Ezayíi
59 Éɖíe! Alɔ Jexóva tɔn hwe dín bónú é ná hwlɛ́n mɛ ǎ,
mɔ̌ jɛ́n tó tɔn ma sú* dín bónú é ná se nǔ ǎ é nɛ́.
2 Éǒ, nǔwanyido miɖésúnɔ tɔn lɛ́ wɛ ɖe mi ɖó vo nú Mawu mitɔn.
Hwɛhuhu mitɔn lɛ́ wɛ zɔ́n bɔ é hwlá nukúnmɛ tɔn dó mi,
bo gbɛ́ ɖɔ émí kún ná ɖótó mi ó.
3 Ðó hun wɛ hɛn alɔkpákpá mitɔn lɛ́ blí,
bɔ nǔwanyido hɛn alɔví mitɔn lɛ́ blí.
Nu mitɔn nɔ ɖó adingban, bɔ ɖɛ̌ mitɔn nɔ ɖɔ nǔagɔwiwaxó.
4 Mɛ ɖěbǔ nɔ jɛ hun dó nǔjlɔ́jlɔ́wiwa jí ǎ,
mɛ ɖěbǔ nɔ yi hwɛ nukɔn kpó nǔgbóɖiɖɔ kpó ǎ.
Yě nɔ ɖeji dó nǔ tófwé* wú, bo nɔ ɖɔ xó yǎyá.
Yě nɔ mɔ tagba sín xo, bo nɔ ji nǔ e nɔ hɛn nǔ gblé dó mɛ wú é.
5 Yě nɔ flé dan aɖǐnɔ sín azin,
bo nɔ lɔn yɛglétetedɔ́,
mɛ ɖěbǔ e ɖu azin yětɔn é ná kú,
bɔ azin e è gba é ɔ, jakpata ná tɔ́n sín mɛ.
6 Yɛglétetedɔ́ yětɔn ná nyí awu ǎ,
mɔ̌ jɛ́n yěɖésúnɔ ma ná cyɔ́n nǔ e yě nɔ bló lɛ́ é ǎ é nɛ́.
Nǔwiwa yětɔn lɛ́ nɔ hɛn nǔ gblé dó mɛ wú,
bɔ dǎkaxixo sín nǔwiwa lɛ́ ɖo alɔ yětɔn lɛ́ mɛ.
7 Yě nɔ ɖo wezun jí bo ná wa nǔ nyanya,
lobo nɔ ɖo hwlɛndó jí bo ná kɔn xomɛvɔ́nɔ sín hun kɔn nyi ayǐ.
Linlin yětɔn lɛ́ ɔ, nǔhɛngblédómɛwú sín linlin lɛ́ wɛ;
nǔhɛngblé kpó wǔvɛ́ kpó wɛ ɖo ali yětɔn lɛ́ jí.
8 Yě tuun fífáli ɔ ǎ,
bɔ hwɛjijɔ ɖěbǔ ɖo ali yětɔn lɛ́ jí ǎ.
Yě nɔ bló bɔ ali yětɔn lɛ́ nɔ gɔ́ndɔ́n;
mɛ ɖěbǔ e nɔ ɖi zɔnlin gbɔn jí é ná mɔ fífá ǎ.
9 Nǔ e wú hwɛjijɔ lín dó mǐ tawun,
bɔ nǔjlɔ́jlɔ́wiwa ma xwedó mǐ wú ǎ é nɛ́.
Mǐ nɔ ɖo nukún ɖó wěziza wɛ, amɔ̌, ablu wɛ dó;
mǐ nɔ ɖo nukún ɖó wɛ ɖɔ gbɛ mɛ ní hɔ́n, amɔ̌, mǐ kpo ɖo zɔnlin ɖi wɛ ɖo zǐnflú mɛ.
10 Nukúntɔ́nnɔ lɛ́ ɖɔhun ɔ, mǐ nɔ ɖo avi dlá wɛ bo ná dó mɔ dǒ ɔ;
mǐ nɔ ɖo avi dlá wɛ mɛ e ma ɖó nukún ǎ lɛ́ é ɖɔhun.
Mǐ nɔ klɛ́n afɔ hwemɛ cíɖíɖí zǎn ɖo bibɔ wɛ ɖɔhun;
mɛkúkú ɖɔhun kpowun wɛ mǐ nɔ cí ɖo hlɔ̌nhlɔ́nnɔ lɛ́ tɛ́ntin.
11 Mǐ bǐ nɔ ɖo adǎngbe dó wɛ lɔnmɔ lɛ́ ɖɔhun,
bo nɔ ɖo finfan wɛ kpó aluwɛ kpó ahwannɛ́ lɛ́ ɖɔhun.
Mǐ nɔ ɖo nukún ɖó hwɛjijɔ wɛ, amɔ̌, hwɛjijɔ ɖě ɖe ǎ;
mǐ nɔ ɖo nukún ɖó hwlɛngán wɛ, amɔ̌, é lín dó mǐ tawun.
12 Ðó gǔfínfɔ́n núwiwa mǐtɔn lɛ́ sukpɔ́ ɖo nukɔn towe;
hwɛ e mǐ hu lɛ́ é ɖokpó ɖokpó nɔ ɖo kúnnu ɖe dó mǐ wú wɛ.
Ðó gǔfínfɔ́n núwiwa mǐtɔn lɛ́ ɖo kpɔ́ xá mǐ;
mǐ tuun nǔwanyido mǐtɔn lɛ́ ganjí.
13 Mǐ wa nǔ nyi do bo lɛ́ gbɛ́ Jexóva;
mǐ dó gǔdo Mawu mǐtɔn.
Mǐ ɖɔ kɔgbídínúmɛ kpó gǔfínfɔ́n kpó xó;
mǐ mɔ adingban sín xo, bɔ énɛ́ gúdo ɔ, mǐ ɖó adingban sín ayi mɛ.
14 Hwɛjijɔ dó gǔdofɔ,
bɔ nǔjlɔ́jlɔ́wiwa ɖo te ɖo zɔ;
ɖó nǔgbó* klɛ́n afɔ ɖo tokplétɛn ɔ,
bɔ nǔ e nyí nǔ jlɔ́jlɔ́ é sixú yi fínɛ́ ǎ.
15 Nǔgbó* bú,
bɔ è vɔ mɛ ɖěbǔ e lɛ́ kɔ sín nǔ nyanya gúdo é.
Jexóva mɔ mɔ̌, bɔ é nyɔ́ nukún tɔn mɛ ǎ,*
ɖó hwɛjijɔ ɖě ɖe ǎ.
16 É mɔ ɖɔ mɛ ɖě kún ɖe ó,
bɔ é kpácá ɛ ɖɔ mɛ ɖě kún sa vo dó ta yětɔn mɛ ó,
énɛ́ wú ɔ, awa éɖésúnɔ tɔn hɛn hwlɛngán wá,*
bɔ nǔjlɔ́jlɔ́wiwa éɖésúnɔ tɔn nɔ gǔdo n’i.
17 Énɛ́ ɔ, é dó nǔjlɔ́jlɔ́wiwa ganwu ɖɔhun,
bo xwe gangbákún hwlɛngán* tɔn.
É dó hlɔnbiba sín awu lɛ́ awu ɖɔhun,
bo sɔ́ akpakpa sɔ́ mɛ bú dó éɖée awu aga tɔn* ɖɔhun.
18 É ná dó ajɔ yě ɖó nǔ e yě wa é wú:
é ná sin xomɛ dó kɛntɔ́ tɔn lɛ́, é ná dɔn tó nú kɛntɔ́ tɔn lɛ́.
É ná sú nǔ e jɛxá tɔtɛ́ntinto lɛ́ é sín axɔ́ yě.
19 Yě ná ɖó sísí e gɔ́ngɔ́n é nú nyǐkɔ Jexóva tɔn sín fí e hwe nɔ yi xɔ dó é,
bo ná ɖó sísí e gɔ́ngɔ́n é nú susu tɔn sín hwetɔ́nhwe jí,
ɖó é ná wá tɔsisa e ɖo zǐngídi jí,
bɔ gbigbɔ Jexóva tɔn bló bɔ é ɖo sisa wɛ é ɖɔhun.
20 “Mɛ e nɔ vɔ́ mɛ xɔ é ná wá Sinyɔ́ɔ,
é ná wá mɛ ɖěɖěe ɖo kúnkan Jakɔ́bu tɔn mɛ bo lɛ́ kɔ sín nǔwanyido yětɔn lɛ́ gúdo lɛ́ é gɔ́n,” wɛ Jexóva ɖɔ.
21 “Nyɛ ɔ, akɔ e un jɛ xá yě é ɖíe,” wɛ Jexóva ɖɔ. “Gbigbɔ ce e ɖo jǐ towe é kpó xó ce e un sɔ́ ɖó nu towe mɛ lɛ́ é kpó ɔ, è ná ɖe yě sín nu towe mɛ ǎ, è ná ɖe yě sín vǐ* towe lɛ́ nu mɛ ǎ, è ná ɖe yě sín vǐvú towe* lɛ́ nu mɛ ǎ,” wɛ Jexóva ɖɔ, “sín din káká sɔ́yi.”