Ezayíi
57 Nǔjlɔ́jlɔ́watɔ́ sín kún sú dó,
amɔ̌, mɛ ɖěbǔ ké ya ná ǎ.
È ɖe súnnu gbejínɔtɔ́ lɛ́ síin,*
bɔ mɛ ɖěbǔ ka nɔ ɖ’ayi wú ɖɔ è ɖe mɛ e nyí nǔjlɔ́jlɔ́watɔ́ é síin,
ɖó awěxomɛ ɔ wú* ǎ.
2 É byɔ́ fífá mɛ.
Mɛ e nɔ wa nǔ jlɔ́jlɔ́ lɛ́ é bǐ gbɔjɛ ɖo zan yětɔn lɛ́ jí.*
3 “Amɔ̌, mi mɛ e nyí azětɔ́ví lɛ́ é mi,
mi mɛ e nyí súnnu nyɔ̌nuɖěvobatɔ́ kpó nyɔ̌nu tonyatɔ́ kpó sín vǐ lɛ́ é mi,
mi wá fí.
4 Mɛ̌ cá ná wɛ mi ka ɖe?
Mɛ̌ kɛ nu gblogblo ná wɛ mi ka ɖe? Mɛ̌ jí tún ɖɛ̌ dó wɛ mi ka ɖe?
Nǔwanyido sín vǐ wɛ mi nyí,
bo nyí mɛblɛ́blɛ́ sín vǐ ǎ cé?
5 Mɛ ɖěɖěe jlǒ syɛ́nsyɛ́n nɔ wá ná ɖo atín ɖaxó ɖaxó lɛ́ tɛ́ntin,
ɖo atín e vun ganjí lɛ́ é sá lɛ́ é wɛ mi nyí ǎ cé?
Mɛ ɖěɖěe nɔ hu vǐ lɛ́ ɖo tɔdo* lɛ́ mɛ,
ɖo só xomɛ lɛ́ é wɛ mi nyí ǎ cé?
6 Awǐnnya e ɖíɖí wǔ ɖo tɔdo* ɔ mɛ lɛ́ é wɛ nyí kanta mitɔn.
Ɛɛn, nǔ énɛ́ lɛ́ wɛ nyí ajɔ mitɔn.
Mi tlɛ nɔ kɔn nǔníná vɛ̌ɛn tɔn lɛ́ kɔn nyi ayǐ nú nǔ énɛ́ lɛ́, bo tlɛ nɔ lɛ́ xwlé nǔníná lɛ́ yě.
Nǔ énɛ́ lɛ́ ɖó ná jɛmɛ nú mì* wɛ a?
7 A ɖó zan towe ɖó só ɖaxó e yi jǐ é ɖé jí,
lobo yi dɔ̌n, bo ná mɔ tɛn dó sá vɔ̌.
8 A sɔ́ wuntun nǔ flínflín tɔn towe ɖó hɔn ɔ kpó hɔnkpo ɔ kpó gúdo.
A jó mì dó, bo ɖe nǔ;
a xá jǐ, bo bló bɔ zan towe gbló.
A jɛ akɔ xá yě.
A yí wǎn nú zan yětɔn jí mímlɔ́ xá yě,
bo nɔ ɖo súnnuxwé ɔ kpɔ́n wɛ.*
9 A jɛ te yi Mɛlɛ́ki* gɔ́n kpó ami kpó,
kpódó célu gěgé kpán.
A sɛ́ afɔsɔ́ɖótetɔ́ towe lɛ́ dó fí línlín,
bo mɔ tɛn dó jɛ te yi Yɔdo* mɛ.
10 A jɛ tagba bo xwedó ali towe tobutóbú lɛ́,
amɔ̌, a ɖɔ xó élɔ́ ǎ: ‘Nukúnɖíɖó ɖě ɖe ǎ!’
A vɔ́ hlɔ̌nhlɔ́n mɔ.
Nǔ e wú a ma jó gbe* ǎ é nɛ́.
11 Mɛ̌ wú ado ka hu we dó, bɔ a ɖi xɛsi ná,
lobo jɛ adingban ɖó jí?
A flín mì ǎ.
A hɛn nǔɖé dó ayi mɛ ǎ.
Un cí xwíí, bo gɔn nu kɛ.*
Énɛ́ wú ɔ, a sɔ́ ɖi xɛsi nú mì ɖě ǎ.
12 Un ná bló bɔ è ná tuun nǔjlɔ́jlɔ́wiwa enyíi towe kpó azɔ̌ towe lɛ́ kpó,
bɔ yě ka ná hɛn le wá nú we ǎ.
13 Ényí a sú xó bo byɔ́ alɔdó ɔ,
bǒcyɔ e a xo kplé lɛ́ é ná hwlɛ́n we ǎ.
Jɔhɔn ná bɛ́ yě bǐ yi,
jɔhɔn yǎyá ná fún yě yi,
amɔ̌, mɛ e ba bibɛtɛn ɖo gɔ̌n ce é ná ɖu to ɔ sín gǔ,
bo ná lɛ́ ɖu só mímɛ́ ce sín gǔ.
14 È ná ɖɔ: ‘Mi bló ali ɖokpó, mi bló ali ɖokpó! Mi sɔ́ nǔ nú ali ɔ!
Mi ɖe afɔklɛ́nnú bǐ sín togun ce sín ali jí.’”
15 Ðó nǔ e Mɛ e yi aga, bo yi jǐ,
bo nɔ nɔ gbɛ káká sɔ́yi, bɔ nyǐkɔ tɔn mɛ́ é ɖɔ é ɖíe:
“Un nɔ nɔ fí e yi aga bo mɛ́ é,
amɔ̌, un nɔ lɛ́ nɔ kpɔ́ xá mɛ e è nyínyɛ́ lɛ́ é kpó mɛɖéesɔ́hwetɔ́ lɛ́ kpó,
bo ná dó vɔ́ hlɔ̌nhlɔ́n ná gbigbɔ mɛɖéesɔ́hwetɔ́ lɛ́ tɔn,
lobo vɔ́ hlɔ̌nhlɔ́n ná ayi mɛ e nyínyɛ́ wɛ è ɖe lɛ́ é tɔn.
16 Ðó un ná klán gbe xá yě káká sɔ́yi,
alǒ nɔ xomɛsin jí hwebǐnu ǎ;
ɖó gbɛtɔ́ sín gbigbɔ ná vɔ́ da ɖó nyɛ wú,
é tlɛ nyí nǔɖíɖó e nɔ gbɔjɛ bɔ un dá lɛ́ é ɔ nɛ́.
17 Un sin xomɛ ɖó hwɛhuhu tɔn wú, énɛ́ wɛ nyí afu sín gbě e é nɔ nya é,
énɛ́ wú ɔ, un xo è, un hwlá nukúnmɛ ce, bo sin xomɛ.
Amɔ̌, é kpo ɖo nǔ wa wɛ gǔfɔ́ndómawujítɔ́ ɖɔhun, bo nɔ xwedó ali e ayi tɔn xlɛ́ ɛ é.
18 Un mɔ ali tɔn lɛ́,
amɔ̌, un ná gbɔ azɔn n’i, bo ná xlɛ́ ali i,
lobo ná dó gbɔ nú é kpó mɛ tɔn e ɖo aluwɛ mɛ lɛ́ é kpó.”
19 “Un ɖo susu kpikpa sɔ́ ɖó gbɛtɔ́ sín ɖɛ̌ jí wɛ.*
È ná ná fífá tɛgbɛ tɔn mɛ e ɖo fí línlín é kpó mɛ e ɖo tófí é kpó,” wɛ Jexóva ɖɔ,
“bɔ un ná gbɔ azɔn n’i.”
20 Amɔ̌, mɛ nyanya lɛ́ cí xu e ɖo adǎn jí, bo ma sixú cí xwíí ǎ,
bɔ sin tɔn lɛ́ nɔ ɖo gběhan xu mɛ tɔn kpó babá kpó ɖe tɔ́n wɛ é ɖɔhun.
21 “Fífá ɖě ɖe nú mɛdídá ǎ,” wɛ Mawu ce ɖɔ.