Ezayíi
60 “Hwi nyɔ̌nu è, fɔ́n, tá wěziza, ɖó wěziza towe wá.
Susu Jexóva tɔn hɔ́n dó jǐ towe.
2 Ðó éɖíe! Zǐnflú ná cyɔ́n ayǐkúngban ɔ,
bɔ ablu gɔngɔn ná cyɔ́n akɔta lɛ́;
amɔ̌, Jexóva ná tá wěziza dó jǐ towe,
bɔ è ná mɔ susu tɔn ɖo jǐ towe.
3 Akɔta lɛ́ ná wá wěziza towe nu,
bɔ axɔ́sú lɛ́ ná wá wěziza towe e ɖo kínkɔ́n wɛ é* nu.
4 Sɔ́ nukún d’aga, bo kpɔ́n nǔ e lɛ́ lɛ̌ dó we lɛ́ é bǐ!
È xo yě mɛ bǐ kplé; yě jawě gɔ̌n towe.
Vǐ súnnu towe lɛ́ ɖo fí línlín gosín wá wɛ,
bɔ è hɛn vǐ nyɔ̌nu towe lɛ́ ɖó akpá.
5 Hwe énɛ́ nu ɔ, a ná mɔ, bɔ awǎjijɛ ná tɔ́n ɖo nukún towe ta,
xomɛ ná hun we, bɔ awǎjijɛ ná gɔ́ ayi towe mɛ,
ɖó è ná bɛ́ dɔkun e ɖo xu mɛ lɛ́ é wá gɔ̌n towe;
nǔɖókan akɔta lɛ́ tɔn ná wá gɔ̌n towe.
6 Lǎkúnmí wɔ̌búwɔ́bú ná gɔ́ to towe,*
lǎkúnmísú wínnyáwínnyá Madiyáni tɔn lɛ́ kpó Efa tɔn lɛ́ kpó.
Mɛ e nɔ nɔ Cɛba lɛ́ é bǐ ná wá;
yě ná hɛn siká kpó zǎlínkpɔ́n wěwé kpó wá.
Yě ná jlá susu Jexóva tɔn.
7 È ná xo kanlinhwan Kedáa tɔn lɛ́ bǐ kplé dó gɔ̌n towe.
Agbo e ɖo Nɛbayɔ́ti lɛ́ é ná wa mɛsɛntɔ́zɔ́ nú we.
Yě ná wá vɔ̌sákpe ce jí, bɔ un ná yí gbe nú yě,
un ná ba acɔ́ nú xwé ce susunɔ* ɔ.
8 Mɛ̌ ɖětɛ́ lɛ́ ka jawě akpɔ́kpɔ́ lɛ́ ɖɔhun nɛ́?
Mɛ̌ ɖětɛ́ lɛ́ ka ɖo zinzɔn wɛ ahwannɛ́ lɛ́ zɔn xwe adɔ̌ yětɔn lɛ́ mɛ* ɖɔhun nɛ́?
9 Ðó nyɛ wɛ tɔtɛ́ntinto lɛ́ ná ɖó nukún;
tɔjíhún Taasísi tɔn lɛ́ ɖo nukɔn,*
bo ná kplá vǐ súnnu towe lɛ́ wá sín fí línlín,
gɔ́ nú kpatágan yětɔn kpó siká yětɔn kpó,
nú nyǐkɔ Jexóva Mawu towe tɔn kpó Mɛ mímɛ́ Izlayɛ́li tɔn ɔ kpó,
ɖó é ná sɔ́ we su.*
10 Toɖévomɛnu lɛ́ ná mɛ dǒ towe lɛ́,
bɔ axɔ́sú yětɔn lɛ́ ná wa mɛsɛntɔ́zɔ́ nú we,
ɖó xomɛ e sin mì é zɔ́n bɔ un xo we,
amɔ̌, un ná kú nǔbláwǔ nú we, ɖó fɛ́nú* ce wú.
11 Hɔntogbó towe lɛ́ ná ɖo nuvo hwebǐnu,
è ná sú yě kéze alǒ zǎnmɛ ǎ,
bónú è ná dó sixú hɛn nǔɖókan akɔta lɛ́ tɔn wá nú we,
bɔ axɔ́sú yětɔn lɛ́ ná nɔ nukɔn ná.
12 Ðó akɔta ɖěbǔ kpó axɔ́súɖuto ɖěbǔ kpó e ma ná wa mɛsɛntɔ́zɔ́ nú we ǎ é ná dɔn,
bɔ è ná sú kún dó nú akɔta énɛ́ lɛ́ bǐ mlɛ́mlɛ́.
13 Susu Libáan tɔn ná wá gɔ̌n towe,
è ná hɛn jenɛvliyéetín, flɛ́nitín kpó siplɛ́tín kpó wá,
bo ná dó ba acɔ́ nú tɛn mímɛ́ ce;
un ná sɔ́ afɔɖótɛn ce su.
14 Vǐ súnnu mɛ e ɖo kɔ gbídí nú we wɛ lɛ́ é tɔn lɛ́ ná wá, bo ná ɖe kɔ́ ɖo nukɔn towe;
mɛ e ɖo nǔ wa xá we wɛ kpó mɛmasí kpó lɛ́ é bǐ ɖó ná ɖe kɔ́ ɖo afɔ towe kɔn,
yě ná ylɔ́ we ɖɔ toxo Jexóva tɔn,
Sinyɔ́ɔ, Mɛ mímɛ́ Izlayɛ́li tɔn ɔ tɔn.
15 È sɔ́ ná jó we dó, bo sɔ́ ná gbɛ́ wǎn nú we, lobɔ mɛ ɖěbǔ sɔ́ ná gɔn tɛ́ntin towe gbɔn ɖě ǎ,
é nyɔ́ wa ɔ, un ná bló bɔ è ná nɔ gó ɖó wǔ we káká sɔ́yi,
è ná nɔ j’awǎ ɖó wǔ we ɖo jijimɛ lɛ́ bǐ mɛ.
16 A ná nu anɔ̌sin akɔta lɛ́ tɔn,
bo ná nɔ́ anɔ̌ axɔ́sú lɛ́ tɔn;
a ná tuun dandan ɖɔ nyɛ Jexóva ɔ, nyɛ wɛ nyí Mɛhwlɛ́ngántɔ́ towe,
Mɛ hlɔ̌nhlɔ́nnɔ Jakɔ́bu tɔn ɔ, wɛ nyí mɛ e vɔ́ we xɔ é.
17 Un ná hɛn siká wá ɖó ganvɔ tɛnmɛ,
bo ná hɛn kpatágan wá ɖó gan tɛnmɛ,
un ná hɛn ganvɔ wá ɖó atín tɛnmɛ,
bo ná hɛn gan wá ɖó awǐnnya tɛnmɛ;
un ná sɔ́ fífá bɔ é ná nyí nukúnkpénǔwútɔ́ towe,
bo ná sɔ́ nǔjlɔ́jlɔ́wiwa bɔ é ná nyí mɛ e nɔ ɖe azɔ̌ nú we é.
18 È sɔ́ ná se dǎkaxixo sín xó ɖě ɖo to towe mɛ ǎ,
è ka sɔ́ ná lɛ́ se kúnsúdónúnǔ kpó nǔhɛngblé kpó sín xó ɖě ɖo dogbó towe lɛ́ tɛ́ntin ǎ.
A ná ylɔ́ dǒ towe lɛ́ ɖɔ Hwlɛngán, bo ná ylɔ́ hɔntogbó towe lɛ́ ɖɔ Susu kpikpa.
19 Ðó hwesivɔ́ sɔ́ ná nyí wěziza nú we ɖo kéze ɖě ǎ,
mɔ̌ jɛ́n kɔ́n e sun nɔ kɔ́n é ma sɔ́ ná ná we wěziza ɖě ǎ é nɛ́,
ɖó Jexóva ná húzú wěziza mavɔmavɔ nú we,
bɔ Mawu towe ná nyí ɖɛkpɛ towe.
20 Hwesivɔ́ towe sɔ́ ná yi xɔ ɖě ǎ,
mɔ̌ jɛ́n sun towe ma sɔ́ ná cí fitii ɖě ǎ é nɛ́,
ɖó Jexóva ná húzú wěziza mavɔmavɔ nú we,
bɔ alěníná sín azǎn towe lɛ́ ná wá vivɔnu.
21 Togun towe bǐ ná nyí nǔjlɔ́jlɔ́watɔ́;
yě ná ɖu to ɔ sín gǔ káká sɔ́yi.
Yě wɛ nyí nǔ e un dó, bɔ é tɔ́n kun é.
Alɔ ce núwiwa wɛ yě nyí, bónú yě ná ba acɔ́ nú mì.
22 Mɛ kpɛɖé ná húzú afatɔ́n,
bɔ mɛ e ma ɖó gǎn ɖé ǎ é ná húzú akɔta hlɔ̌nhlɔ́nnɔ.
Nyɛ Jexóva ɖésúnɔ ná yá wǔ bló mɔ̌ bléwún ɖo hwetɔnnu.”