Sofoníi
2 Mi mɛ e ɖo akɔta e winnyá ma nɔ hu ǎ é mɛ lɛ́ é mi,
mi xo miɖée lɛ́ kplé, ɛɛn, mi xo miɖée lɛ́ kplé.
2 Cóbónú gbetakɛ́n ɔ ná bɛ́ azɔ̌ ɔ,
cóbónú azǎn ɔ ná wá yi jɔhɔn d’alɔ wɔn mɛ ɖɔhun ɔ,
cóbónú xomɛsin ɖaxó Jexóva tɔn ná wá mi jí ɔ,
cóbónú xomɛsinzán Jexóva tɔn ná wá mi jí ɔ,
3 xomɛfátɔ́* e ɖo ayǐkúngban ɔ jí lɛ́ é bǐ è mi, mi ba Jexóva,
mi mɛ e nɔ xwedó gbetakɛ́n jlɔ́jlɔ́ tɔn* lɛ́ é.
Mi ba nǔjlɔ́jlɔ́wiwa, mi ba xomɛfífá.*
Bóyá* è ná hwlá mi ɖo xomɛsinzán Jexóva tɔn gbe.
4 Ðó Gaza ná nyí toxo e mɛ mɛɖé ma sɔ́ ɖe ǎ é;
bɔ Acikelɔ́ni ná jɛ vɔ̌.
È ná nya Acidɔ́di ɖo kéze ɖéɖé,*
bo ná hɔn ɖɔ nú Eklɔ́ni.
5 “Heelú mi mɛ e nɔ nɔ xutó lɛ́ é, ɛɛn, akɔta Kelɛ́tinu lɛ́ tɔn!
Xó Jexóva tɔn ɖó hwɛ nú mi.
Kanáa è, to Filisitɛ́ɛn lɛ́ tɔn, un ná sú kún dó nú we bǐ mlɛ́mlɛ́,
káká bɔ é sɔ́ ná kpo mɛ ɖěbǔ ɖo to ɔ mɛ ǎ.
6 Xutó ɔ ná húzú amagbo,
bɔ dotɔ lɛ́ ná ɖo fínɛ́ nú lɛ̌ngbɔ́nyitɔ́ lɛ́ gɔ́ nú kanlinkpó e è sɔ́ awǐnnya dó bló ná lɛ́ é nú lɛ̌ngbɔ́ lɛ́.
7 É ná húzú xá ɖé nú mɛ e kpo ɖo togun Judáa tɔn mɛ lɛ́ é;
fínɛ́ wɛ yě ná nɔ ɖu nǔ ɖe.
Xwé Acikelɔ́ni tɔn lɛ́ gbe wɛ yě ná nɔ mlɔ́ gbadanu.
Ðó Jexóva Mawu yětɔn ná nyi kɔ kpɔ́n yě,*
bo ná kplá mɛ yětɔn e ɖo kannumɔgbénu lɛ́ é lɛ́ kɔ.”
8 “Un se mɛcáko Mɔwábu tɔn kpó Amumɔ́ɔ ví lɛ́ sín zun lɛ́ kpó,
yědɛɛ lɛ́ wɛ cá togun ce ko, bo gblɔ́n adǎn kpó goyíyí kpó ɖɔ émí ná yí ayǐkúngban yětɔn.
9 Énɛ́ wú ɔ, ényí un ɖo gbɛ jɛ́n wɛ ɔ,” wɛ Jexóva ahwankpá lɛ́ tɔn, Mawu Izlayɛ́li tɔn ɔ ɖɔ,
“Mɔwábu ná wá cí Sodɔ́mu ɖɔhun,
bɔ Amumɔ́ɔ ná cí Gomɔ́ɔ ɖɔhun,
nɔtɛn e wunkan lɛ́ gɔ́ é ɖé wɛ, bo lɛ́ nyí jɛdo, kpó fí e jɛ vɔ̌ káká sɔ́yi é ɖé kpó.
Mɛ e kpo ɖo togun ce mɛ lɛ́ é ná vɔ yě,
bɔ mɛ e gán ɖo akɔta ce mɛ lɛ́ é ná xo nǔ yětɔn lɛ́ yí.
10 Nǔ e yě ná mɔ ɖó goyíyí yětɔn tɛnmɛ é nɛ́,
ɖó yě cá togun Jexóva ahwankpá lɛ́ tɔn ko, bo lɛ́ yí go wǔ tɔn wútu.
11 Jexóva ná d’abaɖa dó* yě;
ɖó é ná sɔ́ nǔmɛsɛn e ɖo ayǐkúngban ɔ jí lɛ́ é bǐ dó húzú nǔ yǎyá,
bɔ tɔtɛ́ntinto akɔta lɛ́ tɔn lɛ́ bǐ ná ɖe kɔ́ n’i,*
mɛ ɖokpó ɖokpó ná wa mɔ̌ sín tɛn tɔn mɛ.
12 Etiopíinu lɛ́ è mi, hwǐ ce ná hu mi lɔmɔ̌.
13 É ná dlɛ́n alɔ tɔn sɛ́dó totaligbé bo ná sú kún dó nú Asilíi,
é ná bló bɔ Ninívu ná jɛ vɔ̌, ɛɛn, é ná xú gbětótló mɛ ɖɔhun.
14 Kanlinhwan lɛ́ ná nɔ mlɔ́ tɛ́ntin tɔn, ɛɛn, gběkanlin alɔkpa lɛ́ bǐ.*
Tɔkpákpá kpó ajijá kpó bǐ ná dɔ́ dotín tɔn nukúnɖéjí lɛ́ tɛ́ntin ɖo zǎnmɛ.
Gbe ɖé ná ji han ɖo flɛtɛ́li nu.
È ná sú kún dó nú nǔ ɖo kpekán ɔ ta;
ɖó é ná ɖe sɛ́dluxwlɛ lɛ́ nyi wěxo.
15 Toxo goyítɔ́ e jínjɔ́n ayǐ ɖo ayijayǐ mɛ ɖ’ayǐ,
bo nɔ ɖɔ nú éɖée ɖɔ: ‘Nyiɖokpónɔ wɛ sɔ mɔ̌, mɛ ɖěvo ɖě sɔ́ ɖe ǎ,’ é nɛ́.
Kpɔ́n lěe é húzú nǔ e xyɔ́ wǔ é,
avatɛn ɖé nú gběkanlin lɛ́ gbɔn é!
Mɛ e ná gbɔn akpá tɔn lɛ́ é bǐ ná kwínkwín lobo myɔ́ akpotokwín dó jǐ tɔn.”