TÀN 39
Kpò Alɔɔn Tɔn Tɔ́n Folowa
KPƆ́N folowa kpo atín sínsɛ́n e mya ɖò kpò e ɖò ɖiɖe ɔ mɛ é wu é. Kpò Alɔɔn tɔn wɛ. Zǎn ɖokpo mɛ jɛn folowa kpo atín sínsɛ́n enɛ e mya é kpo tɔ́n ɖò kpò ɔ wu. Mi nú mǐ ni kpɔ́n nǔ e wu wɛ é.
Izlayɛli-ví lɛ ɖò lele sà wɛ ɖò gbetótló ɔ mɛ é ɔ, é sɔ́ hwe ǎ. Mɛɖé lɛ lin ɖɔ Mɔyizi kún ɖó na ɖò nukɔn nú emi, bonu fofó tɔn Alɔɔn lɔ na nyí vɔsanúxwlémawutɔ́ ɖaxó ó. Kolée lin mɔ̌, bɔ Dataan, Abilamu kpo gǎn 250 ɖevo lɛ kpo xò kpóɖó n’i. Ye bǐ wá Mɔyizi gɔ́n bo ɖɔ: ‘Aniwu a ka sɔ́ hwiɖee gǎn ɖó mǐ mɛ e kpò lɛ é nu?’
Mɔyizi ɖɔ nú Kolée kpo mɛ 250 e gɔ́ n’i lɛ é kpo ɖɔ: ‘Sɔ zǎnzǎn hǔn, mi fɔ zalinkpɔ́nfyɔ́nú, bo dó zalinkpɔ́n mɛ, bo wá goxɔ Jehovah tɔn kɔn. Mǐ na kpɔ́n mɛ e Jehovah na ɖè é.’
Ayihɔngbe tɔn ɔ, Kolée kpo mɛ e gɔ́ n’i lɛ é kpo wá goxɔ Jehovah tɔn kɔn. Mɛ ɖevo e ɖò hun jɛ dó ye jí wɛ lɛ é yì cí goxɔ Kolée, Dataan kpo Abilamu kpo tɔn kɔn. É sìn xomɛ nú Jehovah tawun. Mɔyizi ɖɔ: ‘Mi gosin goxɔ mɛ baɖabaɖa elɔ lɛ tɔn kɔn. Mi ma ɖ’alɔ nǔ yetɔn lɛ ɖebǔ wu ó.’ Togun ɔ setónú bo hɔn.
Mɔyizi lɛ́ ɖɔ: ‘Nǔ e na xlɛ́ mɛ e Jehovah ɖè é mi é ɖíe: ayikúngban na kɛ nu, bo na bɛ́ mɛ baɖabaɖa elɔ lɛ mì.’
Mɔyizi na ɖɔ xó kpé kpo na gbɔ kpo lě é ɔ, ayikúngban kɛ nu. É fɔ Kolée sín goxɔ kpo nǔ tɔn lɛ kpo bǐ mì, gɔ́ nú Dataan, Abilamu kpo mɛ e ɖò kpɔ́ xá ye lɛ é kpo. Ee togun ɔ sè avǐ gbè yetɔn é ɔ, ye súxó bo ɖɔ: ‘Mi hɔn! Ayikúngban taa fɔ mǐ lɔ mì!’
Kolée kpo mɛ 250 lɛ kpo kpó ɖò te ɖò goxɔ Jehovah tɔn kɔn. Enɛ wu ɔ, Jehovah sɛ́ myɔ dó, bɔ é fyɔ ye bǐ. Jehovah ɖɔ nú Alɔɔn sín vǐ Eleazaa ɖɔ é ni fɔ zalinkpɔ́nfyɔ́nú mɛ e kú lɛ é tɔn, bo dó bló nǔ gbɛ́jɛ́ ɖé bo cyɔn dó vɔsakpe ɔ. Nǔ enɛ ɔ na nyí wuntun ɖé nú Izlayɛli-ví lɛ bǐ ɖɔ mɛɖebǔ kún ɖó na xwlé vɔsanú Jehovah zɛ Alɔɔn kpo vǐ sunnu tɔn lɛ kpo wu ó.
Amɔ̌, Jehovah jló na xlɛ́ céɖécéɖé ɖɔ Alɔɔn kpo vǐ sunnu tɔn lɛ kpo wɛ emi ɖè, bɔ ye na xwlé vɔsanú emi. Enɛ wu ɔ, é ɖɔ nú Mɔyizi ɖɔ: ‘Ðɔ nú mɛ e ɖò nu nú akɔta Izlayɛli tɔn lɛ é ɖokpo ɖokpo ɖɔ ye ni hɛn kpò yetɔn wá. Alɔɔn ni hɛn kpò tɔn wá ɖò akɔta Levíi tɔn mɛ. Enɛ gudo ɔ, bɛ̌ kpò lɛ bǐ dó goxɔ ɔ mɛ ɖò akɔjɛgba ɔ nukɔn. Mɛ e Un ɖè, bɔ é na nyí vɔsanúxwlémawutɔ́ é sín kpò wɛ na tɔ́n folowa.’
Etɛ Mɔyizi ka mɔ ayihɔngbe tɔn zǎnzǎn e é yí kpɔ́n kpò lɛ é? Alɔɔn sín kpò tɔ́n folowa bɔ atín sínsɛ́n mya ɖ’ewu. A wá mɔ nukúnnú jɛ nǔ e wu Jehovah bló bɔ Alɔɔn sín kpò tɔ́n folowa é mɛ lo à?
Nombres 16:1-49; 17:1-11; 26:10.