TÀN 31
Mɔyizi kpo Alɔɔn kpo Yì Falawɔɔn Gɔ́n
EE MƆYIZI lɛkɔ xwè Ejipu é ɔ, é kpé fofó tɔn Alɔɔn ɖò ali jí bo wlí nùjiwǔ lɛ bǐ ɖɔ n’i. Mɔyizi kpo Alɔɔn kpo ɖè nùjiwǔ enɛ lɛ xlɛ́ Izlayɛli-ví lɛ, bɔ togun ɔ bǐ ɖi nǔ ɖɔ Jehovah wɛ sɛ́ ye dó.
Mɔyizi kpo Alɔɔn kpo wá yí mɔ Falawɔɔn bo ɖɔ n’i ɖɔ: ‘Jehovah Mawu Izlayɛli tɔn ɖɔ, “Jǒ togun ce dó bonu é ni zɔn ali nú azǎn atɔn yì gbetótló mɛ, bo na sɛ̀n mì.”’ Amɔ̌, Falawɔɔn ka ɖɔ nú ye ɖɔ: ‘Un ɖi nǔ nú Jehovah ǎ. Un na jó Izlayɛli dó bonu é na yì ǎ.’
Falawɔɔn sìn xomɛ, ɖó Izlayɛli-ví lɛ jló na jó azɔ̌ dó bo na yí sɛ̀n Jehovah. Enɛ wu ɔ, é lɛ́ hɛn azɔ̌ ɔ syɛn d’eji nú ye. Izlayɛli-ví lɛ dó hwɛ Mɔyizi, ɖó lee Falawɔɔn ɖò nǔ dosin xá ye gbɔn wɛ é wu. É kú wǔ nú Mɔyizi. Amɔ̌, Jehovah ɖɔ n’i ɖɔ é ni ma keya na ó. Jehovah ɖɔ: ‘Un na bló bɔ Falawɔɔn na jó togun ce dó bɔ ye na yì.’
Mɔyizi kpo Alɔɔn kpo lɛ́vɔ wá yí mɔ Falawɔɔn bo bló nùjiwǔ ɖé. Alɔɔn sɔ́ kpò tɔn nyì kɔ mɛ, bɔ kpò ɔ huzu dan ɖaxó ɖé. Falawɔɔn sín majikiblotɔ́ lɛ lɔmɔ̌ fɔ kpò yetɔn lɛ nyì kɔ mɛ, bɔ kpò yetɔn lɛ lɔ huzu dan. Amɔ̌, kpɔ́n! Alɔɔn sín dan nɛ ɖò majikiblotɔ́ lɛ sín dan fɔ mì wɛ nɛ. É ɖò mɔ̌ có, Falawɔɔn jó Izlayɛli-ví lɛ dó bonu ye yì ǎ.
Hwe ɔ nu sù nú Jehovah lo, bɔ é na kplɔ́n nùɖé Falawɔɔn. A ka tuùn lee é wà mɔ̌ gbɔn é à? É sɔ́ azɔn nyanya kabǐ awě 10 dó xò Ejipu tò ɔ.
Ðò azɔn nyanya lɛ gègě hwenu ɔ, Falawɔɔn nɔ dó wɛn sɛ́dó Mɔyizi ɖɔ: ‘Ðè azɔn nyanya ɔ síìn, enɛ ɔ, un na jó Izlayɛli dó bɔ é na yì.’ Amɔ̌, enyi azɔn nyanya ɔ wá yì ɔ, Falawɔɔn nɔ huzu gbè. É nɔ jó togun ɔ dó nú ye ni yì ǎ. Amɔ̌, ɖò azɔn nyanya 10 gɔ́ ɔ gudo ɔ, Falawɔɔn jó Izlayɛli-ví lɛ dó bɔ ye yì.
A ka tuùn azɔn nyanya 10 lɛ ɖokpo ɖokpo à? Hun wexwɛ e bɔ d’ewu é, bonu mǐ na kplɔ́n nǔ dó ye wu.
Exode 4:27-31; 5:1-23; 6:1-13, 26-30; 7:1-13.