TÀN 32
Azɔn Nyanya 10 Lɛ
KPƆ́N ɖiɖe lɛ. Ðiɖe ɖokpo ɖokpo xlɛ́ azɔn nyanya e Jehovah dó xò Ejipu tò ɔ é. Ðò ɖiɖe nukɔntɔn ɔ mɛ ɔ, a na mɔ Alɔɔn ɖò tɔsisa e nɔ nyí Nile é xò ɖó kpò tɔn wu wɛ. Ee é xò fó é ɔ, tɔsisa ɔ bǐ huzu kanjɔ. Hweví e ɖ’emɛ lɛ é bǐ kú, bɔ tɔsisa ɔ jɛ wǎn lun jí.
Enɛ gudo ɔ, Jehovah bló bɔ Nile jì aglobese. Ye gbakpé fí bǐ. Ye kpé adogwle lɛ mɛ, nǔɖazɛ́n lɛ mɛ, zan lɛ jí. Ee aglobese lɛ kú é ɔ, Ejipunu lɛ lí zunkɔ́ yetɔn ɖó sonu sonu, bɔ wǎn kpé fí bǐ.
Alɔɔn lɛ́ xò kɔ mɛ ɖó kpò tɔn wu, bɔ kɔgudu huzu jɛxlí. Ye nɔ ɖu gbɛtɔ́ kpo kanlin kpo. Azɔn nyanya atɔngɔ e xò Ejipu tò ɔ é nɛ.
Ejipunu lɛ kɛɖɛ wɛ azɔn nyanya e kpo lɛ é xò, ɖebǔ xò Izlayɛli-ví lɛ ǎ. Asɔfin gbakpé Ejipunu lɛ bǐ xwégbe. Azɔn nyanya ɛnɛgɔ ɔ nɛ. Kanlin lɛ wɛ azɔn nyanya atɔ́ɔ́ngɔ ɔ xò. Nyibu, lɛngbɔ̌, kpo gbagbǎ Ejipunu lɛ tɔn kpo gègě kú.
Enɛ gudo ɔ, Mɔyizi kpo Alɔɔn kpo wún afín bo nyì dó jɔhɔn mɛ. Nùtɔnɖowǔ kpé gbɛtɔ́ kpo kanlin kpo bǐ wǔ. Azɔn nyanya ayizɛngɔ ɔ nɛ.
Mɔyizi lɛ́ dlɛn alɔ dó jixwé, bɔ Jehovah sɛ́ xɛbyoso kpo kɛ́njí kpo dó. È mɔ kɛ́njí baɖabaɖa mɔhun kpɔ́n ɖò Ejipu ǎ.
Azɔn nyanya tantɔngɔ ɔ, bɔklè wɔbuwɔbu ɖé lɛ wɛ. È ko mɔ bɔklè nú ye sukpɔ́ gbɔn mɔ̌ kpɔ́n gbeɖé ǎ. Ye ɖu nǔ e kɛ́njí ɔ jó dó ɖò gle mɛ lɛ é bǐ.
Azɔn nyanya tɛnnɛgɔ ɔ, ablu wɛ. Ablu ɖaxó cyɔn Ejipu tò ɔ bǐ nú azǎn atɔn. Amɔ̌, weziza ɖò fí e Izlayɛli-ví lɛ ɖè é.
Gudo mɛ ɔ, Mawu ɖɔ nú mɛ tɔn lɛ ɖɔ ye ni mì gbagbǎ alǒ lɛngbɔ̌ sín hun dó kalɛɛkpo yetɔn lɛ wu. Enɛ gudo ɔ, wɛnsagun Mawu tɔn dín gbɔn Ejipu tò ɔ mɛ. Enyi é mɔ hun ɖò xwé ɖé hɔn wu ɔ, é nɔ hu mɛɖebǔ ɖò finɛ ǎ. Amɔ̌, enyi é ma mɔ hun ɖò kalɛɛkpo ɖé wu ǎ ɔ, é nɔ hu nukɔnví gbɛtɔ́ kpo kanlin kpo e ɖò finɛ lɛ é bǐ tɔn. Azɔn nyanya 10 gɔ́ ɔ nɛ.
Ðò azɔn nyanya enɛ gudo ɔ, Falawɔɔn jó Izlayɛli-ví lɛ dó bo ɖɔ ye ni yì. Togun Mawu tɔn ko ɖò gbesisɔ mɛ bo na gosin Ejipu. Zǎn enɛ mɛ ɔ, ye wlǐ ali bo ɖido.
Exode wemata 7 jɛ 12.