Jonási
3 Énɛ́ gúdo ɔ, Jexóva ɖɔ nú Jonási azɔn wegɔ́ ɔ ɖɔ: 2 “Sí te, bo yi Ninívu, toxo ɖaxó ɔ mɛ, bo dó wɛn e dó we wɛ un ɖe é yě.”
3 Énɛ́ ɔ, Jonási se tónú nú xó Jexóva tɔn, bo yi Ninívu. Toxo e d’agba tawun é ɖé* wɛ Ninívu nyí, bɔ é nɔ byɔ́ azǎn atɔn cóbɔ è ná ɖi zɔnlin gbɔn mɛ. 4 Jonási byɔ́ toxo ɔ mɛ, bo ɖi zɔnlin nú azǎn ɖokpó blěbú, bɔ é ɖo yiyi wɛ ɔ, é nɔ jlá ɖɔ: “Ðo azǎn 40 kpowun gbe ɔ, è ná gba Ninívu.”
5 Mɛ e ɖo Ninívu lɛ́ é bǐ ɖi nǔ nú Mawu, bɔ yě jlá ɖɔ: Mɛ bǐ, sín mɛxó bǐ ɔ jí káká yi mɛ kpɛví bǐ ɔ jí ní blá nu, bo dó ati. 6 Ée axɔ́sú Ninívu tɔn se wɛn ɔ é ɔ, é sí te sín axɔ́súzinkpo tɔn jí, bo ɖe axɔ́súwu tɔn, bo dó ati, lobo jínjɔ́n afín mɛ. 7 Gɔ́ ná ɔ, é ɖe gbe ɖɔ è ní jlá gbɔn Ninívu toxo ɔ mɛ ɖɔ:
“Nyɛ axɔ́sú ɔ kpó mɛ nukúnɖéjí ce lɛ́ kpó ɖe gbetakɛ́n élɔ́ tɔ́n: Mɛ ɖěbǔ, alǒ kanlin ɖěbǔ, ɖaxó abǐ kpɛví, ɖó ná dó kɛ́n nu ǎ. Ɛɛn, yě ɖó ná ɖu nǔ ǎ, mɔ̌ jɛ́n yě ma ka ɖó ná lɛ́ nu sin ǎ é nɛ́. 8 Mi nú gbɛtɔ́ kpó kanlin kpó bǐ ní dó ati; mi nú yě ní sa vo nú Mawu vɛ́návɛ́ná, bo jó ali nyanya e yě mlɛ́ lɛ́ é kpó dǎka e yě nɔ xo lɛ́ é kpó dó. 9 È nɔ nywɛ́ ǎ, Mawu nǔgbó ɔ sixú húzú linlin dó nǔ e é lin ná wa é wú,* bɔ é ná jó xomɛsin syɛ́nsyɛ́n e jí é ɖe é dó, bɔ mǐ ná dɔn ǎ.”
10 Ée Mawu nǔgbó ɔ mɔ nǔ e yě wa é, lěe yě jó ali nyanya e yě mlɛ́ lɛ́ é dó gbɔn é ɔ, é húzú linlin dó awě e é ɖɔ émí ná dɔn wá yě jí é wú,* bɔ é sɔ́ dɔn wá ǎ.