É ɖo mɔ̌ có, Fɛsitúsi yí gbe ɖɔ Pɔ́lu ní nɔ gan mɛ ɖo Sezalée, lé émíɖésúnɔ ná lɛ́ kɔ yi dɔ̌n zaanɖé din. 5 É ɖɔ: “Ényí nya énɛ́ wa nǔ nyanya ɖé nǔgbó hǔn, mi nú mɛ e nyí mɛ nukúnɖéjí ɖo mi mɛ lɛ́ é ní xwedó mì yi dɔ̌n, bo ná yi dó hwɛ ɛ.”
6 É bló azǎn tántɔn yi wǒ mɔ̌ xá yě; énɛ́ gúdo ɔ, é ɖidó Sezalée, bɔ ayǐhɔ́ngbe tɔn ɔ, é jínjɔ́n hwɛɖiɖɔzinkpo* jí, bo ɖe gbe ɖɔ è ní kplá Pɔ́lu wá. 7 Ée é wá é ɔ, Jwifu e gosín Jeluzalɛ́mu wá lɛ́ é lɛ́ lɛ̌ dó è, bo jɛ hwɛ syɛ́nsyɛ́n gěgé dó è jí; yě ka kpé wú bo ɖe xlɛ́ ɖɔ hwɛ énɛ́ lɛ́ nyí nǔgbó ǎ.
8 Amɔ̌, Pɔ́lu jɛ hun dó éɖée jí bo ɖɔ: “Un jɛ agɔ ɖě dó Sɛ́n Jwifu lɛ́ tɔn, tɛ́npli ɔ, alǒ Sezáa ǎ.” 9 Ðó Fɛsitúsi jló ná nyɔ́ ɖo Jwifu lɛ́ sí wútu ɔ, é yí gbe nú Pɔ́lu ɖɔ: “A jló ná yi Jeluzalɛ́mu, bɔ è ná ɖɔ hwɛ xá we dó nǔ énɛ́ lɛ́ wú ɖo nukɔn ce ɖo dɔ̌n a?” 10 Amɔ̌, Pɔ́lu ɖɔ: “Un ɖo te ɖo hwɛɖiɖɔzinkpo* Sezáa tɔn nukɔn, fí e è ɖó ná ɖɔ hwɛ ce ɖe é. Un wa nǔɖé nyi do nú Jwifu lɛ́ ǎ, lěe hwiɖésúnɔ ɖo nǔ mɔ jɛ wú wɛ gbɔn céɖécéɖé é. 11 Ényí un wa nǔ nyanya ɖé nǔgbó, bo hu hwɛ e jɛxá kú é ɖě hǔn, un gbɛ́ kú ǎ; amɔ̌, ényí hwɛ e dó mì wɛ mɛ élɔ́ lɛ́ ɖe lɛ́ é ma nyi ta fí ɖé ǎ ɔ, mɛ ɖěbǔ ɖó acɛ bo ná jó mì nú yě, bá dó nyɔ́ ɖo yě sí ǎ. Un vɔ́ hwɛ ylɔ́ bá yi Sezáa nukɔn!” 12 Bɔ ée Fɛsitúsi ɖɔ xó xá wěɖexámɛtɔ́ tɔn lɛ́ gúdo é ɔ, é yí gbe ɖɔ: “A vɔ́ hwɛ ylɔ́ bá yi Sezáa nukɔn; hǔn a ná yi Sezáa gɔ́n.”
13 Azǎn yɔywɛ ɖé gúdo ɔ, axɔ́sú Aglípa kpó Belenísi kpó wá Sezalée, bo ná dó gbe Fɛsitúsi. 14 Yě nɔ fínɛ́ nú azǎn gěgé, bɔ Fɛsitúsi ɖɔ Pɔ́lu sín xó nú axɔ́sú ɔ, bo ɖɔ:
“Nya ɖé ɖo fí, bɔ Felísi jó è dó nyi gan mɛ. 15 Hwenu e un ɖo Jeluzalɛ́mu é ɔ, vɔ̌sánúxwlémawutɔ́gán lɛ́ kpó tomɛxó Jwifu lɛ́ tɔn lɛ́ kpó wá jɛ hwɛ tɔn nú mì, bo byɔ́ ɖɔ è ní ɖó hwɛ n’i. 16 Amɔ̌, un yí gbe nú yě ɖɔ Hlɔ̌manu lɛ́ kún nɔ jó mɛɖé nú mɛ ɖěvo, bo ná dó nyɔ́ ɖo mɛ ɔ sí ó, lé è to nɔ hun ali nú mɛ e è dó hwɛ é, bɔ é nɔ jɛ hun dó éɖée jí, ɖo mɛ e dó hwɛ ɛ lɛ́ é nukɔn hwɛ̌. 17 Énɛ́ wú ɔ, ée yě wá fí é ɔ, un sɔ́ dán lɛjɛlɛjɛ ǎ, é nyɔ́ wa ɔ, un jínjɔ́n hwɛɖiɖɔzinkpo* jí ayǐhɔ́ngbe tɔn, bo ɖe gbe ɖɔ è ní kplá nya ɔ wá. 18 Hwɛdómɛtɔ́ lɛ́ sí te bo jɛ hwɛ dó è jí, amɔ̌, nǔ nyanya e un lin ná se dó wǔ tɔn lɛ́ é ɔ, yě dó ɖě sín hwɛ ɛ ǎ. 19 Nǔ e jí yě dɔn nǔ xá ɛ dó kpowun é wɛ nyí sinsɛn yěɖésúnɔ tɔn, bo lɛ́ dɔn nǔ xá ɛ dó nya e nɔ nyí Jezu bo ko kú, bɔ Pɔ́lu ka nɔ ɖɔ ɖɔ é ɖo gbɛ é wú. 20 Ðó un ma tuun lěe un ná ɖe ɖɛ nǔdindɔn énɛ́ gbɔn é ǎ wútu ɔ, un kanbyɔ́ ɛ ɖɔ é jló ná yi Jeluzalɛ́mu, bónú è ná ɖɔ hwɛ xá ɛ dó nǔ énɛ́ lɛ́ wú ɖo dɔ̌n a jí. 21 Amɔ̌, ée Pɔ́lu vɔ́ hwɛ ylɔ́, bo ɖɔ ɖɔ émí ná nɔ gan mɛ, káká jɛ hwenu e Dadá Hlɔ̌ma tɔn ná ɖe gbeta tɔn tɔ́n é ɔ, un ɖe gbe ɖɔ é ní nɔ gan mɛ, káká jɛ hwenu e un ná sɛ́ ɛ dó Sezáa gɔ́n é.”
22 Énɛ́ ɔ, Aglípa ɖɔ nú Fɛsitúsi ɖɔ: “Nyiɖésúnɔ jló ná se xó ɖo nya ɔ nu.” É ɖɔ: “A ná se xó ɖo nu tɔn sɔ.” 23 Énɛ́ wú ɔ, ayǐhɔ́ngbe tɔn ɔ, Aglípa kpó Belenísi kpó wá, kpó susu ɖaxó kpó, bo byɔ́ hwɛɖɔxɔsá ɔ, yě kpó sɔ́ja afatɔ́ngán lɛ́ kpó, gɔ́ nú mɛ nukúnɖéjí toxo ɔ tɔn lɛ́; bɔ hwenu e Fɛsitúsi ɖe gbe é ɔ, è kplá Pɔ́lu wá. 24 Énɛ́ ɔ, Fɛsitúsi ɖɔ: “Axɔ́sú Aglípa kpó mi mɛ e kplé ɖo fí xá mǐ lɛ́ é bǐ kpó è mi, mi kpɔ́n nya élɔ́. Jwifu lɛ́ bǐ wɛ ɖɔ xó tɔn nú mì ɖo Jeluzalɛ́mu kpó fí kpó, bo nɔ sú xó ɖɔ è ɖó ná hu i. 25 Amɔ̌, un mɔ nǔ jɛ wú ɖɔ é kún wa nǔ e jɛxá kú é ɖě ó. Énɛ́ wú ɔ, ée nya élɔ́ ɖésúnɔ vɔ́ hwɛ ylɔ́ ɖo Dadá Hlɔ̌ma tɔn gɔ́n é ɔ, un wá gbeta ɔ kɔn bo ná sɛ́ ɛ dó. 26 Un ka tuun nǔ bǔ e un ná wlán dó wǔ tɔn sɛ́dó Aklúnɔ ce é ǎ. Énɛ́ wú ɔ, un kplá ɛ wá mi bǐ nukɔn, ɖo tají ɔ, hwi axɔ́sú Aglípa nukɔn, bɔ ényí è kan nǔ byɔ́ ɛ gúdo ɔ, un ná mɔ nǔ e un ná wlán é. 27 Ðó é sɔgbe ɖo nukún ce mɛ ɖɔ má sɛ́ gantɔ́ ɖé dó, bo ka gɔn hwɛ e è dó è lɛ́ é ɖɔ ǎ.”