TÀN 25
Xwédo Jakɔbu Tɔn Sɛ̀ Tɛn Jɛ Ejipu
JOZƐFU kpéwú bo hɛn xó dó xomɛ sɔmɔ̌ ǎ. É ɖɔ nú deví tɔn lɛ ɖɔ ye ni tɔ́n sín xɔ ɔ mɛ. Ee é kpò é kpo nɔví tɔn lɛ kɛɖɛ kpo é ɔ, é wlí avǐ. Kpɔ́n lee é na ko kpaca nɔví tɔn lɛ sɔ́ é, ɖó ye tuùn nǔ e ví ya wɛ é ɖè ɔ ǎ. É wá ɖɔ nú ye ɖɔ: ‘Nyɛ Jozɛfu wɛ. Tɔ́ ce ka kpó ɖò gbɛ̀ à?
É kpaca nɔví tɔn lɛ kaka, bɔ ye sɔ́ sixu kɛ nu ǎ. Ado hu ye bǐ. Amɔ̌, Jozɛfu ɖɔ: ‘Mi kɛnklɛn bo sɛkpɔ mì.’ Ee ye sɛkpɔ ɛ é ɔ, é ɖɔ: ‘Nyɛ nɔví mitɔn Jozɛfu e mi sà dó Ejipu é wɛ.’
Jozɛfu kpò ɖò xó ɖɔ nú ye wɛ kpo xomɛnyínyɔ́ kpo bo ɖɔ: ‘Mi ma dó hwɛ miɖee, ɖó sà e mi sà mì dó Ejipu é wu ó. Mawu ɖesu wɛ sɛ́ mì dó fí, bonu ma hwlɛn gbɛtɔ́ lɛ gán. Falawɔɔn sɔ́ mì gǎn ɖó tò ɔ bǐ nu. Enɛ wu ɔ, mi yawu lɛkɔ, bo yì ɖɔ mɔ̌ nú tɔ́ ce. Mi ɖɔ n’i ɖɔ é ni wá nɔ fí.’
Jozɛfu zunfan nɔví tɔn lɛ, bo kplá’sí kɔ nú ye. Ee Falawɔɔn sè ɖɔ Jozɛfu sín nɔví lɛ wá é ɔ, é ɖɔ nú Jozɛfu ɖɔ: ‘Ye ni fɔ kɛkɛví, bo yí kplá tɔ́ yetɔn kpo xwédo yetɔn lɛ kpo wá fí. Un na na ye ayikúngban e nyɔ́ hugǎn ɖò Ejipu é.’
Nǔ e ye wà é nɛ. Jozɛfu nɛ ɖò ɖiɖe ɔ mɛ bo ɖò tɔ́ tɔn kpé wɛ hwenu e é wá Ejipu kpo xwédo tɔn bǐ kpo é nɛ.
Xwédo Jakɔbu tɔn wá d’agba tawun. Jakɔbu, vǐ tɔn lɛ, kpo vivǔ tɔn lɛ kpo bǐ bló mɛ 70 hwenu e ye wá Ejipu é. Asì yetɔn lɛ lɔ xwedó ye, deví yetɔn lɛ lɔmɔ̌ sixu ko gɔ́ nú ye. Ye mɛ bǐ sɛ̀ tɛn jɛ Ejipu. È nɔ ylɔ ye ɖɔ Izlayɛli-ví lɛ, ɖó Mawu ko ɖyɔ nyikɔ Jakɔbu tɔn, bɔ é nɔ nyí Izlayɛli. Izlayɛli-ví lɛ wá nyí togun titewungbe ɖé nú Mawu, lee mǐ na wá mɔ gbɔn ɖò nukɔn mɛ é.
Genèse 45:1-28; 46:1-27.