Ajée

1 Ðo axɔ́súɖuɖu axɔ́sú Daliwúsi tɔn sín xwe wegɔ́ ɔ mɛ, sun tɔn ayizɛ́ngɔ́ ɔ sín azǎn nukɔntɔn ɔ gbe ɔ, Jexóva ɖɔ xó nú tokpɔngán Judáa tɔn Zolobabɛ́li Calutiɛ́li ví ɔ, kpó vɔ̌sánúxwlémawutɔ́ ɖaxó Jozuwée Yexosadáki ví ɔ kpó gbɔn gbeyíɖɔ Ajée* jí, bo ɖɔ:

2 “Nǔ e Jexóva ahwankpá lɛ́ tɔn ɖɔ é ɖíe: ‘Togun élɔ́ nɔ ɖɔ: “Hwenu ko su bónú è ná gbá xwé* Jexóva tɔn* ǎ.”’”

3 Jexóva lɛ́ ɖɔ xó gbɔn gbeyíɖɔ Ajée jí, bo ɖɔ: 4 “Din wɛ nyí hwenu ɔ bɔ mi ná nɔ xwé mitɔn e mi sɔ́ atín ɖɛkpɛ ɖɛkpɛ lɛ́ dó b’acɔ́ ná lɛ́ é gbe, hwenu e xwé élɔ́ ɖo gbigba jí é a? 5 Din ɔ, nǔ e Jexóva ahwankpá lɛ́ tɔn ɖɔ é ɖíe: ‘Mi sɔ́ ayi ɖó* nǔ e wa wɛ mi ɖe lɛ́ é jí ganjí. 6 Mi dó jinukún kpɔ́ gégé, loɔ, kpɛɖé jɛ́n mi ka mɔ ya. Mi nɔ ɖu nǔ, é ka nɔ jɛmɛ nú mi ǎ. Mi nɔ nu, kɔ ka nɔ lɛ́ kpo ɖo mi xú wɛ. Mi nɔ cyɔ́n avɔ, é ka nɔ glɔ́n jɔhɔn nú mi ǎ. Jokóxotɔ́ nɔ bɛ́ azɔ̌kwɛ́ tɔn dó akwɛ́kpo tíntɔ́n mɛ.’”

7 “Nǔ e Jexóva ahwankpá lɛ́ tɔn ɖɔ é ɖíe: ‘Mi sɔ́ ayi ɖó* nǔ e wa wɛ mi ɖe lɛ́ é jí ganjí.’

8 “‘Mi xá só jí, bo gbo atín wá. Mi gbá xwé ce, énɛ́ ɔ, xomɛ ná hun mì, bɔ é ná lɛ́ sɔ́ mì su,’ wɛ Jexóva ɖɔ.”

9 “‘Nǔ gěgé ɖó nukún wɛ mi ɖe, kpɛɖé wɛ mi ka mɔ; bɔ ée mi bɛ́ wá xwé é ɔ, un dó funfun mɛ bɔ é gba dó. Ðó aniwú?’ wɛ Jexóva ahwankpá lɛ́ tɔn ɖɔ. ‘Ðó xwé ce ɖo gbigba jí, bɔ ɖokpó ɖokpó mitɔn ka nɔ ɖo wezun nu gbɔn fí bǐ bo ná dó kpé nukún dó xwé éɖésúnɔ tɔn wú. 10 Énɛ́ wú wɛ jǐnukúnsin ma ná ahǔn ǎ, bɔ ayǐkúngban ma ná sínsɛ́n tɔn lɛ́ ǎ. 11 Un bló bɔ akú ɖó dó ayǐkúngban ɔ jí, dó só lɛ́ jí, dó jinukún lɛ́ jí, dó vɛ̌ɛn yɔ̌yɔ́ jí, dó ami jí, dó nǔ e nɔ wú ɖo kɔ́mɛ lɛ́ é jí, dó gbɛtɔ́ kpó kanlin kpó jí, dó tagba jijɛ mitɔn lɛ́ jí.’”

12 Zolobabɛ́li Calutiɛ́li ví ɔ kpó vɔ̌sánúxwlémawutɔ́ ɖaxó Jozuwée Yexosadáki ví ɔ kpó, gɔ́ nú mɛ e kpo ɖo togun ɔ mɛ lɛ́ é bǐ se tónú nú gbe Jexóva Mawu yětɔn tɔn, kpó gbeyíɖɔ Ajée sín xó lɛ́ kpó, ɖó Jexóva Mawu yětɔn wɛ sɛ́ ɛ dó wútu; bɔ togun ɔ jɛ sísí e gɔ́ngɔ́n é ɖó nú Jexóva jí.

13 Énɛ́ gúdo ɔ, wɛndótɔ́ Jexóva tɔn Ajée dó wɛn élɔ́ togun ɔ sɔgbe xá wɛn e Jexóva dó è é: “‘Togun ce, un ɖo kpɔ́ xá mi,’ wɛ Jexóva ɖɔ.”

14 Énɛ́ ɔ, Jexóva sísɛ́ tokpɔngán Judáa tɔn Zolobabɛ́li Calutiɛ́li ví ɔ, kpó vɔ̌sánúxwlémawutɔ́ ɖaxó Jozuwée Yexosadáki ví ɔ kpó, gɔ́ nú mɛ e kpo ɖo togun ɔ mɛ lɛ́ é bǐ; bɔ yě wá, bo jɛ azɔ̌ wa jí ɖo xwé Jexóva ahwankpá lɛ́ tɔn, Mawu yětɔn tɔn gbe. 15 Nǔ nyí mɔ̌ ɖo axɔ́sú Daliwúsi sín xwe wegɔ́ ɔ mɛ, sun tɔn ayizɛ́ngɔ́ ɔ sín azǎn 24gɔ́ ɔ gbe.