TÀN 24
Jozɛfu Tɛ́n Fofó Tɔn lɛ Kpɔ́n
JOZƐFU jló na kpɔ́n ɖɔ fofó emitɔn 10 lɛ ko huzu jijɔ à jí. Enɛ wu ɔ, é ɖɔ nú ye ɖɔ: ‘Amɛ̌ wɛ nú mi. Mi jló na kpɔ́n fí e tò mǐtɔn vɔ́da ɖè é.’
Ye ɖɔ: ‘Mǐ nyí amɛ̌ ǎ. Gbɛtɔ́ ayijlɔjlɔnɔ wɛ nú mǐ. Nɔví nɔví wɛ nú mǐ bǐ. Mǐ mɛ 12 wɛ. Amɔ̌, nɔví mǐtɔn ɖokpo sɔ́ ɖè ǎ. Kpodé ɔ ɖò tɔ́ mǐtɔn gɔ́n ɖò xwégbe.’
Jozɛfu bló nǔ mɛ e ma ɖi xó yetɔn ǎ é ɖɔhun. É sɔ́ Sinmɛnyɔ́ɔ dó gankpa mɛ, bo jó mɛ e kpo lɛ é dó bɔ ye hɛn jinukún yì xwé. Amɔ̌, é ɖɔ nú ye ɖɔ: ‘Mi ma kplá nɔví mitɔn kpodé ɔ hɛn ǎ hǔn, mi ma lɛkɔ wá ó.’
Ee ye lɛkɔ yì Kanaa é ɔ, ye wlǐ nǔ e jɛ é bǐ ɖɔ nú tɔ́ yetɔn Jakɔbu. Wǔ kú i tawun. É wlí avǐ bo ɖɔ: ‘Jozɛfu sɔ́ ɖè ǎ, bɔ dìn ɔ, Sinmɛnyɔ́ɔ lɔ sɔ́ ɖè ǎ. Na jó kpodé ce Bɛnjamɛ dó bonu mi na kplá ɛ yì ǎ.’ Amɔ̌, ee jinukún yetɔn jɛ vivɔ jí é ɔ, Jakɔbu gbɔ bo yí gbè ɖɔ Bɛnjamɛ ni xwedó ye yì Ejipu bonu ye na mɔ tɛn dó xɔ jinukún.
Ee Jozɛfu mɔ Bɛnjamɛ ja kpo fofó tɔn lɛ kpo é ɔ, xomɛ hun i tawun. Kaka jɛ hwenɛnu ɔ, ye ɖě ko tuùn ɖɔ Jozɛfu wɛ nyí nya nukúnɖeji enɛ ǎ. Jozɛfu wá bló nùɖé bo dó tɛ́n tɔ́ví tɔn 10 lɛ kpɔ́n.
É ɖɔ nú deví tɔn lɛ bɔ ye bɛ̌ jinukún gɔ́ ati fofó tɔn lɛ tɔn. É lɛ́ ɖɔ, bɔ ye zé kɔfu tɔn axivɛnu ɔ dó Bɛnjamɛ sín ati mɛ. Ye ɖě ka tuùn ǎ. Ee ye ɖido b’ɛ na nɔ zaan é ɔ, Jozɛfu sɛ́ deví tɔn lɛ dó gbě yetɔn mɛ. Deví lɛ wá yí xwedó ye wu, bo ɖɔ: ‘Etɛwu mi ka fin kɔfu gǎn mǐtɔn tɔn?’
Jozɛfu sín nɔví lɛ ɖɔ: ‘Mǐ fin kɔfu tɔn ǎ. Enyi mi mɔ kɔfu ɔ ɖò mɛɖebǔ sí ɖò mǐ mɛ hǔn, mi hu mɛ ɔ.’
Deví lɛ kije ati ye bǐ tɔn bo mɔ kɔfu ɔ ɖò Bɛnjamɛ sín ati mɛ, lee mɔ gbɔn wɛ a ɖè ɖò ɖiɖe ɔ mɛ é. Deví lɛ ɖɔ: ‘Mi mɛ e kpò lɛ é hɛn ɔ, mi na yì xwé. Amɔ̌, Bɛnjamɛ na lɛkɔ xwedó mǐdɛɛ lɛ.’ Nɛ̌ Jozɛfu sín tɔ́ví 10 lɛ ka na bló gbɔn dìn?
Ye bǐ lɛkɔ xwedó Bɛnjamɛ yì Jozɛfu sín xwégbe. Jozɛfu ɖɔ nú fofó tɔn lɛ ɖɔ: ‘Mi hɛn ɔ mi na yì, amɔ̌, Bɛnjamɛ na nɔ fí bo na nyí kannumɔ nú mì.’
Juda yí xó bo ɖɔ: ‘Enyi un jó Bɛnjamɛ dó bo yì xwé ɔ, tɔ́ ce na kú, ɖó é yí wǎn n’i ɖesu. Kɛnklɛn bo sɔ́ nyɛ dó ɖó kannumɔ, bo jó éyɛ dó ni yì.’
Jozɛfu wá mɔ dìn ɖɔ fofó emitɔn lɛ ko huzu jijɔ. Ye sɔ́ nyí mɛ baɖabaɖa ǎ. Mi nú mǐ ni kpɔ́n nǔ é Jozɛfu wà lo é.
Genèse 42:9-38; 43:1-34; 44:1-34.